Friday, 09 December 2022

ബ്ലൂ ഇക്കോണമി


Text Formatted

സബ്​സിഡി നിഷേധിച്ച്​ മത്സ്യത്തൊഴിലാളികളെ
മുക്കിക്കൊല്ലുന്നു ഡബ്ല്യു.ടി. ഒ.

രാജ്യങ്ങളോടു ചേര്‍ന്ന പ്രത്യേക സാമ്പത്തികമേഖലയില്‍  കടല്‍മത്സ്യബന്ധനത്തിനു നല്‍കിവരുന്ന എല്ലാ സബ്‌സിഡികളും രണ്ടുവര്‍ഷം കഴിഞ്ഞാല്‍ നിര്‍ത്തലാക്കാനുള്ള ലോക വ്യാപാര സംഘടനയുടെ തീരുമാനം, കേരള തീരത്തുനിന്നടക്കം പരമ്പരാഗത വള്ളങ്ങളിലും ബോട്ടുകളിലും മത്സ്യബന്ധനത്തിനു പോകുന്നവവർക്ക്​​ സബ്‌സിഡി ഇനത്തില്‍ ലഭിക്കുന്ന ആനുകൂല്യങ്ങൾ ഇല്ലാതാക്കും

Image Full Width
Image Caption
photo: prasoon kiran
Text Formatted

ലോകവ്യാപാര സംഘടനയുടെ മന്ത്രിതല സമ്മേളനത്തിന് ജൂണിൽ ജനീവ വേദിയായി. 164 അംഗ ലോക വ്യാപാര സംഘടനയുടെ (ഡബ്ല്യു.ടി.ഒ.) ഏറ്റവും ഉയര്‍ന്ന തീരുമാനമെടുക്കുന്ന സമിതിയായ 12-ാമത് മന്ത്രിതല സമ്മേളനത്തിന്റെ അജണ്ടയില്‍ കാര്‍ഷിക സബ്സിഡിയും ഭക്ഷ്യസുരക്ഷയും ഉള്‍പ്പെടെയുള്ള വിഷയങ്ങളുണ്ടായിരുന്നു.

ഇതിൽ ഇന്ത്യൻ സമ്പദ്​വ്യവസ്​ഥയെ പ്രതികൂലമായി ബാധിക്കുന്ന ഒരു വിഷയം കൂടിയുണ്ടായിരുന്നുവെന്നതാണ്​, ഈ സമ്മേളനത്തെ ശ്രദ്ധേയമാക്കുന്നത്. മത്സ്യമേഖലയിലെ സബ്സിഡി പൂര്‍ണമായി നിര്‍ത്തലാക്കാനുള്ള തീരുമാനമാണത്​. ഇത്​ ഇന്ത്യന്‍ നീല സമ്പദ്​വ്യവസ്ഥയെ കാര്യമായി ബാധിക്കും. ഉച്ചകോടിയില്‍ പങ്കെടുത്ത 164 രാജ്യങ്ങളിൽ പകുതിയിലേറെയും മത്സ്യത്തൊഴിലാളികളുടെ സബ്സിഡി തുടരണമെന്ന് ആവശ്യപ്പെട്ടുവെങ്കിലും വികസിത രാജ്യങ്ങള്‍ സമ്മതിച്ചില്ല. അമിത മത്സ്യബന്ധനവും വിനാശകരമായ മത്സ്യബന്ധനരീതിയും തടയുന്നതിനാണ് സബ്സിഡി നിരോധനം എന്നാണ് ലോക വ്യാപാര സംഘടനയുടെ ഇതിനുള്ള വിശദീകരണം.

വികസിത മുതലാളിത്ത രാജ്യങ്ങളിലെ വ്യാവസായിക മത്സ്യബന്ധനമാണ് കടലിന്റെ ആവാസവ്യവസ്ഥ തകിടംമറിച്ചതും മത്സ്യ ഇനങ്ങളുടെ വന്‍ തകര്‍ച്ചയിലേക്ക് വഴിയൊരുക്കിയതും.

പുറംകടൽ കൊള്ള

1980കള്‍ വരെ 10 ശതമാനം മത്സ്യ ഇനങ്ങളാണ് അമിതചൂഷണത്തിന് വിധേയമായിരുന്നത്. തൊണ്ണൂറുകളോടെ ലോക വ്യാപാര സംഘടനയുടെ നേതൃത്വത്തില്‍ നടപ്പാക്കിയ ഉദാരവത്കരണ നയങ്ങളാണ് യഥാര്‍ഥത്തില്‍ വ്യാവസായിക മത്സ്യബന്ധനത്തിന് തുടക്കംകുറിച്ചത്. അമേരിക്ക, യൂറോപ്യന്‍ യൂണിയന്‍ തുടങ്ങിയ വികസിത മുതലാളിത്ത രാജ്യങ്ങള്‍ വ്യാവസായിക മത്സ്യബന്ധനത്തില്‍ ഏര്‍പ്പെട്ടു. 130 മീറ്റര്‍ നീളമുള്ള വന്‍ കപ്പലുകള്‍, കടലിന്റെ ആവാസവ്യവസ്ഥ തകര്‍ക്കുന്ന മത്സ്യബന്ധനരീതി, ആധുനിക സംസ്‌കരണ സംവിധാനങ്ങള്‍, കൂറ്റന്‍ ശീതീകരണശാലകള്‍ ഇതെല്ലാം ഈ കപ്പലുകളുടെ സവിശേഷതകളാണ്. വികസിത മുതലാളിത്ത രാജ്യങ്ങളിലെ വ്യാവസായിക മത്സ്യബന്ധനമാണ് കടലിന്റെ ആവാസവ്യവസ്ഥ തകിടംമറിച്ചതും മത്സ്യ ഇനങ്ങളുടെ വന്‍ തകര്‍ച്ചയിലേക്ക് വഴിയൊരുക്കിയതും. ഇവ ആയിരക്കണക്കിന് കിലോമീറ്റര്‍ സഞ്ചരിച്ചും മാസങ്ങളോളം കടലില്‍ ചെലവഴിച്ചും മറ്റു രാജ്യങ്ങളുടെ പുറംകടലിലെ സമ്പത്ത് കൊള്ളയടിക്കുന്നു. എന്നാല്‍, ചെറിയ ബോട്ടും വള്ളങ്ങളും ഉപയോഗിച്ചു നടത്തുന്ന മത്സ്യബന്ധനം മുഖ്യമായും തീരത്തോടുചേര്‍ന്ന പ്രദേശങ്ങളിലെ ജനങ്ങളുടെ ഉപജീവനമാര്‍ഗമാണ്. 

ഇന്ത്യൻ സമ്പദ്​വ്യവസ്​ഥയെ പ്രതികൂലമായി ബാധിക്കുന്ന ഒരു വിഷയം കൂടിയുണ്ടായിരുന്നുവെന്നതാണ്​, ഈ സമ്മേളനത്തെ ശ്രദ്ധേയമാക്കുന്നത്. മത്സ്യമേഖലയിലെ സബ്സിഡി പൂര്‍ണമായി നിര്‍ത്തലാക്കാനുള്ള തീരുമാനമാണത്​. ഇത്​ ഇന്ത്യന്‍ നീല സമ്പദ്​വ്യവസ്ഥയെ കാര്യമായി ബാധിക്കും

കേരളത്തിലെ മത്സ്യത്തൊഴിലാളികൾ നടുക്കടലിലേക്ക്​

രാജ്യങ്ങളോടു ചേര്‍ന്ന പ്രത്യേക സാമ്പത്തികമേഖലയില്‍ (200 നോട്ടിക്കല്‍ മൈല്‍)
കടല്‍മത്സ്യബന്ധനത്തിനു നല്‍കിവരുന്ന എല്ലാ സബ്‌സിഡികളും രണ്ടുവര്‍ഷം
കഴിഞ്ഞാല്‍ നിര്‍ത്തലാക്കാനുള്ള ലോക വ്യാപാര സംഘടനയുടെ തീരുമാനം
ഇന്ത്യന്‍ മത്സ്യത്തൊഴിലാളികളുടെ ജീവിതത്തിനുമേല്‍ കാര്‍മേഘങ്ങളായി
ഉരുണ്ടുകൂടുകയാണ്. കാലാവസ്​ഥാ വ്യതിയാനം മൂലം തകിടംമറിഞ്ഞുകൊണ്ടിരിക്കുന്ന കടൽ കാലാവസ്​ഥയുമായി, അതിജീവനത്തിന്​ മല്ലിട്ടുകൊണ്ടിരിക്കുന്ന അവരുടെ ജീവിതം കശക്കിയെറിയപ്പെടാൻ പോകുകയാണ്. ഡബ്ല്യു.ടി.ഒ. മന്ത്രിതല സമ്മേളനം കൈക്കൊണ്ട തീരുമാനം കേരളം ഉള്‍പ്പെടെയുള്ള ഇന്ത്യയിലെ തീരസംസ്ഥാനങ്ങളിലെ ഒന്നരക്കോടിയോളം വരുന്ന മത്സ്യത്തൊഴിലാളി സമൂഹത്തെ നടുക്കടലില്‍ തള്ളും. ഇത്​ നടപ്പിലാകുന്നതോടെ അടിസ്ഥാനസൗകര്യ വികസനം, തുറമുഖ നിര്‍മാണം, യാനങ്ങളുടെ നിര്‍മാണം, എന്‍ജിന്‍, വല, ഇന്ധനം തുടങ്ങിയവയ്‌ക്കൊക്കെ നല്‍കിക്കൊണ്ടിരിക്കുന്ന സബ്‌സിഡികള്‍ ഇല്ലാതാകും. കേരളതീരത്തുനിന്ന്​ പരമ്പരാഗത വള്ളങ്ങളിലും ബോട്ടുകളിലും മത്സ്യബന്ധനത്തിനു പോകുന്നവര്‍ക്ക്​ വരുംകാലങ്ങളില്‍ സബ്‌സിഡി ഇനത്തില്‍ ഒരുആനുകൂല്യവും ഉണ്ടാകില്ല എന്നര്‍ഥം. നിയമവിരുദ്ധവും അനിയന്ത്രിതവുമായ മത്സ്യബന്ധനവും മത്സ്യസമ്പത്തിന്റെ അമിതചൂഷണവും തടയാനെന്ന പേരിലുള്ള തീരുമാനം 590 കിലോമീറ്റര്‍ കടല്‍ത്തീരമുള്ള കേരളത്തെയാണ്​ ഏറെ ബാധിക്കുക. സംസ്ഥാനത്തുനിന്ന്​ വള്ളങ്ങളിലും ബോട്ടുകളിലുമായി കടലില്‍ പോകുന്നവര്‍ ഭൂരിഭാഗവും ചെറുകിട മീന്‍പിടിത്തക്കാരാണ്, ഏറെയും ദാരിദ്ര്യരേഖയ്ക്കുതാഴെയുള്ളവര്‍. വികസിത- അവികസിത രാജ്യങ്ങളെന്നോ ചെറുകിട- വന്‍കിടക്കാരെന്നോ വ്യത്യാസമില്ലാതെ സബ്‌സിഡി നിര്‍ത്തലാക്കുമ്പോള്‍ അതിന്റെ ആഘാതം കേരളത്തിലെ പത്തര ലക്ഷത്തോളം മത്സ്യത്തൊഴിലാളി സമൂഹത്തിന്റെ ചുമലില്‍ അതേപടി പതിക്കും. അത്യാധുനിക സാങ്കേതികവിദ്യയും സംസ്‌കരണ സംവിധാനവുമൊക്കെയായി കടലില്‍ മാസങ്ങളോളം തമ്പടിച്ച്​ മീന്‍ പിടിക്കുന്ന വികസിത രാജ്യങ്ങളിലെ കപ്പലുകളെയും അന്നന്നത്തെ ഉപജീവനത്തിനും പ്രാദേശിക ഭക്ഷ്യാവശ്യത്തിനുമായി കടലില്‍ പോകുന്ന ചെറുകിടക്കാരെയും ഡബ്ല്യു.ടി.ഒ. ഒരേ തട്ടില്‍ വച്ചത്​നീതീകരിക്കാനാവാത്ത മാനദണ്ഡമായിപ്പോയി.

wto
ജനീവയിൽ നടന്ന ലോക വ്യാപാര സംഘടനയുടെ 12-ാമത് മന്ത്രിതല സമ്മേളനം

ചെറുകിടക്കാര്‍ക്കുള്ള സബ്‌സിഡി 25 വര്‍ഷത്തേക്കുകൂടി തുടരണമെന്ന ഇന്ത്യയുടെ ആവശ്യം അംഗീകരിക്കപ്പെട്ടില്ല. വികസിത രാജ്യങ്ങളെ അപേക്ഷിച്ചു നോക്കുമ്പോള്‍ ഇന്ത്യയില്‍ നല്‍കിവരുന്ന സബ്‌സിഡി തുച്ഛമാണെങ്കിലും ജീവിതത്തിന്റെ രണ്ടറ്റവും കൂട്ടിമുട്ടിക്കാന്‍ ജീവന്‍
പണയം വയ്ക്കുന്നവര്‍ക്ക് അത്​ ചെറിയൊരു ആശ്വാസമായിരുന്നു. ഒരു മത്സ്യത്തൊഴിലാളിക്ക്​ ഡെന്മാര്‍ക്കില്‍ പ്രതിവര്‍ഷം 75,578 ഡോളറും സ്വീഡനില്‍ 65,976 ഡോളറും സബ്‌സിഡി നല്‍കുമ്പോള്‍ ജപ്പാനില്‍ അത് 8,385 ഡോളറും അമേരിക്കയില്‍ 4,956 ഡോളറുമാണ്. ചൈനയില്‍ 45 ഡോളര്‍ ലഭിക്കുമ്പോള്‍ ഇന്ത്യയില്‍ 15 ഡോളര്‍ മാത്രമാണ്.

വികസ്വര- അവികസിത രാജ്യങ്ങളുടെ താത്പര്യങ്ങൾക്ക്​ വിരുദ്ധമായ നയങ്ങൾ അടിച്ചേല്‍പ്പിക്കാന്‍ ലോകവ്യാപാര സംഘടനയിലൂടെ നിഷ്പ്രയാസം കഴിയുന്നുണ്ട്.

ആഗോള മത്സ്യബന്ധനത്തിന്റെ നാലുശതമാനത്തിലധികം കൈകാര്യം ചെയ്യുന്ന ഇന്ത്യ ആ മേഖലയ്ക്ക് നല്‍കുന്ന സബ്സിഡികള്‍ നിര്‍ത്തണമെന്ന നിബന്ധന നമുക്ക് സ്വീകാര്യമല്ല. 0.7 ശതമാനത്തില്‍ കൂടുതല്‍ മത്സ്യബന്ധനത്തില്‍ ഏര്‍പ്പെടുന്ന രാജ്യങ്ങള്‍ സബ്സിഡി നിര്‍ത്തലാക്കണമെന്ന വികസിത രാജ്യങ്ങളുടെ ആവശ്യം നടപ്പിലായാല്‍ ഇന്ത്യയിലെ അതുമായി ബന്ധപ്പെട്ട് ഉപജീവനം നടത്തുന്നവരുമായ 40 ലക്ഷം മത്സ്യത്തൊഴിലാളികളുടെ മരണമണിയാകും മുഴങ്ങുക.

സമവായമാണ്​ ലോകവ്യാപാരസംഘടനയുടെ തീരുമാനങ്ങളുടെ കാതല്‍, ഭൂരിപക്ഷമല്ല. ഒന്നുറപ്പ്; നവ സാധാരണ കാലഘട്ടത്തില്‍ ലോകം വെള്ളപ്പുക ആഗ്രഹിക്കുന്നു. എന്നാല്‍ ഇന്ത്യന്‍ മത്സ്യത്തൊഴിലാളികളുടെ ചങ്കത്തടിച്ചാണ് 12-ാമത് മന്ത്രിതല സമ്മേളനത്തിന് വിരാമമായത്. നമ്മുടെ രാജ്യത്തെ മത്സ്യത്തൊഴിലാളികളില്‍ 90 ശതമാനവും ചെറുകിട മേഖലയെ ആശ്രയിക്കുന്നവരാണ്. സാധാരണക്കാര്‍ക്ക് പോഷകമൂല്യമുള്ള ഭക്ഷണം ലഭ്യമാക്കുന്നതില്‍ പ്രധാന പങ്കുവഹിക്കുന്നതും ഈ മേഖലയാണ്. സബ്സിഡി നിര്‍ത്തലാക്കുമ്പോള്‍ ഈ ഘടകം പരിഗണിക്കാത്തത് കടുത്ത അനീതിയാണ്. സമ്പന്നരാജ്യങ്ങള്‍ വരുത്തിവയ്ക്കുന്ന വിനകള്‍ക്ക് പാവപ്പെട്ട മത്സ്യത്തൊഴിലാളികളെ ക്രൂശിക്കുന്നത് ക്രൂരമാണ്. 

വ്യാപാര സംഘടന ആർക്കുവേണ്ടി?

വികസ്വര- അവികസിത രാജ്യങ്ങളുടെ താത്പര്യങ്ങൾക്ക്​ വിരുദ്ധമായ നയങ്ങൾ അടിച്ചേല്‍പ്പിക്കാന്‍ ലോക വ്യാപാര സംഘടനയിലൂടെ നിഷ്പ്രയാസം കഴിയുന്നുണ്ട്. സമീപകാലങ്ങളിൽ സംഘടനയിൽനിന്നുണ്ടായ തീരുമാനങ്ങളെല്ലാം ഇതിനുദാഹരണങ്ങളാണ്​.

sea
ഡബ്ല്യു.ടി.ഒ മന്ത്രിതല സമ്മേളനം കൈക്കൊണ്ട തീരുമാനം കേരളം ഉള്‍പ്പെടെയുള്ള ഇന്ത്യയിലെ തീരസംസ്ഥാനങ്ങളിലെ ഒന്നരക്കോടിയോളംവരുന്ന മത്സ്യത്തൊഴിലാളി സമൂഹത്തെ നടുക്കടലില്‍ തള്ളും. ഇത്​ നടപ്പിലാകുന്നതോടെ അടിസ്ഥാന സൗകര്യ വികസനം, തുറമുഖ നിര്‍മാണം, യാനങ്ങളുടെ നിര്‍മാണം, എന്‍ജിന്‍, വല, ഇന്ധനം തുടങ്ങിയവയ്‌ക്കൊക്കെ നല്‍കിക്കൊണ്ടിരിക്കുന്ന സബ്‌സിഡികള്‍ ഇല്ലാതാകും. photo/ prasoonkiran

ഇന്ത്യയിൽ, കരിമ്പുകർഷകർക്ക്​ നൽകുന്ന സബ്​സിഡിയുമായി ബന്ധപ്പെട്ട വിഷയം ഇത്തരമൊന്നായിരുന്നു. കരിമ്പ് കര്‍ഷകര്‍ക്ക് മൊത്തം ഉത്പാദന വിലയുടെ പത്തുശതമാനത്തിലധികം സബ്സിഡി നല്‍കുന്നതിനെതിരെ ഓസ്‌ട്രേലിയ, ബ്രസീല്‍, ഗ്വാട്ടിമാല എന്നിവര്‍ ചേര്‍ന്ന് ലോക വ്യാപാര സംഘടനയുടെ തർക്കപരിഹാര സമിതിയില്‍ (ഡി.എസ്​.ബി.) പരാതി നല്കിയിരുന്നു. ബ്രസീല്‍ കഴിഞ്ഞാല്‍ രണ്ടാമത്തെ പഞ്ചസാര ഉത്പാദകരാജ്യം ഇന്ത്യയാണ്. താങ്ങുവില, സൗജന്യ വൈദ്യുതി, ജലസേചനം എന്നിങ്ങനെ സബ്സിഡികള്‍ കര്‍ഷകർക്ക് നൽകുന്നത്​ ലോക വ്യാപാര കരാറിന്റെ ലംഘനമായാണ്​ചൂണ്ടിക്കാണിക്കപ്പെട്ടത്​. ഇന്ത്യയില്‍ അഞ്ചുകോടി പേരുടെ ഉപജീവനമാര്‍ഗമാണ് കരിമ്പുകൃഷി.

0.7  ശതമാനത്തില്‍ കൂടുതല്‍ മത്സ്യബന്ധനത്തില്‍ ഏര്‍പ്പെടുന്ന രാജ്യങ്ങള്‍ സബ്സിഡി നിര്‍ത്തലാക്കണമെന്ന വികസിത രാജ്യങ്ങളുടെ ആവശ്യം നടപ്പിലായാല്‍ ഇന്ത്യയിലെ അതുമായി ബന്ധപ്പെട്ട് ഉപജീവനം നടത്തുന്നവരുമായ 40 ലക്ഷം മത്സ്യത്തൊഴിലാളികളുടെ മരണമണി മുഴങ്ങും

കോവിഡ്​ വാക്​സിനും ചികിത്സയുമായി ബന്ധപ്പെട്ട വിവേചനമാണ്​ മറ്റൊന്ന്​.  വാക്‌സിനുകള്‍, മരുന്നുകള്‍, ചികിത്സ, അനുബന്ധ സാങ്കേതികവിദ്യ എന്നിവയെക്കുറിച്ചുള്ള വ്യാപാരവുമായി ബന്ധപ്പെട്ട ബൗദ്ധിക സ്വത്തവകാശ ഉടമ്പടിയുടെ (ട്രിപ്​സ്​) പ്രധാന വ്യവസ്ഥകള്‍ ഒഴിവാക്കാനുള്ള നിര്‍ദേശം ദക്ഷിണാഫ്രിക്കയ്ക്കൊപ്പം ലോക വ്യാപാര സംഘടനയില്‍ ഉന്നയിച്ചിരിക്കുകയാണ് ഇന്ത്യ. വികസിത രാജ്യങ്ങള്‍ കോവിഡ് ബൂസ്റ്റര്‍ ഡോസുകള്‍ പുറത്തിറക്കുമ്പോള്‍, ആഫ്രിക്കക്കാരില്‍ കഷ്ടിച്ച് 26 ശതമാനം ആളുകൾ മാത്രമേ പൂര്‍ണമായി വാക്‌സിൻ എടുത്തിട്ടുള്ളൂ. ആഗോള അസമത്വത്തിന്റെ വ്യാപ്തി ഈ സ്ഥിതിവിവരക്കണക്ക്  വെളിപ്പെടുത്തുന്നു. പൂര്‍ണമായും തദ്ദേശീയമായ കോവിഡ് വാക്‌സിന്‍- (കോവാക്‌സിന്‍) വികസിപ്പിച്ച ചുരുക്കം ചില രാജ്യങ്ങളിലൊന്നാണ് ഇന്ത്യ. രാഷ്ട്രങ്ങള്‍ നിര്‍മിച്ച ഭൂമിശാസ്ത്രപരമായ അതിര്‍ത്തികള്‍ തച്ചുടയുന്ന ഇക്കാലത്തും വാക്സിന്റെ കുത്തകയ്ക്കായി വന്‍ രാഷ്ട്രങ്ങള്‍ ശ്രമിച്ചാല്‍ ഈ സംഘടനയുടെ നിലനില്‍പ്പുതന്നെ അവതാളത്തിലായേക്കാം.

വിധികൾ അമേരിക്കയ്ക്ക്​ അനുകൂലം

രണ്ടാം ലോകമഹായുദ്ധാനന്തരം നടന്ന ബ്രെട്ടന്‍വുഡ്സ് ഉച്ചകോടിയില്‍ ജെ.എം. കെയിന്‍സ് എന്ന സാമ്പത്തികശാസ്ത്രജ്ഞന്‍ മുന്നോട്ടുവച്ച ആശയമാണ് ലോകവ്യാപാരം നിയന്ത്രിക്കുന്നതിനായുള്ള ഒരു സംവിധാനം. ലോകബാങ്ക്, അന്തരാഷ്ട്ര നാണയനിധി എന്നിവ 1945-ല്‍ തന്നെ നിലവില്‍വന്നു. എന്നാല്‍, ലോകവ്യാപാരം നിയന്ത്രിക്കുന്നതിനുള്ള  സംവിധാനം 1947-ല്‍  മാത്രമാണ്  ‘ഗാട്ട്’ എന്ന പേരില്‍ നിലവില്‍വന്നത്. ഗാട്ടിൽ തര്‍ക്കപരിഹാരത്തിന്​ സംവിധാനമുണ്ടായിരുന്നില്ല. 1984 മുതല്‍ 1994 വരെ നടന്ന ഉറുഗ്വായ്​ വട്ട ചർച്ചകളുടെ അടിസ്ഥാനത്തിലാണ് ഗാട്ടിനുപകരം ലോക വ്യാപാര സംഘടന രൂപീകരിക്കാന്‍ തീരുമാനിച്ചത്. ജനീവ ആസ്ഥാനമായി രൂപവത്കരിച്ച ലോകവ്യപാരസംഘടനയില്‍ ഇപ്പോള്‍ 164 അംഗങ്ങളാണുള്ളത്. ചരക്കുവ്യാപാരങ്ങളാണ് പ്രധാനമായും ഗാട്ട് നിയന്ത്രിച്ചിരുന്നതെങ്കില്‍ ലോക വ്യാപാര സംഘടന പ്രധാനമായും നിയന്ത്രിക്കുന്നത് സേവനങ്ങള്‍, ബൗദ്ധിക സ്വത്തവകാശങ്ങള്‍ മുതലായവ ആണ്.

sea
വികസ്വര- അവികസിത രാജ്യങ്ങളുടെ താൽപര്യങ്ങൾക്ക്​ വിരുദ്ധമായ നയങ്ങൾ അടിച്ചേല്‍പ്പിക്കാന്‍ ലോകവ്യാപാര സംഘടനയിലൂടെ നിഷ്​പ്രയാസം കഴിയുന്നുണ്ട്. സമീപകാലങ്ങളിൽ സംഘടനയിൽനിന്നുണ്ടായ തീരുമാനങ്ങളെല്ലാം ഇതിനുദാഹരണങ്ങളാണ്​.

ഏഴംഗങ്ങളുള്ള തർക്കപരിഹാര വേദി, ലോക വ്യാപാര സംഘടനയെ അതിന്റെ മുന്‍ഗാമിയായ ഗാട്ടിൽനിന്ന്​ വ്യതിരിക്തമായി നിര്‍ത്തുന്നതായിരുന്നു. തര്‍ക്കപരിഹാര വേദിയിലെ അഞ്ചുപേരെയും കൊടുക്കേണ്ടത് അമേരിക്കയാണ്. ലോകവ്യാപാര സംഘടനയുടെ കിരീടം എന്നാണ് പ്രശ്നപരിഹാര വേദി അറിയപ്പെടുന്നത്. ആ കിരീടം തച്ചുടച്ചാല്‍ മെച്ചം അമേരിക്കക്കാണ്​. ഇപ്പോള്‍ ഒരു അംഗമായി ചുരുങ്ങിയ പ്രശ്‌നപരിഹാര വേദിയുടെ അഭാവത്തില്‍ അന്താരാഷ്ട്രതലത്തിലുള്ള വ്യാപാരയുദ്ധങ്ങളൂം തര്‍ക്കങ്ങളും എങ്ങനെ പരിഹരിക്കപ്പെടും എന്നറിയാതെ ഉഴലുകയാണ് അമേരിക്ക ഒഴിച്ചുള്ള അംഗരാജ്യങ്ങള്‍. പ്രശ്‌നപരിഹാര വേദി മുന്‍മ്പാകെ 592 തര്‍ക്കങ്ങള്‍ക്ക് നാളിതുവരെ പരിഹാരം കണ്ടിട്ടുണ്ട്.

ലോക വ്യാപാരത്തിന്റെ കേവലം രണ്ടുശതമാനമാണ് ഇന്ത്യയുടെ വിഹിതം. എന്നാല്‍ നാളിതുവരെ മറ്റു ലോകരാജ്യങ്ങള്‍ ഇന്ത്യയുമായുള്ള മുപ്പതിലധികം തര്‍ക്കങ്ങള്‍ വേദിക്കുമുന്‍പാകെ എത്തിച്ചിട്ടുണ്ട്. ഇ.യു., അമേരിക്ക, തായ്​വാൻ, ബ്രസീല്‍, ജപ്പാന്‍, ആഫ്രിക്ക, അര്‍ജന്റീന, തുര്‍ക്കി, ആസ്‌ട്രേലിയ, ഗ്വാട്ടിമാല തുടങ്ങിയ രാജ്യങ്ങളുമായി ഇന്ത്യക്ക്​ വ്യാപാര തര്‍ക്കങ്ങളുണ്ട്. ഇതൊക്കെ ഇനി ഏതുനിലയ്ക്ക് പരിഹരിക്കപ്പെടുമെന്നറിയാതെ വലയുകയാണ് ഇന്ത്യയുടെ വാണിജ്യ മന്ത്രാലയം. പ്രശ്‌നപരിഹാര വേദിക്കുമുന്‍പാകെ എത്തിയ ഭൂരിഭാഗം കേസുകളിലും അമേരിക്കയ്ക്കനുകൂലമായാണ് വിധി വന്നിട്ടുള്ളതെന്നാണ് വൈചിത്ര്യം. അടുത്തകാലത്ത്​, നെതര്‍ലാന്‍ഡ് കമ്പനിയായ ‘എയര്‍ ബസി’നെതിരെ, അമേരിക്കന്‍ ബോയിങ് കമ്പനിക്കനുകൂലമായി വന്ന വിധി എടുത്തുപറയേണ്ടതാണ്. 

ബ്ലൂ ബോക്‌സ്, ഗ്രീന്‍ ബോക്‌സ്, ആംബര്‍ ബോക്‌സ് എന്നിങ്ങനെ സബ്‌സിഡിയുമായി ബന്ധപ്പെട്ട നിബന്ധനകള്‍ വ്യാഖ്യാനിച്ച്​ വികസിത രാജ്യങ്ങള്‍ക്കനുകൂലമാക്കി മാറ്റുന്നു എന്നൊരു ആരോപണം തുടക്കം മുതലേ ഉണ്ടായിരുന്നു

അന്തര്‍ദേശീയ കപ്പല്‍ ഗതാഗതം നിയന്ത്രിക്കുന്ന സംഘടന (ഐ.എം.ഒ.) പുതിയ പരിതസ്ഥിതി നിയമങ്ങള്‍ ചരക്കു കടത്തിനുപയോഗിക്കുന്ന കപ്പലുകളില്‍ ബാധകമാക്കിയത് ഇന്ത്യക്കും വലിയ തിരിച്ചടിയായിരിക്കുകയാണ്. ആഗോള വ്യാപാരത്തിന്റെ 90 ശതമാനവും നടക്കുന്നത് കപ്പല്‍ വഴിയാണ്. മൊത്തം ലോക വ്യാപാരമൂല്യത്തിന്റെ 80 ശതമാനത്തിലധികം നടക്കുന്നതും കടല്‍മാര്‍ഗമാണ്. ലണ്ടന്‍ ആസ്ഥാനമായ ഐ.എം.ഒ. വികസിത രാജ്യങ്ങളിലെ കപ്പല്‍ കമ്പനികള്‍ക്കുവേണ്ടി നിയമം ഉണ്ടാക്കുന്നു എന്നൊരു വാദം ഇന്ത്യ ഇതിനകം ഉന്നയിച്ചിട്ടുണ്ട്.

പ്രശ്‌നപരിഹാര വേദിക്കുമുന്‍പാകെ, ലോക വ്യാപാര സംഘടനയുടെ കീഴിലുള്ള  ‘ബോക്‌സ് മെക്കാനിസം’ വലിയൊരു കീറാമുട്ടിയായിരിന്നു. ബ്ലൂ ബോക്‌സ്, ഗ്രീന്‍ ബോക്‌സ്, ആംബര്‍ ബോക്‌സ് എന്നിങ്ങനെ സബ്‌സിഡിയുമായി ബന്ധപ്പെട്ട നിബന്ധനകള്‍ വ്യാഖ്യാനിച്ച്​ വികസിത രാജ്യങ്ങള്‍ക്കനുകൂലമാക്കി മാറ്റുന്നു എന്നൊരു ആരോപണം തുടക്കം മുതലേ ഉണ്ടായിരുന്നു. ഇതിനുപുറമേ, ബൗദ്ധിക സ്വത്തവകാശ തര്‍ക്കങ്ങളും പൊതിയാത്തേങ്ങയായി തുടരുകയാണ്. കോപ്പിറൈറ്റ്, പേറ്റൻറ്, ട്രേഡ്മാര്‍ക്ക്, ട്രേഡ് സീക്രട്ട്​, ഭൗമസൂചിക, സോഫ്റ്റ്​വെയർ തുടങ്ങിയ പ്രശ്‌നങ്ങള്‍ കൈകാര്യം ചെയ്യാന്‍ ട്രിപ്​സ്​ എന്നൊരു കരാറും ലോകവ്യാപാര സംഘടനയിലുണ്ട്. എന്നാല്‍ ഇതെല്ലാം വികസിത രാജ്യങ്ങള്‍ക്കു വേണ്ടിയുള്ളതെന്നാണ് ഇന്ത്യ അടക്കമുള്ള വികസ്വര രാഷ്ട്രങ്ങളുടെ അനുഭവം.

sea
photo/prasoonkiran

നൈജീരിയന്‍ സാമ്പത്തിക ശാസ്ത്രജ്ഞയായ ഇന്‍ഗോസി ഒകോന്‍ജോ ഇവേലയാണ് ഡബ്ലു.ടി.ഒ. തലപ്പത്ത്. ലോകബാങ്ക് ചുമതലയിലും നൈജീരിയയുടെ ധനമന്ത്രിയായും 25 വര്‍ഷത്തെ പ്രവര്‍ത്തനപരിചയമുള്ള വ്യക്തി കൂടിയാണ് ഇന്‍ഗോസി. 164 രാജ്യങ്ങളുടെ ഈ കൂട്ടായ്മയെ ആദ്യമായി നയിക്കുന്ന വനിതയും ആഫ്രക്കന്‍ വംശജയും എന്ന ബഹുമതിയും ഇന്‍ഗോസിക്കു സ്വന്തം. യു.എസ്.-ചൈന സംഘര്‍ഷത്തെ തുടര്‍ന്ന് അന്താരാഷ്ട്ര വ്യാപാര ചര്‍ച്ചകള്‍ പുനരുജ്ജീവിപ്പിക്കുക, വ്യാപാരനിയമങ്ങള്‍ പരിഷ്‌കരിക്കുക തുടങ്ങിയ ഭാരിച്ച ഉത്തരവാദിത്വങ്ങളാണ് ഒകോന്‍ജോയെ കാത്തിരിക്കുന്നത്.  

 


വായനക്കാര്‍ക്ക് ട്രൂകോപ്പി വെബ്സീനിലെ ഉള്ളടക്കത്തോടുള്ള പ്രതികരണങ്ങള്‍ letters@truecopy.media എന്ന മെയിലിലോ ട്രൂകോപ്പിയുടെ സോഷ്യല്‍ മീഡിയ പ്ലാറ്റ്‌ഫോമുകളിലൂടെയോ അറിയിക്കാം.

ഡോ. സന്തോഷ് മാത്യു

പോണ്ടിച്ചേരി സെൻട്രൽ യൂണിവേഴ്​സിറ്റിയിലെ സെൻറർ ഫോർ സൗത്ത്​ ഏഷ്യൻ സ്​റ്റഡിയിൽ അസിസ്​റ്റൻറ്​ പ്രൊഫസർ. 

 

Audio