Friday, 26 November 2021

കുറ്റവും ശിക്ഷയും: സാമൂഹ്യശാസ്​ത്ര വായന


Text Formatted

തിരുനെല്ലിയിലെ ആദിവാസി കൂരയില്‍
​​​​​​​ഞാന്‍ ഡോസ്‌റ്റോയെവ്‌സ്‌കിയെ കണ്ടു

തിരുനെല്ലിയിലെ ആദിവാസി കൂരകളില്‍ ഞാന്‍ കണ്ട, പ്രായപൂര്‍ത്തിയായ കുട്ടികള്‍ക്കുപോലും നാണം മറയ്ക്കാന്‍ വസ്ത്രമുണ്ടായിരുന്നില്ല. 'കുറ്റവും ശിക്ഷയും' എന്ന നോവലില്‍ വായിച്ച ഒരു ദൃശ്യമാണ് കണ്‍മുന്നിലെന്ന ബോധ്യം എന്നെ നിശ്ശബ്ദനാക്കിക്കളഞ്ഞു. എന്നെ രൂപപ്പെടുത്തിയ കാഴ്ചകളില്‍ ഒന്നായിരുന്നു ഇത്- ഡോസ്​റ്റോയെവ്​സ്​കി വായനയിലെ തീവ്രമായ ഒരു സന്ദർഭം.

Image Full Width
Image Caption
ഫെയ്‌ദോര്‍ ഡോസ്റ്റോയെവ്‌സ്‌കി
Text Formatted

ഴുപതുകളുടെ മധ്യം. 
വയനാട്ടിലെ തിരുനെല്ലിയില്‍ പട്ടിണി മരണമുണ്ടായി. 
കോഴിക്കോട് മെഡിക്കല്‍ കോളേജിലെ ഡോക്ടര്‍മാരടങ്ങുന്ന വസ്തുതാന്വേഷണസംഘം അത് പോഷകാഹാരക്കുറവുമൂലമാണെന്ന റിപ്പോര്‍ട്ടാണ് നല്‍കിയത്. എന്നാല്‍, വസ്തുത അറിയാന്‍ എനിക്ക് താല്‍പര്യമുണ്ടായി, അങ്ങനെ തിരുനെല്ലിയിലേക്കുപോയി. 
കര്‍ക്കടകത്തിലെ കൊടും മഴ. മരണം നടന്ന സ്ഥലത്ത് ഏതാനും കൂരകളുണ്ട്. 
ഉച്ചനേരമാണ്. രണ്ടുമണിയായിക്കാണും. ഒരു ആദിവാസി സ്ത്രീ വട്ടക്കുട ചൂടി ഒക്കത്ത് ഒരു കുട്ടിയെയും എടുത്തുവരുന്നു. കൈയില്‍ ഒരു പാത്രത്തില്‍ കഞ്ഞിയും ചോറുമല്ലാത്ത എന്തോ അല്‍പം ഭക്ഷണമുണ്ട്. ഇത് കണ്ടപ്പോള്‍ ആ കൂരകളിലെ കുട്ടികള്‍ കാണിച്ച ഒരുതരം തിടുക്കം എന്നെ ഞെട്ടിച്ചു. 

dostoevsky
"ഞാനിപ്പോള്‍ മുട്ടുകുത്തിയത് നിന്റെ കാല്‍ക്കലല്ല, ലോകത്തിലെ മനുഷ്യരാശിയുടെ ക്ലേശങ്ങള്‍ക്കുമുന്നിലാണ്?'' /ഫോട്ടോ : ദി റഷ്യന്‍ ആര്‍ട്സ് തീയേറ്റര്‍ ആന്‍റ് സ്റ്റുഡിയോ

പെട്ടെന്ന് ഒരു രംഗം ഓര്‍ത്തു, അപ്പോള്‍ വായിച്ചുകൊണ്ടിരുന്ന ഡോസ്​റ്റോയെവ്‌സ്‌കിയുടെ  "കുറ്റവും ശിക്ഷയും' എന്ന നോവലിലെ രംഗം. ആ സമയത്ത് ഈ നോവല്‍ എന്റെ കൈവശമുണ്ടായിരുന്നു.
കഥാനായകന്‍ റസ്‌കോള്‍ നിക്കോവ് തനിക്ക് സ്​നേഹമുണ്ടായിരുന്ന സോന്യയുടെ വീട്ടിലെത്തുന്നു. പിതാവിന്റെ മദ്യപാനത്തില്‍ തകര്‍ന്ന കുടുംബം. പട്ടിണി മാറ്റാന്‍ ശരീരം വില്‍ക്കേണ്ടിവന്ന പെണ്‍കുട്ടിയാണ് സോണിയ. 
നാണം മറയ്ക്കാന്‍ വേണ്ട വസ്ത്രമില്ലാത്ത കുട്ടികളെ അയാള്‍ അവളുടെ വീട്ടില്‍ കണ്ടു. അയാള്‍ അടുക്കളയിലെത്തി ഓരോ പാത്രവും തുറന്നുനോക്കുമ്പോള്‍ അവയെല്ലാം ശൂന്യമായിരുന്നു.
പെട്ടെന്ന് അയാള്‍ മുട്ടുകുത്തിനിന്ന് സോന്യയുടെ പാദങ്ങള്‍ തൊടുന്നു.
""നിങ്ങള്‍ എന്താണ് ചെയ്യുന്നത്, അതും എന്നെപ്പോലുള്ള ഒരുവളോട്...?'', സോണിയ ചോദിക്കുന്നു.
""ഞാനിപ്പോള്‍ മുട്ടുകുത്തിയത് നിന്റെ കാല്‍ക്കലല്ല, ലോകത്തിലെ മനുഷ്യരാശിയുടെ ക്ലേശങ്ങള്‍ക്കുമുന്നിലാണ്?'' 

1866ലാണ് "കുറ്റവും ശിക്ഷയും' പുറത്തുവന്നത്. ഇപ്പോഴും അതിന്റെ പ്രസക്തിയും പ്രാധാന്യവും നഷ്ടമായിട്ടില്ല. ഈ നോവല്‍ നല്‍കുന്ന സന്ദേശം കാലാതീതവും ദേശാതീതവുമാണ്.

തിരുനെല്ലിയിലെ ആദിവാസി കുട്ടിയുടെ മരണം പട്ടിണി മൂലം തന്നെയാണെന്ന് എനിക്ക് പ്രഥമദൃഷ്ട്യാ മനസ്സിലാക്കാന്‍ കഴിഞ്ഞു. ആദിവാസി കൂരകളില്‍ ഞാന്‍ കണ്ട, പ്രായപൂര്‍ത്തിയായ കുട്ടികള്‍ക്കുപോലും നാണം മറയ്ക്കാന്‍ വസ്ത്രമുണ്ടായിരുന്നില്ല. നോവലില്‍ വായിച്ച ഒരു ദൃശ്യമാണ് കണ്‍മുന്നിലെന്ന ബോധ്യം എന്നെ നിശ്ശബ്ദനാക്കിക്കളഞ്ഞു. 
എന്നെ രൂപപ്പെടുത്തിയ കാഴ്ചകളില്‍ ഒന്നായിരുന്നു ഇത്. 
1866ലാണ് "കുറ്റവും ശിക്ഷയും' പുറത്തുവന്നത്. ഇപ്പോഴും അതിന്റെ പ്രസക്തിയും പ്രാധാന്യവും നഷ്ടമായിട്ടില്ല. ഈ നോവല്‍ നല്‍കുന്ന സന്ദേശം കാലാതീതവും ദേശാതീതവുമാണ്.
ഇത്ര മനസ്സില്‍ തട്ടി വായിച്ച വേറൊരു പുസ്തകമില്ല. വൈകാരികമായി എന്നെ സ്വാധീനിച്ച പുസ്തകമാണിത്. 

dostoevsky

ഈ നോവലിന്റെ ഇതിവൃത്തം ദാരിദ്ര്യവും ഇന്‍ഇക്വാലിറ്റിയുമാണ്. ദരിദ്രരും അല്ലാത്തവരും തമ്മിലുള്ള അന്തരം. നോവലിലെ കേന്ദ്ര കഥാപാത്രം റസ്‌കോള്‍ നിക്കോവ് വളരെ സെന്‍സിറ്റീവായ ഗവേഷകനാണ്. ആദര്‍ശവാന്‍. ഒരു വൃദ്ധയുടെ വീട്ടിലാണ് അദ്ദേഹം വാടകയ്ക്ക് താമസിക്കുന്നത്. ഇയാള്‍ക്ക് ഇവരോട് സ്‌നേഹമാണ്. സ്വര്‍ണപ്പണയത്തില്‍ കടം കൊടുക്കുന്നവരാണ് ഈ വൃദ്ധ. ഇവര്‍ സ്വര്‍ണം കുന്നുകൂട്ടിവച്ചിരിക്കുകയാണ്. പാവപ്പെട്ടവരില്‍നിന്ന് സ്വര്‍ണം വാങ്ങി പണം കടം കൊടുക്കുകയാണിവര്‍. 
ദാരിദ്ര്യം ഇത്ര മൂര്‍ത്തമായി പ്രതിപാദിക്കുന്ന നോവല്‍ വേറെയില്ല. ദാരിദ്ര്യത്തിന്റെ നിര്‍വചനത്തിനും ദാരിദ്ര്യത്തിന്റെ പരിമാണം അളക്കാനും അതിന്റെ കാഠിന്യം കുറയ്ക്കാനുള്ള മാര്‍ഗങ്ങള്‍ക്കുമായി ആധുനിക കാലഘട്ടത്തില്‍ ഭരണാധികാരികളും സാമ്പത്തിക വിദഗ്ധരും എത്രയോ സമയമാണ് ചെലവഴിച്ചിട്ടുള്ളത്. എന്നാല്‍, ശാശ്വതമായി ദാരിദ്ര്യം പരിഹരിക്കാനുള്ള പരിപാടികളൊന്നും ഇവയിലുണ്ടാകില്ല. ദരിദ്രര്‍ക്ക് സ്വത്തുടമസ്ഥാവകാശം നല്‍കണം, ഉല്‍പാദകഘടങ്ങളില്‍ ഉടമസ്ഥാവകാശവും നിയന്ത്രണവും വേണം- ഇങ്ങനെ പറയില്ല. Poverty is not going because the hungry are not angry. hungry ആയവര്‍ angry ആയാല്‍ ദാരിദ്ര്യം എളുപ്പം പോകുന്നതേയുള്ളൂ. ഈ അവസ്ഥയുണ്ടാകാതിരിക്കാന്‍ ഭരണാധികാരികളും സമ്പത്ത് നിയന്ത്രിക്കുന്നവരും പല തന്ത്രങ്ങളും പയറ്റും. ഇത്തരം പ്രശ്‌നങ്ങളിലേക്കാണ് ഈ നോവലിന്റെ വായന അന്തിമമായി കൊണ്ടെത്തിക്കുന്നത്. 

സ്‌റ്റേറ്റ് എന്നാല്‍ പവര്‍ ആണ്, അധികാരം എപ്പോഴും ശിക്ഷിക്കാന്‍ ഉപയോഗിക്കുന്നതുകൊണ്ടാണ് പലപ്പോഴും സമൂഹത്തില്‍ വലിയ പ്രശ്‌നങ്ങളുണ്ടാകുന്നത്.

റസ്‌കോള്‍ നിക്കോവിന്​ സോണിയയോട്​ സ്​​നേഹമുണ്ട്​. 
നിനക്കെന്താണ് ജോലി എന്നയാള്‍ ചോദിക്കുമ്പോള്‍ പ്രോസ്റ്റിറ്റ്യൂട്ടാണ് എന്നവള്‍ മറുപടി പറയുന്നു. ഇയാളുടെ മധ്യവര്‍ഗ മൊറാലിറ്റി വച്ചുകൊണ്ട്-ദരിദ്രരെ നിയന്ത്രിക്കുന്നത് മധ്യവര്‍ഗ മൊറാലിറ്റിയാണ്- നിനക്ക് ഇങ്ങനെ പറയുന്നതില്‍ ലജ്ജയില്ലേ എന്നയാള്‍ ചോദിക്കുന്നു. 
അതിനവള്‍ മറുപടി പറയുന്നില്ല. മിഡില്‍ ക്ലാസ് മൊറാലിറ്റിയെ പോലുള്ള മാനദണ്ഡം വച്ചുകൊണ്ട് എല്ലാ സാമൂഹിക സാഹചര്യങ്ങളെയും അളക്കരുത്. ഒരു അയഞ്ഞ സമീപനമാണ് ആവശ്യം. നമ്മുടെ മൂല്യബോധമാണ് ശരി എന്നത് അപകടങ്ങള്‍ വരുത്തും. 

ശിക്ഷ തെറ്റിനുള്ളതല്ല, കുറ്റത്തിനുള്ളതാണ്. നമ്മുടെ കുട്ടികള്‍ തെറ്റുചെയ്താല്‍ അതിനെ തിരുത്തുകയാണ്, ശിക്ഷിക്കുകയല്ല ചെയ്യേണ്ടത്. തെറ്റ് വരുത്തിയ കുട്ടികളെ ശിക്ഷിക്കുന്നത് അടിസ്ഥാനപരമായി മൂല്യബോധമില്ലാത്ത രക്ഷിതാക്കളും അധ്യാപകരുമാണ്.
കുറ്റം ചെയ്തവര്‍ ശിക്ഷ അനുഭവിക്കണം. ശിക്ഷയില്‍നിന്ന് രക്ഷപ്പെടാന്‍ പറ്റിയേക്കും, എന്നാല്‍, മനഃസാക്ഷി എപ്പോഴും നമ്മെ വേട്ടയാടിക്കൊണ്ടിരിക്കും. നമുക്ക് ഒന്നിലും ശ്രദ്ധ കേന്ദ്രീകരിക്കാന്‍ പറ്റില്ല, ഭാവി ജീവിതത്തിന് ദിശാബോധം നല്‍കാനാകില്ല. കുറ്റം ചെയ്തവര്‍ ശിക്ഷിക്കപ്പെട്ടാലേ അവര്‍ കറക്ട് ചെയ്യപ്പെടൂ. 
കുറ്റത്തിന്റെ കാഠിന്യമനുസരിച്ചാണല്ലോ ശിക്ഷ വിധിക്കുന്നത്. അതൊരു അനിവാര്യതയാണ്. എന്നാല്‍ ഇവിടെ മൗലികമായ ഒരു പ്രശ്‌നമുയര്‍ന്നുവരുന്നു. സ്‌റ്റേറ്റ് എന്നാല്‍ പവര്‍ ആണ്, അധികാരം എപ്പോഴും ശിക്ഷിക്കാന്‍ ഉപയോഗിക്കുന്നതുകൊണ്ടാണ് പലപ്പോഴും സമൂഹത്തില്‍ വലിയ പ്രശ്‌നങ്ങളുണ്ടാകുന്നത്. നീതിയെക്കുറിച്ച് പറയാറുണ്ടല്ലോ. അധികാരം നീതിയോടൊപ്പമല്ല. അത് ശക്തിയോടൊപ്പമാണ്. അതുകൊണ്ട് അധികാരികള്‍ പലപ്പോഴും ശക്തന്മാരുടെ കൂടെയാണ്, അശക്തന്മാരുടെ കൂടെയല്ല.

dostoevsky

പാവപ്പെട്ട ഒരാളുടെ കുഞ്ഞിന്റെ ഓപ്പറേഷന് ഒരു ലക്ഷം രൂപ വേണം. ആളുകള്‍ അയാള്‍ക്ക് നൂറോ ഇരുനൂറോ രൂപ കൊടുക്കും. പിന്നെയാരും ശ്രദ്ധിക്കില്ല. ക്ഷമകെട്ട് അയാള്‍ ഒരുലക്ഷം രൂപ എവിടെനിന്നെങ്കിലും എടുക്കുന്നു എന്നിരിക്കട്ടെ. രണ്ടുമൂന്നു മിനിറ്റിനകം പൊലീസും ഉദ്യോഗസ്ഥരും അവിടെയെത്തും. ഭരണാധികാരികള്‍ പ്രസ്താവനയിറക്കും, ഇത്തരം കുറ്റകൃത്യങ്ങള്‍ അനുവദിക്കാനാവില്ല എന്നു പറഞ്ഞ്. വിപരീതദിശയില്‍ ചക്രം എത്ര പെട്ടെന്നാണ് ചലിക്കുന്നത് എന്നു നോക്കുക. കാരണം, അധികാരം സമ്പന്നനെയും ശക്തനെയും സംരക്ഷിക്കാനുള്ളതാണ്.

1884-ലാണ് ഏംഗല്‍സ് The Origin of the Family, Private Property and the State എഴുതുന്നത്. അദ്ദേഹം പറയുന്നുണ്ട്, ഭരണകൂടം സമ്പന്നരെയും ശക്തരെയും സംരക്ഷിക്കാനുള്ളതാണ് എന്ന്. ആരില്‍നിന്ന്? പാവങ്ങളില്‍നിന്ന്, ദരിദ്രരില്‍നിന്ന്, ചൂഷിതരില്‍നിന്ന്. ഏതെങ്കിലും ഒരു സര്‍ക്കാര്‍, തങ്ങള്‍ പാവങ്ങള്‍ക്കൊപ്പമാണ് എന്നു പറഞ്ഞാല്‍ നാം ആ സര്‍ക്കാറിന്റെ സത്യസന്ധതയെയാണ് സംശയിക്കേണ്ടത്. നീതി ദരിദ്രര്‍ക്കും ദുര്‍ബലര്‍ക്കും വേണ്ടിയുള്ളതല്ല.
ഈ നോവലിന്റെ വായനയില്‍നിന്ന് ലഭിക്കുന്ന മൗലികമായ, ഘടനാപരമായ ഒരു സന്ദേശമെന്നു പറയുന്നത്, സമൂഹത്തില്‍ വൈരുധ്യം നിറഞ്ഞുനില്‍ക്കുമ്പോള്‍ അവ മൂര്‍ച്ഛിക്കാതിരിക്കാന്‍ ഭരണകൂടങ്ങള്‍ ശ്രദ്ധിക്കേണ്ടതുണ്ട് എന്നതാണ്. സമൂഹത്തിന് അതിന്റേതായ ഡൈനമിക്‌സുണ്ട്.

സമ്പത്ത് ആവശ്യമില്ലാത്തവരില്‍നിന്ന് എടുത്ത് ആവശ്യമുള്ളവര്‍ക്ക് വിതരണം ചെയ്യുന്നതിനുപകരം ആഗോള മുതലാളിത്തത്തെക്കുറിച്ചൊക്കെയാണ് ഭരണകൂടങ്ങള്‍ സംസാരിക്കുക. ഇത് സാധാരണക്കാര്‍ക്ക് ഗോചരമല്ലാത്ത കാര്യങ്ങളാണ്.

സമൂഹത്തിന്റേതായ ചാലകശക്തികള്‍ പ്രവര്‍ത്തിക്കുമ്പോള്‍, ഭരണാധികാരികളും സമ്പന്നരും പറയും, അത് ആഭ്യന്തര സുരക്ഷയ്ക്ക് ഭീഷണിയാണ് എന്ന്. മന്‍മോഹന്‍ സിങാണ് പ്രധാനമന്ത്രിയായിരുന്നപ്പോഴാണ് ഈ പരാമര്‍ശം കോയിന്‍ ചെയ്തത്. ഭരണവര്‍ഗത്തിനുള്ളതാണ് ഈ ഭീഷണി. ഇത്തരം പ്രകടമായ വൈരുധ്യങ്ങള്‍ ഉണ്ടാകാതിരിക്കാന്‍ ഭരണകൂടം ശ്രദ്ധിക്കണം. സമ്പത്ത് ആവശ്യക്കാര്‍ക്ക് വീതിച്ചുകൊടുക്കേണ്ടതാണ്. മതസ്ഥാപനങ്ങളും തോട്ടങ്ങളും രാഷ്ട്രീയ പാര്‍ട്ടികളും മറ്റുമാണ് സമ്പത്ത് കൈയടക്കിവച്ചിരിക്കുന്നത്. ദരിദ്രരും ചൂഷിതരും മര്‍ദിതരും സമ്പത്തില്ലാതെ വിഷമിക്കുന്നു. സമ്പത്ത് ആവശ്യമില്ലാത്തവരില്‍നിന്ന് എടുത്ത് ആവശ്യമുള്ളവര്‍ക്ക് വിതരണം ചെയ്യുന്നതിനുപകരം ആഗോള മുതലാളിത്തത്തെക്കുറിച്ചൊക്കെയാണ് ഭരണകൂടങ്ങള്‍ സംസാരിക്കുക. ഇത് സാധാരണക്കാര്‍ക്ക് ഗോചരമല്ലാത്ത കാര്യങ്ങളാണ്. അട്ടപ്പാടിയിലെ മധു വിശന്നപ്പോള്‍ ഭക്ഷണമെടുത്ത് കഴിച്ചുവെന്നുപറഞ്ഞ് തല്ലിക്കൊന്നു. അയാളുടെ ദാരിദ്ര്യം മുകേഷ് അംബാനിക്ക് സമ്പത്ത് കുന്നുകൂടിയതുകൊണ്ട് സംഭവിച്ചതല്ല. വാളയാറിലെ അമ്മക്ക് നീതി നിഷേധിക്കപ്പെട്ടത് കാലാവസ്ഥാ വ്യതിയാനം കൊണ്ടല്ല. കുറ്റവും ശിക്ഷയും എന്ന നോവലില്‍നിന്ന് വളരെ ബുദ്ധിപൂര്‍വം വായിച്ചെടുക്കേണ്ട കാര്യങ്ങളാണിവ.

dostoevsky
ആള്‍ക്കൂട്ടം തല്ലിക്കൊന്ന അട്ടപ്പാടിയിലെ ആദിവാസി യുവാവ് മധു

റസ്‌കോള്‍ നിക്കോവിന്​ വൃദ്ധയോട് യാതൊരു പകയുമില്ല. പകരം, സ്‌നേഹമാണ്, ബഹുമാനമാണ്. പക്ഷെ, ഇയാളുടെ മുന്നില്‍ പ്രത്യക്ഷപ്പെടുന്ന വൈരുധ്യം ഈ വ്യക്തിയിലൂടെയാണ്. ഇത് നാം മനസ്സിലാക്കണം. ഇന്ധനവില കൂടുമ്പോള്‍ സാധാരണക്കാരന് ഓട്ടോറിക്ഷക്കാരനോടാണ് ദേഷ്യം തോന്നുക, അയാളോടാണ് അത് പ്രകടിപ്പിക്കുക. എന്നാല്‍, ഓട്ടോറിക്ഷക്കരനല്ല വിലക്കയറ്റത്തിനുകാരണം. ദേശീയവും അന്തര്‍ദേശീയവുമായ ചൂഷകശക്തികളാണ് ഇതിനുപിന്നില്‍, ഈ സാധാരണക്കാരനായ ഓട്ടോറിക്ഷക്കാരന്‍ നിസ്സഹായനാണ് എന്നുമനസ്സിലാക്കാനുള്ള വിശകലനാത്മകമായ ബുദ്ധി സാധാരണക്കാരനില്ല. 
അസമത്വങ്ങള്‍ സമൂഹത്തിലെ ഹാര്‍മണി ഇല്ലാതാക്കുകയും അതുവഴി മാനവികത തന്നെ നഷ്ടമാകുകയും ചെയ്യുന്നു. ഇവിടെ, റസ്‌കോള്‍ നിക്കോവിനെ സംബന്ധിച്ച് ആ വൃദ്ധയാണ് ഇതിന്റെ കാരണം. അതുകൊണ്ടാണ് അയാള്‍ ഇവരെ കൊല്ലുന്നത്. എന്നിട്ട് സ്വര്‍ണമെടുത്ത് പാവപ്പെട്ടവര്‍ക്ക് വീതിച്ചുകൊടുക്കുകയാണ്. ഇതിനുള്ള അവസരം വ്യവസ്ഥിതിയുടെ നിയന്ത്രണം കൈയാളുന്നവരുണ്ടാക്കരുത്. വ്യവസ്ഥിതി തന്നെയാണ് കുറ്റകരമായ സാഹചര്യങ്ങളെയും കുറ്റവാളികളെയും സൃഷ്ടിക്കുന്നത്. എന്നിട്ട് അവര്‍ തന്നെ കുറ്റവാളികളെ ശിക്ഷിക്കുന്നു. കുറ്റവാളികള്‍ അറിഞ്ഞുകൊണ്ട് ചെയ്യുന്നതല്ല കുറ്റകൃത്യം. കുറ്റകൃത്യങ്ങള്‍ക്കുള്ള സാമൂഹികാവസ്ഥ സൃഷ്ടിച്ചശേഷം കുറ്റവാളികളെ ശിക്ഷിക്കുക. മനുഷ്യാവകാശ പ്രവര്‍ത്തകന്‍ കെ.ജി. കണ്ണാബിരാന്‍ മദ്രാസ് ഹൈകോടതിയില്‍ ഒരു കേസ് വാദിക്കുമ്പോള്‍ പറഞ്ഞു; നിയമമാണ് കുറ്റം നിര്‍വചിക്കുന്നത്, പക്ഷെ, കുറ്റവാളിയെ നിശ്ചയിക്കുന്നത് ഭരണകൂടമാണ്. 

സമ്പന്നന്റെ സമ്പത്തുണ്ടാക്കുന്നത് തൊഴിലാളികളാണ്. പാവപ്പെട്ടവരുടെ ദാരിദ്ര്യം സൃഷ്ടിക്കുകയും അതിനെ പുനര്‍സൃഷ്ടിക്കുകയും അതിനെ ശാശ്വതീകരിക്കുകയും ചെയ്യുന്നത് ഈ പാവപ്പെട്ടവര്‍ തന്നെയാണ്.

എന്റെ ചെറുപ്പത്തില്‍, ദാരിദ്ര്യവും വിവേചനവുമെല്ലാം തികച്ചും സ്വഭാവികതയോടെയാണ് അനുഭവിച്ചിരുന്നത്, ഒട്ടും പരാതിയില്ലാതെ. വിധിയാണെന്ന മട്ടില്‍. എന്നാല്‍ അത് വിധിയല്ല, സാമൂഹികസൃഷ്ടിയാണ് എന്ന് തിരിച്ചറിയുന്നത് ഇത്തരം പുസ്തകങ്ങളുടെ വായനകളിലൂടെയാണ്. ദാരിദ്ര്യവും സമ്പത്തും ഒരേ ശക്തികളും ഒരേ പ്രക്രിയകളുമാണ് സൃഷ്ടിക്കുന്നത് എന്നാണ് മാര്‍ക്‌സ് പറഞ്ഞത്. ദാരിദ്ര്യം സൃഷ്ടിക്കപ്പെടുന്നത് സമ്പത്ത് കുന്നുകൂട്ടുന്ന ശക്തികളാല്‍ തന്നെയാണ്. സമ്പന്നന്റെ സമ്പത്തുണ്ടാക്കുന്നത് തൊഴിലാളികളാണ്. പാവപ്പെട്ടവരുടെ ദാരിദ്ര്യം സൃഷ്ടിക്കുകയും അതിനെ പുനര്‍സൃഷ്ടിക്കുകയും അതിനെ ശാശ്വതീകരിക്കുകയും ചെയ്യുന്നത് ഈ പാവപ്പെട്ടവര്‍ തന്നെയാണ്. പാവപ്പെട്ടവര്‍ സമ്പന്നര്‍ക്ക് സമ്പത്തുണ്ടാക്കുന്നുവെന്നുമാത്രമല്ല, അവരുടെ പാവപ്പെട്ട അവസ്ഥ സൃഷ്ടിക്കുകയും പുനര്‍സൃഷ്ടിക്കുകയും ചെയ്യുന്നു. അതുകൊണ്ടാണ് പാവപ്പെട്ടവര്‍ അവരെ തന്നെ പുനര്‍നിര്‍വചിക്കേണ്ട അവസ്ഥയുണ്ടാകുന്നത്. 

സാമൂഹിക ശാസ്ത്രജ്ഞന്മാര്‍ കാര്യങ്ങളെ അപഗ്രഥിക്കുന്നത് കാര്യകാരണങ്ങള്‍- സിദ്ധാന്തം, മെത്തഡോളജി വച്ചുകൊണ്ടാണ്. ഇതൊന്നും ക്രിയേറ്റീവല്ല, ക്രിയേറ്റീവ് തിങ്കിങ് വരുന്നത് സാഹിത്യത്തില്‍നിന്നാണ്. അമേരിക്കന്‍ ഫിലോസഫറായ മാര്‍ത്ത നുസ്‌ബോം (Martha Craven Nussbaum) പറഞ്ഞുവല്ലോ, ചരിത്രത്തിലെ ഏറ്റവും പ്രധാനപ്പെട്ട വിദ്യാഭ്യാസ ചിന്തകന്‍ സോക്രട്ടീസ് ആയിരുന്നു എന്ന്. അദ്ദേഹം ചോദ്യം ചോദിക്കുകയാണ്, ഉത്തരം കണ്ടെത്തുകയല്ല ചെയ്തത്.

dostoevsky
രവീന്ദ്രനാഥ ടാഗോർ

ഇന്ത്യയില്‍ അവര്‍ പറയുന്നത് ഏറ്റവും പ്രധാനപ്പെട്ട വിദ്യാഭ്യാസ ചിന്തകന്‍ ടാഗോറായിരുന്നു എന്നാണ്, കാരണം, അദ്ദേഹം പ്രാധാന്യം നല്‍കിയത് കലയ്ക്കായിരുന്നു. നിങ്ങള്‍ക്ക് ഒരു ഇക്കണോമിസ്റ്റിനെ ഉണ്ടാക്കാന്‍ കഴിയും, ഒരു സംഗീതജ്ഞനെ ഉണ്ടാക്കാന്‍ കഴിയില്ല. ഇതാണ് ക്രിയേറ്റിവിറ്റിയുടെ സ്രോതസ്സ്. വൈജ്ഞാനിക സാഹിത്യം ക്രിയേറ്റിവിറ്റിയുടെ നിദാനമല്ല. ഞാനൊരു സോഷ്യല്‍ സയന്റിസ്റ്റാണ്, അതുമായി ബന്ധപ്പെട്ട കാര്യങ്ങള്‍ മനസ്സിലാക്കാന്‍ കഴിയും. എന്നാല്‍, എനിക്കൊരു കവിയുടെ ഭാവനയില്ല. 

സാമൂഹികശാസ്​ത്രപരമായ കാഴ്​ചപ്പാടിൽനിന്നുകൊണ്ടാണ്​ ഈ വായന നടത്തിയത്​. കുറ്റവും ശിക്ഷയും നൽകിയ ഒരു ഉൾക്കാഴ്​ച എന്നത്​, കാണാൻ കണ്ണുകൾ മാത്രം പോരാ, ഹൃദയവും വേണം എന്നതായിരുന്നു. കണ്ണുകൾ കൊണ്ട്​ നോക്കാൻ മാത്രമേ കഴിയൂ, ആ നോട്ടം ഉള്ളിൽ പതിയണമെങ്കിൽ ഒരു ഹൃദയം കൂടി ആവശ്യമാണ്​ എന്ന സന്ദേശമാണ്​ ഈ നോവൽ എനിക്കു നൽകിയത്​. 
ഈ നോവല്‍ നല്‍കുന്ന സന്ദേശങ്ങളുടെ സാംഗത്യം ഇനിയും നഷ്ടമായിട്ടില്ല. അതുവെച്ച് നമ്മുടെ ആധുനിക ജീവിതശൈലി രൂപപ്പെടുത്താന്‍ കഴിയും. അതാണ് കുറ്റവും ശിക്ഷയും എന്ന നോവലിന്റെ പ്രാധാന്യം. 


വായനക്കാര്‍ക്ക് ട്രൂകോപ്പി വെബ്‌സീനിലെ ഉള്ളടക്കത്തോടുള്ള പ്രതികരണങ്ങള്‍ letters@truecopy.media എന്ന വിലാസത്തിലേക്ക് അയക്കാം.​​​​​​​

എം. കുഞ്ഞാമന്‍

പ്രമുഖ സാമ്പത്തികശാസ്​ത്ര വിദഗ്​ധൻ. സബാൾട്ടൻ സ്​റ്റഡീസിൽ മൗലിക അന്വേഷണം നടത്തുന്ന ചിന്തകൻ. മഹാരാഷ്​ട്രയിലെ തുൽജാപുരിൽ ടാറ്റ ഇൻസ്​റ്റിറ്റ്യൂട്ട്​ ഓഫ്​ സോഷ്യൽ സയൻസസിൽ പ്രഫസറായിരുന്നു. ഇപ്പോൾ നെൽസൺ മണ്ടേല ചെയർ പ്രൊഫസർ, എം.ജി യൂണിവേഴ്​സിറ്റി. ​​​​​​​Development of Tribal Economy, State Level Planning In India, Globalization: A Subaltern Perspective, Economic Development and Social change, കേരളത്തിന്റെ വികസന പ്രതിസന്ധി, എതിര്​: ചെറോണയുടെയും അയ്യപ്പന്റെയും മകന്റെ  ജീവിതസമരം എന്നിവയാണ്​ പ്രധാന കൃതികൾ.

Audio

PLEASE USE TRUECOPY WEBZINE APP FOR BETTER READING EXPERIENCE.

DOWNLOAD IT FROM