Monday, 18 October 2021

വിദ്യാർഥികളും കോവിഡും


Text Formatted

സ്‌കൂളുകള്‍ ഇനിയും അടഞ്ഞുകിടക്കേണ്ടതുണ്ടോ കേരളത്തില്‍?

വിദ്യാഭ്യാസത്തിന്റെ ഭാവിയെക്കുറിച്ചുള്ള സൂചനകള്‍ ഒന്നും നല്‍കാതെ വിദ്യാര്‍ത്ഥികളെയും അധ്യാപകരെയും രക്ഷിതാക്കളെയും ഒന്നരവര്‍ഷത്തിനുശേഷവും ഇരുട്ടില്‍നിര്‍ത്തുന്നത് ഒരു പുരോഗമന സമൂഹത്തിന്​ ഗുണകരമല്ല

Image Full Width
Image Caption
ഫോട്ടോ: മുഹമ്മദ് ഹനാന്‍
Text Formatted

വിദ്യാഭ്യാസത്തിന്റെ ഭാവിയെക്കുറിച്ചുള്ള അന്താരാഷ്ട്ര കമീഷന്‍ (International Commission on the Futures of Education) പുറത്തിറക്കിയ റിപ്പോര്‍ട്ട് പ്രകാരം ഈ മഹാമാരിക്കാലത്ത് ലോകത്തെ 150 കോടി വിദ്യാര്‍ത്ഥികളുടെ പഠനം തടസ്സപ്പെട്ടു എന്ന് കണക്കാക്കുന്നു. ഇന്ത്യന്‍ വംശജനും അമേരിക്കയില്‍ സ്ഥിരതാമസക്കാരനുമായ പ്രശസ്ത ആന്ത്രോപോളജിസ്റ്റ് അര്‍ജുന്‍ അപ്പാദുരൈ ഉള്‍പ്പടെയുള്ളവര്‍ അംഗമായ ഈ സമിതിയുടെ കണ്ടെത്തലുകള്‍ ഓണ്‍ലൈന്‍ ക്ലാസിനു വെളിയിലായിപ്പോയ കോടിക്കണക്കായ കുഞ്ഞുങ്ങളുടെ വിദ്യാഭ്യാസം നേരിടുന്ന ഗുരുതരാവസ്ഥയുടെ നേര്‍ചിത്രമാണ് നമുക്ക് നല്‍കുന്നത്. പഠനം തടസ്സപ്പെട്ട 32 കോടിയോളം വിദ്യാര്‍ത്ഥികള്‍  ഇന്ത്യയില്‍ മാത്രം ഉണ്ടന്ന് യുണിസെഫും റിപ്പോര്‍ട്ട് ചെയ്തിട്ടുണ്ട്. ലോകത്തെമ്പാടുമുള്ള മനുഷ്യര്‍ക്കിടയില്‍ നിലനില്‍ക്കുന്ന അസമത്വങ്ങള്‍ ഈ മഹാമാരിക്കാലം കൃത്യമായി തുറന്നുകാട്ടുന്നുണ്ട്.

കേരളം കൈവരിച്ച സാര്‍വത്രിക പ്രാപ്യതയുടെയും സാമൂഹ്യ നീതിയുടെയും ബോധനരീതിയുടെയും സവിശേഷ നേട്ടങ്ങളെ കീഴ്​മേൽ മറിക്കുന്നതാണ് കച്ചവട വിദ്യാഭ്യാസ ഏജന്‍സികള്‍ മുന്നോട്ടുവെക്കുന്ന ഡിജിറ്റല്‍ വിദ്യാഭ്യാസ /വിദൂര വിദ്യാഭ്യാസ മാതൃകകള്‍.

വിദ്യാഭ്യാസ മേഖലയിലും ആരോഗ്യ മേഖലയിലും സ്വകാര്യ കച്ചവട ഏജന്‍സികള്‍ മുന്‍പൊരിക്കലുമില്ലാത്ത തരത്തില്‍ പിടിമുറുക്കുന്നതിനും ഈ മഹാമാരിക്കാലം സാക്ഷിയായി. ഡിജിറ്റല്‍ വിദ്യാഭ്യാസത്തിലും വിദൂര വിദ്യാഭ്യാസത്തിലും ഇത്തരം ഏജന്‍സികള്‍ക്കുണ്ടായിരുന്ന മുന്‍കൈ അവര്‍ നന്നായി പ്രയോജനപ്പെടുത്തുകയാണിപ്പോള്‍. കുട്ടികള്‍ക്ക് വിദ്യാഭ്യാസം നല്‍കുന്നകാര്യത്തില്‍ കേരളം പോലുള്ള ഒരു സംസ്ഥാനം കൈവരിച്ച സാര്‍വത്രിക പ്രാപ്യതയുടെയും സാമൂഹ്യ നീതിയുടെയും ബോധനരീതിയുടെയും സവിശേഷ നേട്ടങ്ങളെ കീഴ്​മേൽ മറിക്കുന്നതാണ് കച്ചവട വിദ്യാഭ്യാസ ഏജന്‍സികള്‍ മുന്നോട്ടുവെക്കുന്ന ഡിജിറ്റല്‍ വിദ്യാഭ്യാസ /വിദൂര വിദ്യാഭ്യാസ മാതൃകകള്‍. വിദ്യാഭ്യാസ വ്യവഹാരത്തിന്റെ (Educational Discourse) ഭാഗമായി ഉയര്‍ത്തിക്കാട്ടപ്പെട്ട മിക്ക മികച്ച ലോകമാതൃകകളും ( Global best practices) പൊള്ളയായിരുന്നു എന്ന തിരിച്ചറിവും ഈ മഹാമാരിക്കാലം നമുക്ക് സമ്മാനിച്ചു.

school-education
യൂണിസെഫ് 2020 ഡിസംബറില്‍  പുറത്തിറക്കിയ ഇന്റര്‍നെറ്റ് ലഭ്യതയെക്കുറിച്ചുള്ള റിപ്പോര്‍ട്ട് പ്രകാരം ലോകത്തെ ഇരുപത്തിയഞ്ച് വയസ്സില്‍ താഴെയുള്ള യുവാക്കളിലും കുട്ടികളിലും 220 കോടി പേര്‍ക്ക് വീടുകളില്‍ ഇന്റര്‍നെറ്റ് ലഭ്യതയില്ല

ഇതിനൊന്നിച്ച് എടുത്തുപറയേണ്ട മറ്റൊരു വസ്തുത സ്‌കൂളുകള്‍ യഥാര്‍ത്ഥത്തില്‍ എന്ത് സേവനമാണ് വിദ്യാര്‍ത്ഥികള്‍ക്ക് നല്‍കുന്നത്, അവ ഇല്ലാതായാലും ടെലിവിഷന്‍ വഴിയും ഓണ്‍ലൈന്‍ മാര്‍ഗങ്ങള്‍ വഴിയും വിദ്യാഭ്യാസം നടന്നുകൊള്ളും എന്ന് കരുതിയിരുന്ന കുറേപ്പേര്‍ക്കെങ്കിലും സ്‌കൂളുകള്‍ കുട്ടികളുടെ പഠനത്തിലും സ്വഭാവ രൂപീകരണത്തിലും വഹിക്കുന്ന പങ്ക് എത്ര വലുതാണ് എന്ന ബോധ്യം ഈ മഹാമാരിക്കാലം സൃഷ്ടിച്ചിട്ടുണ്ട് എന്നതുകൂടിയാണ്. വീടകങ്ങളില്‍ അടച്ചിരിക്കുന്ന കുട്ടികളെ കൈകാര്യം ചെയ്യാന്‍ കഴിയാതെ കുഴങ്ങുകയാണ് മിക്ക രക്ഷാകര്‍ത്താക്കളും. പൊതു വിദ്യാഭ്യാസത്തിന്റെ പ്രസക്തി സമൂഹത്തിനും ഭരണകൂടങ്ങള്‍ക്കും ശരിയായ അര്‍ത്ഥത്തില്‍ മനസ്സിലാക്കിക്കൊടുക്കാന്‍ ഈ അടച്ചിരിപ്പ് കാലം സഹായിച്ചിട്ടുണ്ട്. അതുകൊണ്ടുതന്നെ പൊതുവിദ്യാഭ്യാസം കൂടുതല്‍ ശക്തിപ്പെടുത്താനുള്ള ശ്രമങ്ങള്‍ക്കു മഹാമാരിക്കലാനന്തരലോകത്ത് കൂടുതല്‍ ഗതിവേഗം കൈവരും എന്നും നമുക്ക് പ്രത്യാശിക്കാം. 

തെക്കന്‍ ഏഷ്യന്‍ രാജ്യങ്ങളില്‍ ഇന്റര്‍നെറ്റ് ലഭ്യതയില്‍ ഏറ്റവും പിറകില്‍ നില്‍ക്കുന്ന രണ്ടാമതത്തെ രാജ്യമാണ് ഇന്ത്യ

ഡിജിറ്റല്‍ ഡിവൈഡ് ഉയര്‍ത്തുന്ന വെല്ലുവിളി 

യൂണിസെഫ് 2020 ഡിസംബറില്‍  പുറത്തിറക്കിയ ഇന്റര്‍നെറ്റ് ലഭ്യതയെക്കുറിച്ചുള്ള റിപ്പോര്‍ട്ട് പ്രകാരം ലോകത്തെ ഇരുപത്തിയഞ്ച് വയസ്സില്‍ താഴെയുള്ള യുവാക്കളിലും കുട്ടികളിലും 220 കോടി പേര്‍ക്ക് വീടുകളില്‍ ഇന്റര്‍നെറ്റ് ലഭ്യതയില്ല എന്ന് പറയുന്നുണ്ട്. അതായത് യുവാക്കളിലും കുട്ടികളിലും മൂന്നില്‍ രണ്ടുപേര്‍ക്കും അവരുടെ വീടുകളില്‍ ഇന്റര്‍നെറ്റ് ലഭ്യതയില്ല എന്നാണ് ഈ റിപ്പോര്‍ട്ട് ചൂണ്ടിക്കാണിക്കുന്നത്. (2.2 billion - or 2 in 3 children and young people aged 25 years or less - do not have internet access at home). ഇന്ത്യയിലെ ഇന്റര്‍നെറ്റ് ലഭ്യതയുടെ ദയനീയമായ അവസ്ഥയും യൂണിസെഫ് റിപ്പോര്‍ട്ടില്‍ എടുത്തുപറയുന്നുണ്ട്. ഈ റിപ്പോര്‍ട്ട് പ്രകാരം തെക്കന്‍ ഏഷ്യന്‍ രാജ്യങ്ങളില്‍ ഇന്റര്‍നെറ്റ് ലഭ്യതയില്‍ ഏറ്റവും പിറകില്‍ നില്‍ക്കുന്ന രണ്ടാമതത്തെ രാജ്യമാണ് ഇന്ത്യ. (Amongst the South Asian countries, internet access is available to 74.6 percent students in Sri Lanka, 69.7 percent students in Bangladesh, 36.6 percent in Nepal, 9.1 percent in Pakistan, 8.5 percent in India, and 0.9 percent in Afghanistan.) 2020 ല്‍ പുറത്തിറങ്ങിയ IAMAI (Internet & Mobile Aossciation of India) റിപ്പോര്‍ട്ടില്‍ കേരളത്തില്‍ 56% ആണ് ഇന്റര്‍നെറ്റ് പെനിട്രേഷന്‍ എന്ന് പറയുന്നു. 2019 നവംബര്‍ മാസത്തെ കണക്കാണ് ഇതില്‍ നല്‍കിയിരിക്കുന്നത്. 2021 ജൂലൈ മാസത്തില്‍ അത് പരമാവധി 70% വരെ എത്തിയിട്ടുണ്ടാവാം എന്ന് വിദഗ്ദ്ധന്മാര്‍ അഭിപ്രായപ്പെടുന്നു. ഇന്റര്‍നെറ്റ് ലഭ്യത മൗലികാവകാശമായി കാണണം എന്ന് നിരീക്ഷിച്ചുകൊണ്ട് കേരള ഹൈക്കോടതി 2019 സപ്തംബര്‍ മാസത്തില്‍ ചരിത്രപ്രധാനമായ വിധിപുറപ്പെടുവിക്കുകയുണ്ടായി. കോഴിക്കോട് ചേളന്നൂര്‍ ശ്രീനാരായണ കോളജ് ഹോസ്റ്റലില്‍ കുട്ടികളുടെ മൊബൈല്‍ ഫോണ്‍ ഉപയോഗം തടഞ്ഞ അധികൃതരുടെ നടപടിക്കെതിരെ ഹോസ്റ്റല്‍ വിദ്യാര്‍ത്ഥിനിയായ ഫഹീം ഷിറിന്‍ നല്‍കിയ പരാതിയിലാണ് കോടതി വിധി പുറപ്പെടുവിച്ചത് എന്നത് പഠനം പൂര്‍ണമായും ഓണ്‍ലൈനിലേക്ക് മാറിയ ഈ കാലത്ത് നമ്മള്‍ ഗൗരവമായി ചര്‍ച്ച ചെയ്യേണ്ടാതാണ്. 

unicef.org
യൂണിസെഫ് 2020 ഡിസംബറില്‍  പുറത്തിറക്കിയ ഇന്റര്‍നെറ്റ് ലഭ്യതയെക്കുറിച്ചുള്ള ഗ്രാഫ്​

ഡിജിറ്റല്‍ ഡിവൈഡിനെ കേവലം ഗാഡ്​ജറ്റ്​ ലഭ്യതയുടെ പ്രശ്‌നംമാത്രമായാണോ കേരളം കാണുന്നത് എന്ന് സംശയിക്കേണ്ട രീതിയിലാണ് ഈ അടുത്തിറങ്ങിയ ഡിജിറ്റല്‍ ഡിവൈഡ് പരിഹരിക്കാനുള്ള സര്‍ക്കാര്‍ ഉത്തരവ് കാണുമ്പോള്‍ തോന്നുന്നത്. കേന്ദ്രീകൃത ടെലിവിഷന്‍ ക്ലാസുകള്‍ക്കുപകരം സ്‌കൂള്‍ തല ക്ലാസുകളാണ് ആവശ്യം എന്നതിരിച്ചറിവിലേക്ക്​ വിദ്യാഭ്യാസ വകുപ്പും സര്‍ക്കാരും എത്തി എന്നത് സ്വാഗതാര്‍ഹമാണ്. എന്നാല്‍ സ്‌കൂള്‍ തലത്തില്‍ കൈകാര്യം ചെയ്യേണ്ടുന്ന ലേണിംഗ് മാനേജ്മെൻറ് സിസ്റ്റം പ്രവര്‍ത്തനക്ഷമമാവാന്‍ ആവശ്യമായ കണക്റ്റിവിറ്റി ഉറപ്പുവരുത്താനുള്ള നിര്‍ദ്ദേശങ്ങള്‍ ഈ ഉത്തരവുകളില്‍ ഒന്നും ഇല്ല എന്നത് നിരാശാജനകമാണ്. അധികൃതര്‍ സര്‍വീസ് പ്രൊവൈഡര്‍ മാരുടെ യോഗം വിളിക്കുകയും മുടങ്ങിക്കിടക്കുന്ന ടവറുകളുടെ പണിതുടങ്ങുകയുമൊക്കെ ചെയ്യുന്നതായി അറിയുന്നു. എന്നാല്‍ മൊബൈല്‍ ഫോണിലൂടെ ലഭിക്കുന്ന ശരാശരിയോ അതിനു താഴെയോ വേഗതയിലുള്ള ഇന്റര്‍നെറ്റ് കണക്ഷന്‍ ലൈവ് വീഡിയോ ക്ലാസുകള്‍ കാണാന്‍ പര്യാപ്തമാവില്ല എന്നതാണ് യാഥാര്‍ഥ്യം. കെ. ഫോണ്‍ പോലുള്ള ഒപ്റ്റിക്കല്‍ ഫൈബര്‍ ബ്രോഡ്ബാന്‍ഡ് കണക്ഷന്‍ ലഭ്യമാക്കുക മാത്രമാണ് കണക്റ്റിവിറ്റി പ്രശ്‌നം ശ്വാശ്വതമായി പരിഹരിക്കാനുള്ള ഏകവഴി. പക്ഷെ തുടക്കത്തില്‍ ഉണ്ടായിരുന്ന വേഗതയില്‍ കെ. ഫോണ്‍ പദ്ധതി ഇപ്പോള്‍ പ്രവര്‍ത്തന പുരോഗതി കൈവരിക്കുന്നില്ല എന്നാണ്​ മനസ്സിലാക്കുന്നത്. 2021 ജുലൈ 14 ന് ദ ന്യൂ ഇന്ത്യന്‍ എക്​സ്​പ്രസ്​ റിപ്പോര്‍ട്ട് ചെയ്തപ്രകാരം  കേരളത്തിലെ 1035 ട്രൈബല്‍ പ്രദേശങ്ങളില്‍  598 ഇടത്തുമാത്രമേ ഇന്റര്‍നെറ്റ് ലഭ്യത നല്ലനിലയില്‍ ഉണ്ടാവുന്നുള്ളു. ബാക്കി 437 ഇടങ്ങളിലും ഇന്റര്‍നെറ്റ് ലഭ്യത ഇന്നും ഒരു പ്രശ്‌നമായി അവശേഷിക്കുകയാണ്. തീരദേശ പ്രദേശങ്ങളിലും സ്ഥിതി വിഭിന്നമല്ല. ഡിജിറ്റല്‍ ഡിവൈഡ് പരിഹരിക്കാന്‍ യുദ്ധകാലാടിസ്ഥാനത്തില്‍ സര്‍ക്കാര്‍ ഇടപെടേണ്ടുന്ന സന്ദര്‍ഭമാണിത്. ദീര്‍ഘ ദൂരത്തേക്ക് വൈഫൈ സംവിധാനം എത്തിക്കാന്‍ സാധിക്കുന്ന സാങ്കേതിക വിദ്യ ഇന്ന് ലഭ്യമാണ്. അത്തരം സാധ്യതകളും ഈ ഘട്ടത്തില്‍ പരിശോധിക്കപ്പെടണം.

madamkunn-tribal-settlement
കേരളത്തിലെ 1035 ട്രൈബല്‍ പ്രദേശങ്ങളില്‍  598 ഇടത്തുമാത്രമേ ഇന്റര്‍നെറ്റ് ലഭ്യത തൃപ്​തികരമായ നിലയിലുള്ളൂ

ഭാവികാല വിദ്യാഭ്യാസം 

‘ഭൂതകാലത്തില്‍ നിന്ന് വിടുതല്‍ തേടാനും തങ്ങളുടെ ലോകം പുതുതായി സങ്കല്‍പ്പിക്കാനും മഹാമാരികള്‍ മനുഷ്യരെ നിര്‍ബന്ധിതരാക്കി. ഈ മഹാമാരിയുടെ കാര്യത്തിലും അത് വ്യത്യസ്തമല്ല. ഇത് ഒരു പ്രവേശന കവാടമാണ്, ഒരു ലോകത്തിനും മറ്റൊരു ലോകത്തിനും ഇടയിലുള്ള ഒരു കവാടം' എന്ന് ഈ മഹാമാരിക്കാലത്ത്  അരുന്ധതിറോയ് നിരീക്ഷിച്ചത് ഏറെ സംഗതമാണ്. പുതിയകാലത്തെക്കുറിച്ചുള്ള ഏതു ആലോചനയുടെയും അടിസ്ഥാനം വിദ്യാഭ്യാസമാവണം. കേരളം പോലുള്ള സാര്‍വത്രിക വിദ്യാഭ്യാസ പ്രാപ്യത കൈവരിച്ചതും സുശക്തമായ അടിസ്ഥാന സൗകര്യവും വിവര സാങ്കേതികവിദ്യയുടെ ശൃംഖലയും നിലവിലുള്ള ഒരു സംസ്ഥാനത്തിന് രാജ്യത്തിനും ലോകത്തിനും മാതൃകയായിമാറാന്‍ കഴിയുന്ന കോവിഡാനന്തര ന്യൂ നോര്‍മല്‍ വിദ്യാഭ്യാസത്തിന്റെ പ്രയോക്താക്കളായി മാറാന്‍ കഴിയണം.  
കേരളം കരിക്കുലം പരിഷ്‌കരണത്തിന്റെ പടിവാതില്‍ക്കല്‍ എത്തിനില്‍ക്കുന്ന ഈ ഘട്ടത്തില്‍ ഭാവികാല വിദ്യാഭ്യാസത്തിനു ദിശാബോധം നല്‍കാനുള്ള കൃത്യമായ ആസൂത്രണം തുടങ്ങേണ്ടുന്ന സമയമാണിത്. പാഠ്യപദ്ധതി ഉദ്ദേശ്യങ്ങള്‍ വിശാലലക്ഷ്യങ്ങളെ മുന്‍നിര്‍ത്തി പുനര്‍നിര്‍വചിക്കുക എന്നതാണ് പാഠ്യപദ്ധതിപരിഷ്‌കരണപ്രവര്‍ത്തങ്ങളുടെ പ്രാരംഭം എന്ന നിലയില്‍ നടക്കേണ്ടത്. Outcome Based Education (OBE) എന്നപേരില്‍ 2013 മുതല്‍  കേരളത്തിലെ സ്‌കൂളുകളില്‍ നടപ്പിലാക്കിതുടങ്ങിയ വിദ്യാഭ്യാസ സമീപനം വിദ്യാഭ്യാസത്തിന്റെ വിശാലക്ഷ്യങ്ങളെ വിസ്മരിക്കുകയും മത്സരാധിഷ്ഠിത ലോകത്തില്‍ വിപണി നിര്‍ണയിക്കുന്ന ലക്ഷ്യങ്ങളിലേക്ക് വിദ്യാഭ്യാസത്തെ പരുവപ്പെടുത്തിയെടുക്കാനുള്ള അവസരം തുറന്നുകൊടുക്കുകയും ചെയ്തു. മുന്‍കൂട്ടിനിശ്ചയിക്കപ്പെട്ട പഠനനേട്ടം (Outcome) നേടുക എന്ന ഒറ്റലക്ഷ്യത്തിലേക്കു വിദ്യാഭ്യാസ പ്രക്രിയ ചുരുങ്ങി.  ആരാണ് ഈ ഔട്ട്കം തീരുമാനിക്കുന്നത് എന്നതും പ്രശ്‌നവത്ക്കരിക്കപ്പെടേണ്ടതുണ്ട്. (പഠനനേട്ടം പാഠപുസ്തകങ്ങളില്‍ പ്രസ്താവിച്ചുപോന്നത് പിന്നീട് എസ്. സി. ഇ. ആര്‍. ടി. തന്നെ അവസാനിപ്പിക്കുകയും ചെയ്തു.) പഠനം പരീക്ഷ എഴുതാന്‍ മാത്രമുള്ളതാണ് എന്ന ബോധം കൂടുതല്‍ രൂഢമൂലമാക്കാന്‍മാത്രമേ Outcome Based Education വഴി നമുക്ക് സാധിച്ചിട്ടുള്ളൂ. 

school

മഹാമാരിക്കാലത്തിനുശേഷം വിദ്യാഭ്യാസ ലക്ഷ്യങ്ങള്‍ എന്തൊക്കെയാവണം എന്ന് പഠനം നടത്തിയ യു കെ യിലെ Edge Foundation റിപ്പോര്‍ട്ട് ചൂണ്ടിക്കാണിക്കുന്നത്, കരിക്കുലം നിര്‍ദ്ദേശിക്കുന്ന ഉള്ളടക്ക വിനിമയംമാത്രം വഴി കുട്ടികളെ പുതുകാല ജീവിതത്തിനു പ്രാപ്തമാക്കാന്‍ കഴിയില്ല എന്നാണ്. വിമര്‍ശചിന്ത (Critical Thinking), പ്രശ്‌നപരിഹാരശേഷി (Problem Solving Skill) , ആശയവിനിമയ നൈപുണി (Communicative Competence) എന്നിവ വിദ്യാര്‍ത്ഥികളില്‍ വളര്‍ത്തിയെടുക്കല്‍ സുപ്രധാനമാണ് എന്ന് ഈ പഠനത്തില്‍ പങ്കാളികളായ  96% അധ്യാപകരും 92% രക്ഷിതാക്കളും അഭിപ്രായപ്പെട്ടു. 90% അധ്യാപകരും 84% രക്ഷിതാക്കളും കുട്ടികളില്‍ ദയ, സഹാനുഭൂതി, സമുദായ സാഹോദര്യം തുടങ്ങിയ മൂല്യങ്ങള്‍ വിദ്യാഭ്യാസകാലത്ത് തന്നെ വളര്‍ത്തിയെടുക്കണം എന്നും ആവശ്യപ്പെട്ടു. 

ഗള്‍ഫ് രാജ്യങ്ങളിലെയും പടിഞ്ഞാറന്‍ നാടുകളിലെയും തൊഴില്‍ സാധ്യതകള്‍ ഈ മഹാമാരിക്കാലത്തോടെ ഏതാണ്ട് അവസാനിച്ചമട്ടാണ്.

കഴിഞ്ഞ രണ്ടു മൂന്നു ദശകങ്ങളിലായി വേഗം കൈവരിച്ച ആഗോളവല്‍ക്കരണപ്രക്രിയയും അതിനെതുടര്‍ന്നുവന്ന നവ ഉദാരവല്‍ക്കരണ സാമ്പത്തിക നയങ്ങളും പ്രവാസജീവിതമോഹികളായ മലയാളികള്‍ക്ക് തൊഴില്‍ സാധ്യതയുടെ വലിയ മണ്ഡലമാണ് തുറന്നുകൊടുത്തത്. ഗള്‍ഫ് രാജ്യങ്ങളിലെയും പടിഞ്ഞാറന്‍ നാടുകളിലെയും തൊഴില്‍ സാധ്യതകള്‍ ഈ മഹാമാരിക്കാലത്തോടെ ഏതാണ്ട് അവസാനിച്ചമട്ടാണ്. മറ്റു നാടുകളിലെ കോര്‍പ്പറേറ്റ് ജോലികള്‍ക്ക് ആളെ റിക്രൂട്ട് ചെയ്യുന്ന രീതിയില്‍ നമ്മുടെ വിദ്യാഭ്യാസ ലക്ഷ്യങ്ങള്‍ ചുരുങ്ങിയ അവസ്ഥയില്‍ നിന്ന് പുതിയൊരു ലോക ക്രമത്തില്‍ മാനവിക മൂല്യങ്ങള്‍ ഉയര്‍ത്തിപ്പിടിക്കുന്ന, ഭൂമിയില്‍ ജീവന്റെ നിലനില്‍പ്പിന് പരിക്കേല്‍പ്പിക്കാത്ത ഒരു തലമുറയെ വളര്‍ത്തിയെടുക്കാനാണ് പാഠ്യപദ്ധതി പരിഷ്‌കരണം ലക്ഷ്യമിടേണ്ടത്. ഭാഷാ മാനവിക വിഷയങ്ങള്‍ ശാസ്ത്ര സാങ്കേതിക വിദ്യാഭ്യാസത്തിന്റെ അവിഭാജ്യ ഭാഗമാക്കി മാറ്റുന്നതുപോലുള്ള പരിഷ്‌കരണങ്ങള്‍ ഇതിന് ആവശ്യമായി വന്നേക്കും. 

school 5

പഠനം എവിടെ എങ്ങനെ നടക്കുന്നു എന്നതിനെ ഈ മഹാമാരിക്കാലം പൂര്‍ണമായും മാറ്റിമറിച്ചിരിക്കുകയാണ്. സ്‌കൂളിന് പകരം വീട് പഠനം നടക്കുന്ന ഇടമായി മാറി, സംഘപഠനത്തിന്റെ ആഹ്ലാദങ്ങള്‍ പൂര്‍ണമായി ഇല്ലാതാവുകയും ഏകാകിയായ പഠിതാവായി കുട്ടി മാറുകയും ചെയ്തു, ബോധനം സാങ്കേതികവിദ്യയുടെയും ഇന്റര്‍നെറ്റ് ലഭ്യതയുടെയും സഹായത്താല്‍ മാത്രം നടക്കുന്നതായി മാറി, പഠനം രക്ഷാകര്‍തൃസാന്നിധ്യത്തിലുമായിമാറി. വിദ്യാഭ്യാസത്തില്‍ സാങ്കേതികവിദ്യയുടെ പ്രയോഗം നിലവിലെ എല്ലാ ദൗര്‍ബല്യത്തോടെയാണെങ്കിലും സാധ്യമായി എന്നതും പഠനപ്രക്രിയ രക്ഷാകര്‍തൃ സാന്നിധ്യത്തില്‍ നടക്കുന്നു എന്നതും ഈ കാലം സമ്മാനിച്ച ഗുണകരമായ മാറ്റങ്ങളാണ്. 

സ്‌കൂളുകള്‍ തുറന്നാല്‍?

ലോകത്തെ കോവിഡ് രോഗികളില്‍ പതിമൂന്നു ശതമാനത്തോളം പേര്‍ മാത്രമാണ് ഇരുപതു വയസ്സിനുതാഴെ പ്രായമുള്ളവര്‍. കുട്ടികളെ കോവിഡ് രോഗം ഗൗരവമായി ബാധിക്കുന്നില്ല എന്നതാണ് പൊതുവെ കണ്ടുവരുന്നത്. മറ്റു ഗുരുതര രോഗത്തിന്റെ പിടിയില്‍ അല്ലാത്ത കുട്ടികള്‍ക്കൊന്നുംതന്നെ കോവിഡ് ബാധ വലിയ പ്രശ്നങ്ങള്‍ സൃഷ്ടിച്ചതായും റിപ്പോര്‍ട്ടുകള്‍ ഇല്ല. സ്‌കൂള്‍ അടച്ചിടല്‍  തുടരുന്നത് സങ്കീര്‍ണമായ പ്രത്യാഘാതങ്ങള്‍ സൃഷ്ടിക്കുമെന്ന് മനഃശാസ്ത്രജ്ഞരും വിദ്യാഭ്യാസ ചിന്തകരും സാമൂഹ്യ നിരീക്ഷകരും ഏക സ്വരത്തില്‍ അഭിപ്രായപ്പെടുന്നുണ്ട്. അതേസമയം കോവിഡ് മഹാമാരി ഏറ്റവും രൂക്ഷമായി രാജ്യത്ത് ഇപ്പോഴും നിലനില്‍ക്കുന്നത് കേരളത്തിലാണുതാനും. ഇന്ത്യന്‍ സംസ്ഥാനങ്ങളില്‍ മഹാമാരിക്കുശേഷം ഏറ്റവുമാദ്യം സ്‌കൂള്‍ തുറന്നത് പഞ്ചാബിലാണ്. 2021 ആഗസ്ത് രണ്ടാം തിയ്യതിമുതല്‍ തുറന്നു പ്രവര്‍ത്തിച്ചുതുടങ്ങിയ അവിടത്തെ സ്‌കൂളുകളില്‍ ലുധിയാനയിലെ രണ്ടു സ്‌കൂളുകളിലായി ഇരുപതു വിദ്യാര്‍ത്ഥികള്‍ക്ക് കോവിഡ് പിടിപെട്ടുവെന്നും ആ രണ്ടു സ്‌കൂളുകളും രണ്ടാഴ്ചക്കാലത്തേക്കു അടച്ചിട്ടുവെന്നും ഹിന്ദുസ്ഥാന്‍ ടൈംസ് റിപ്പോര്‍ട്ട് ചെയ്തിട്ടുണ്ട്. ഈ സംഭവം ഒഴിച്ചാല്‍ പഞ്ചാബിലെ സ്‌കൂളുകള്‍ സാധാരണ രീതിയില്‍ പ്രവര്‍ത്തിക്കുന്നു എന്നാണു മനസ്സിലാക്കാന്‍ കഴിയുന്നത്. 

school

കേരളം സ്‌കൂള്‍ തുറക്കുന്നതിനായുള്ള മുന്നൊരുക്കങ്ങള്‍ക്കാണ് ഈ ഘട്ടത്തില്‍ പ്രാധാന്യം നല്‍കേണ്ടത് എന്ന് തോന്നുന്നു. സ്‌കൂളുകളുടെ ശൂചീകരണത്തിനും കൃത്യമായ ഇടവേളകളില്‍ അണുവിമുക്തമാക്കുന്ന പ്രവര്‍ത്തനങ്ങള്‍ക്കും വിദ്യാര്‍ത്ഥികള്‍ സാമൂഹിക അകലം പാലിക്കുന്നു എന്ന് ഉറപ്പുവരുത്താനും അധ്യാപകരും രക്ഷിതാക്കളും പ്രദേശവാസികളും കോവിഡ് പ്രതിരോധ സന്നദ്ധ പ്രവര്‍ത്തകരും കുടുംബശ്രീ യൂണിറ്റുകളും ഉള്‍പ്പെടുന്ന ഒരു ടീം രൂപീകരിക്കാവുന്നതാണ്. ഒക്ടോബര്‍ മാസത്തോടെ പത്ത് പന്ത്രണ്ട് ക്ലാസുകള്‍ പരമാവധി ഇരുപതുവിദ്യാര്‍ത്ഥികളെ ഉള്‍കൊള്ളുന്ന രീതിയില്‍ പ്രവര്‍ത്തിച്ചു തുടങ്ങുകയും മറ്റു ക്ലാസുകള്‍ ആഴ്ചയില്‍ ഒരു ദിവസം രണ്ടു മണിക്കൂര്‍ സമയം സ്‌കൂളില്‍ ചെലവഴിക്കുന്ന രീതിയിലും ക്രമീകരിക്കാം. ഒന്നര വര്‍ഷമായി സ്‌കൂള്‍ അനുഭവം ഇല്ലാതെപോയ ഒമ്പതാംതരം വരെയുള്ള വിദ്യാര്‍ത്ഥികളെ സംബംന്ധിച്ച് സ്‌കൂളുകളുമായി പൊരുത്തപ്പെടാനുള്ള അവസരമായി ഒക്ടോബര്‍ മാസ സ്‌കൂള്‍ പ്രവര്‍ത്തനങ്ങളെ നിജപ്പെടുത്താവുന്നതാണ്. നവംബറോടെ സ്‌കൂളുകള്‍ പൂര്‍ണതോതില്‍ ബ്ലന്റഡ് ലേണിംഗ് സിസ്റ്റത്തിലേക്ക് മാറാവുന്ന തരത്തില്‍ വിദ്യാഭ്യാസ പ്രവര്‍ത്തനങ്ങള്‍ ആസൂത്രണം ചെയ്യുകയുമാവാം.

18 മാസമായി അടഞ്ഞുകിടക്കുന്ന സ്‌കൂളുകള്‍ വിദ്യാര്‍ത്ഥികളിലും രക്ഷകര്‍ത്താക്കളിലും സൃഷ്ടിച്ചിട്ടുള്ള ആശങ്കയുടെ പശ്ചാത്തലത്തിൽ ബ്ലന്റഡ് ലേണിംഗ് എന്ന വിദ്യാഭ്യാസ രീതി സ്വീകരിക്കുന്നത് അഭികാമ്യമാവും

ബ്ലന്റഡ് ലേണിംഗ് 

സംസ്ഥാനത്ത് വിവര സാങ്കേതിക വിദ്യ വിദ്യാഭ്യാസ പ്രക്രിയയില്‍ സാന്നിധ്യമറിയിച്ചിട്ട് രണ്ടുദശകങ്ങളിലേറെ ആയെങ്കിലും വിവര സാങ്കേതിക വിദ്യ വിദ്യാഭ്യാസ പ്രക്രിയയുടെ കേന്ദ്രസ്ഥാനത്ത് പ്രതിഷ്ഠിക്കപ്പെടുന്നത് ഈ മഹാമാരിക്കാലത്താണ്.  ഈ ലേഖനത്തിന്റെ തുടക്കത്തില്‍ ചൂണ്ടിക്കാണിച്ച ഡിജിറ്റല്‍ ഡിവൈഡ് പ്രശ്നം ഇപ്പോഴും പൂര്‍ണമായി പരിഹരിച്ചിട്ടില്ലാത്ത സാഹചര്യത്തിലും, പതിനെട്ട് മാസമായി അടഞ്ഞുകിടക്കുന്ന സ്‌കൂളുകള്‍ വിദ്യാര്‍ത്ഥികളിലും രക്ഷകര്‍ത്താക്കളിലും സൃഷ്ടിച്ചിട്ടുള്ള ആശങ്കയുടെ പശ്ചാത്തലത്തിലും ബ്ലന്റഡ് ലേണിംഗ് എന്ന ഇപ്പോള്‍ പ്രചുര പ്രചാരം നേടിയ വിദ്യാഭ്യാസ രീതി സ്വീകരിക്കുന്നത് അഭികാമ്യമാവും. ഓണ്‍ലൈന്‍ വിദ്യാഭ്യാസത്തോടൊപ്പം സ്‌കൂള്‍ വിദ്യാഭ്യാസവും വിദ്യാര്‍ത്ഥികള്‍ക്ക് ലഭ്യമാക്കുന്നതിനെയാണ് ബ്ലന്റഡ് ലേണിംഗ് എന്നതുകൊണ്ട് ഉദ്ദേശിക്കുന്നത്. കോവിഡ് മഹാമാരി പൂര്‍ണമായും ഒഴിഞ്ഞുപോകുന്നത് എപ്പോഴായിരിക്കും എന്ന് ആര്‍ക്കും പ്രവചിക്കാനാവാത്ത സാഹചര്യത്തില്‍, ഭാവിയിലും സംഭവിക്കാനിടയുള്ള ലോക്ക് ഡൗണ്‍ സാഹചര്യങ്ങളും മുന്‍കൂട്ടിക്കണ്ടുകൊണ്ട് ബ്ലന്റഡ് ലേണിംഗ് രീതിയിലേക്ക് പാഠ്യപദ്ധതി വിനിമയം മാറേണ്ടതുണ്ട്.

school 4

സ്‌കൂളുകള്‍ അവരുടെ ഓണ്‍ലൈന്‍ ക്ലാസുകള്‍ ലേണിംഗ് മാനേജ്മെന്റ് സിസ്റ്റം വഴി പങ്കുവെക്കുകയും ഇത്തരം ക്ലാസ്സുകളുമായി ബന്ധപ്പെട്ട് കുട്ടികള്‍ക്കുണ്ടാവുന്ന സംശയങ്ങളും ചോദ്യങ്ങളും സ്‌കൂളില്‍ നേരിട്ടെത്തി അധ്യാപകരോട് ചോദിച്ച് വ്യക്തത വരുത്തുകയും ചെയ്യുക എന്നതാണ് ബ്ലന്റഡ് ലേണിംഗ് രീതിശാസ്ത്രം. 
അധ്യാപകര്‍ അവരുടെ പരമാവധി പത്തോ പതിനഞ്ചോ മിനിറ്റ് ദൈര്‍ഘ്യമുള്ള പ്രീ റെക്കോര്‍ഡഡ് ക്ലാസുകളുടെ വീഡിയോ അല്ലങ്കില്‍ പുനഃരുപയോഗിക്കാന്‍ കഴിയുന്ന തരത്തിലുള്ള അതേ ദൈര്‍ഘ്യമുള്ള ലൈവ് ക്ലാസുകള്‍ ലേണിംഗ് മാനേജ്മെന്റ് സിസ്റ്റം വഴിയോ സ്‌കൂള്‍ വെബ്സൈറ്റ് വഴിയോ  യൂട്യൂബ് ചാനല്‍ വഴിയോ വിദ്യാര്‍ത്ഥികളുമായി പങ്കുവെക്കുകയും ഈ വീഡിയോയില്‍ അവതരിപ്പിക്കപ്പെട്ട ആശയവുമായി ബന്ധപ്പെട്ട് വിദ്യാര്‍ത്ഥികള്‍ക്കുണ്ടാവുന്ന ചോദ്യങ്ങളും സംശയങ്ങളും സ്‌കൂളില്‍ നേരിട്ടെത്തി അധ്യാപകരുമായി ചര്‍ച്ചചെയ്തു വ്യക്തത വരുത്തുകയും ചെയ്യുന്നു. ആശയങ്ങള്‍ അവതരിപ്പിക്കാന്‍ ഓണ്‍ലൈന്‍ മാര്‍ഗവും ആശയവ്യക്തതവരുത്താനും തുടര്‍ പ്രവര്‍ത്തനങ്ങള്‍ നടത്താനും സ്‌കൂളില്‍ നേരിട്ടെത്തുകയും ചെയ്യുക എന്നതാണ് ഈ രീതിയുടെ സ്വഭാവം. 

സ്‌കൂളുകളുടെ ഭാവിപ്രവര്‍ത്തന പരിപാടികളുടെ വ്യക്തമായചിത്രം തെളിഞ്ഞുവരാനുളള ചര്‍ച്ചകള്‍ ആരംഭിക്കേണ്ടുന്ന സമയം അതിക്രമിച്ചിരിക്കുന്നു. 

ടീം ടീച്ചിങ് രീതി നിലവിലുള്ള വികസിത രാജ്യങ്ങളില്‍ മിക്കപ്പോഴും അനുവര്‍ത്തിച്ചുപോരുന്നത് ഒരു ജൂനിയര്‍ ടീച്ചര്‍ കോണ്‍സെപ്റ്റ്‌സ് അവതരിപ്പിക്കുകയും സീനിയര്‍ ടീച്ചര്‍ കുട്ടികളുടെ സംഘ പ്രവര്‍ത്തനങ്ങള്‍ക്കും അവതരണങ്ങള്‍ക്കും വഴികാട്ടിയായി പ്രവര്‍ത്തിക്കുകയും ആവശ്യമായ ഫീഡ് ബാക്ക് നല്‍കുകയും ചെയ്യുക എന്നതാണ്. ഓണ്‍ലൈനില്‍ ചെറിയ വീഡിയോകളായി പങ്കുവെക്കുന്ന അധ്യാപക അവതരണങ്ങള്‍ ഒരേ ആശയത്തിന്റെ വിവിധ അവതരണങ്ങളുടെ ഒരു ശേഖരം (Repository) ആയി മാറുന്നു എന്നത് അധ്യാപനം എന്ന പ്രക്രിയയെ കൂടുതല്‍ മികവുറ്റതാക്കാന്‍ സഹായിക്കും. മാത്രമല്ല ചെറു വീഡിയോകള്‍ ഇന്റര്‍നെറ്റ് ലഭ്യതക്കുറവുള്ള പ്രദേശങ്ങളിലും ഡാറ്റ ട്രന്‍സ്ഫറിന്റെ മറ്റു മാര്‍ഗങ്ങള്‍ ഉപയോഗിച്ച് എത്തിക്കാനും സാധിക്കും. അധ്യാപകരുടെ തത്സമയ അവതരണ സമയത്തും പിന്നീടും (Synchronous / Asynchronous) വിദ്യാര്‍ത്ഥികള്‍ക്ക് ഈ ചെറു വീഡിയോ ക്ലാസുകള്‍ കാണാന്‍ സാധിക്കുമെന്നത്  എടുത്തുപറയേണ്ടുന്ന നേട്ടമാണ്. അസിങ്ക്രണസ് രീതിയില്‍ അവരവരുടെ പഠന വേഗത്തിനനുസരിച്ച് പഠനം ക്രമീകരിക്കാമെന്നത് ഭിന്ന ശേഷി വിദ്യാര്‍ത്ഥികള്‍ക്കും  സഹായകരമായ കാര്യമാണ്. 

school 3

ഈ അധ്യയന വര്‍ഷം നവംബര്‍ മുതല്‍ ഏപ്രില്‍ വരെയുള്ള ആറുമാസം കൊണ്ട് ബ്ലന്റഡ് ലേണിംഗ് രീതിയില്‍ വിനിമയം ചെയ്യാന്‍ കഴിയുന്ന പഠന ആശയങ്ങളും (learning concepts) അനുബന്ധ പ്രവര്‍ത്തനങ്ങളും ഫോക്കസ് ഏരിയ എന്ന മട്ടില്‍ നിര്‍ണയിക്കുകയും ഒരു തുടക്കം എന്ന രീതിയില്‍ ഈ വര്‍ഷത്തെ കോണ്‍സെപ്റ്റ് അവതരണത്തിന്റെ ചെറു വീഡിയോകളും തുടര്‍പ്രവര്‍ത്തനത്തിനാവശ്യമായ വര്‍ക്ക് ഷീറ്റുകളും പഠന പ്രവര്‍ത്തനങ്ങളുടെ സൂചനകളും എസ് സി ആര്‍ ടി യുടെ ആഭിമുഖ്യത്തില്‍ തയ്യാറാക്കുകയും കൈറ്റിന്റെ സഹായത്തോടെ ഒരു ലേര്‍ണിംഗ് മാനേജ്മന്റ് സിസ്റ്റം വഴി സ്‌കൂളുകള്‍ക്ക് ലഭ്യമാക്കുകയും ചെയ്യുന്നത് അധ്യാപകര്‍ക്ക് ആദ്യഘട്ടത്തില്‍ സഹായകകരമാവും. 

അടുത്ത അധ്യയന വര്‍ഷം മുതല്‍ ഓരോ സ്‌കൂളും ഓണ്‍ലൈനായി തങ്ങളുടെ ലേര്‍ണിംഗ് മാനേജ്മന്റ് സിസ്റ്റം വഴി ആശയാവതരണത്തിനുള്ള ഓണ്‍ലൈന്‍ പഠന വിഭവങ്ങള്‍ വികസിപ്പിക്കാക്കാന്‍ സഹായകരമായ അധ്യാപക ശാക്തീകരണ പരിപാടികളും ഈ വര്‍ഷം തന്നെ ആസൂത്രണം ചെയ്ത് നടപ്പാക്കണം. സ്‌കൂള്‍ ക്ലസ്റ്റര്‍ അടിസ്ഥാനത്തില്‍ അധ്യാപര്‍ക്കും ബ്ലന്റഡ് ലേര്‍ണിംഗ് രീതിയില്‍ തന്നെ ശാക്തീകരണ പരിപാടികള്‍ സംഘടിപ്പിക്കുന്നത് ഈ രീതിയുടെ ശക്തിയും ദൗര്‍ബല്യവും തിരിച്ചറിയാന്‍ അധ്യാപകരെ സഹായിക്കുകയും ചെയ്യും. വിദ്യാഭ്യാസത്തിന്റെ ഭാവിയെക്കുറിച്ചുള്ള സൂചനകള്‍ ഒന്നും നല്‍കാതെ വിദ്യാര്‍ത്ഥികളെയും അധ്യാപകരെയും രക്ഷിതാക്കളെയും ഒന്നരവര്‍ഷത്തിനുശേഷവും ഇരുട്ടില്‍നിര്‍ത്തുന്നത് ഒരു പുരോഗമന സമൂഹത്തിന്​ഗുണകരമല്ല തന്നെ. സ്‌കൂളുകളുടെ ഭാവിപ്രവര്‍ത്തന പരിപാടികളുടെ വ്യക്തമായചിത്രം തെളിഞ്ഞുവരാനുളള ചര്‍ച്ചകള്‍ ആരംഭിക്കേണ്ടുന്ന സമയം അതിക്രമിച്ചിരിക്കുന്നു.  

കെ.ടി. ദിനേശ്​

അധ്യാപകന്‍, എഴുത്തുകാരൻ.

Audio

PLEASE USE TRUECOPY WEBZINE APP FOR BETTER READING EXPERIENCE.

DOWNLOAD IT FROM