Wednesday, 07 December 2022

ബ്ലൂ ഇക്കോണമി


Text Formatted

കേരളതീരം വിട്ടുപോകുകയാണ്​ മത്തി

കാലാവസ്ഥാ വ്യതിയാനത്തിന്റെ ഫലമായി കേരള തീരം അമിതമായി ചൂടാകുന്നതിനെതുട​ർന്ന്​ മത്തി ശ്രീലങ്കന്‍, തമിഴ്‌നാട് തീരങ്ങളിലേക്ക് നീങ്ങുകയാണ്. മത്തിയുടെ ഉത്പാദനത്തിലുണ്ടായ കുറവ് കേരളത്തിലെ മത്സ്യമേഖലയില്‍ വലിയ തകര്‍ച്ചയാണുണ്ടാക്കുന്നത്​.

Image Full Width
Image Caption
അമിത മത്സ്യബന്ധനം ഇനിയും തുടരുകയാണെങ്കില്‍ ലോകത്തെ പല പ്രധാന മത്സ്യബന്ധന കേന്ദ്രങ്ങളും മത്സ്യങ്ങളില്ലാത്ത അവസ്ഥയിലേക്കെത്തും. / Representational Images / Photo: Muhammed Fasil
Text Formatted

2021 മാര്‍ച്ച് ഒന്നിന് നൈജീരിയന്‍ വംശജയായ ഗോസി ഒകോഞ്ചോ ഇവിയേല ലോക വ്യാപാര സംഘടനയുടെ (World Trade Organization) ഡയറക്ടര്‍ ജനറലായി ചുമതലയേറ്റെടുത്തത് മഞ്ഞുകൊണ്ട് നിര്‍മിച്ച മത്സ്യക്കൂട്ടങ്ങളുടെ ശില്പത്തിന് മുന്നില്‍വെച്ചാണ്. ലോക വ്യാപാര സംഘടനയുടെ ആസ്ഥാനത്ത് സ്ഥാപിച്ച ഈ ശില്‍പത്തിന്റെ പേര്  "ഉരുകിത്തീരുന്ന മത്സ്യങ്ങള്‍' എന്നാണ്. 2022 ജൂണ്‍ 12-ന് ലോക വ്യാപാര സംഘടനയുടെ 12-ാമത് മന്ത്രിതല സമ്മേളനം സ്വിറ്റ്‌സര്‍ലന്‍ഡിലെ ജനീവയില്‍ ആരംഭിക്കുമ്പോഴേക്കും ഈ മത്സ്യങ്ങള്‍ ഉരുകിത്തീരുമോ എന്നാണ് ലോകം ആശങ്കയോടെ നോക്കുന്നത്. 

അനുദിനം ചൂഷണം ചെയ്യപ്പെട്ടുകൊണ്ടിരിക്കുന്ന മത്സ്യമേഖല ലോകത്താകെ കടുത്ത പ്രതിസന്ധിയിലൂടെ കടന്നുപോകുന്നതിന്റെ സൂചകമായാണ് "ഉരുകിത്തീരുന്ന മത്സ്യങ്ങള്‍' ശില്‍പം സ്ഥാപിക്കപ്പെട്ടത്. ലോകമെമ്പാടും മത്സ്യബന്ധനമേഖല അമിത ചൂഷണത്തിന്റെ ഫലമായി ഗുരുതരമായ പ്രതിസന്ധി നേരിടുകയാണ്. അമിത ചൂഷണത്തിന് വിധേയമായ മത്സ്യങ്ങള്‍ 1947-ല്‍ 10 ശതമാനമായിരുന്നത് 2021-ല്‍ 35 ശതമാനമായാണ് വര്‍ധിച്ചത്. ഇതേരീതിയില്‍ വ്യാവസായിക മത്സ്യബന്ധനം തുടരുകയാണെങ്കില്‍ 2048-നകം ഭക്ഷ്യയോഗ്യമായ മുഴുവന്‍ മത്സ്യങ്ങളും ഭൂമുഖത്തുനിന്ന് അപ്രത്യക്ഷമാകുമെന്നാണ് ആറ് രാജ്യങ്ങളിലെ 14 ഗവേഷകര്‍ ചേര്‍ന്ന് നേച്ചര്‍ മാഗസിനില്‍ പ്രസിദ്ധീകരിച്ച പഠന റിപ്പോര്‍ട്ടില്‍ പറയുന്നത്. 

fish wto
ലോക വ്യാപാര സംഘടന ആസ്ഥാനത്ത് സ്ഥാപിച്ച 'ഉരുകുന്ന മത്സ്യങ്ങള്‍' ശില്‍പം/ Photo: wto.org

മത്സ്യബന്ധനത്തിലെ നെഗറ്റീവ് സബ്‌സിഡി

ലോകത്തെ പ്രധാനപ്പെട്ട 15 ഫിഷിങ് ഗ്രൗണ്ടുകളില്‍ പതിമൂന്നും അമിത ചൂഷണത്തിന് വിധേയമാണെന്നാണ് പഠനങ്ങളില്‍ കണ്ടെത്തിയിട്ടുള്ളത്. കുറഞ്ഞ അളവിലെങ്കിലും മത്സ്യ സമ്പത്ത് അവശേഷിക്കുന്നത് ബംഗാള്‍ ഉള്‍ക്കടലിലും അറബിക്കടലിലുമാണെന്നും വിലയിരുത്തപ്പെടുന്നു. അമിത മത്സ്യബന്ധനം മൂലം ഏറ്റവും കൂടുതല്‍ തകര്‍ച്ച നേരിടുന്നത് ആര്‍ട്ടിക് സമുദ്രമാണ്. കിഴക്കന്‍ ആഫ്രിക്കന്‍ തീരം, കോറല്‍ ട്രയാംഗിള്‍ (ഇന്തോനേഷ്യ, ഫിലിപ്പൈന്‍സ്, മലേഷ്യ, പാപ്പുവ ന്യൂഗിനിയ, സോളമന്‍ ഐലന്‍ഡ്) എന്നിവയാണ് രണ്ടും മൂന്നും സ്ഥാനങ്ങളില്‍. ഗള്‍ഫ് ഓഫ് കാലിഫോര്‍ണിയ, യൂറോപ്പിനും ആഫ്രിക്കയ്ക്കുമിടയിലെ മെഡിറ്ററേനിയന്‍ പവിഴപ്പുറ്റുകള്‍, തെക്കന്‍ ചിലി കടല്‍, ഗാലപഗോസ് (ഇക്വഡോര്‍) എന്നീ സുദ്രഭാഗങ്ങളിലും മത്സ്യ സമ്പത്ത് വന്‍തോതില്‍ ചൂഷണം ചെയ്യപ്പെടുകയാണ്.

കേരളതീരത്ത് മത്തിയുടെ അളവ് കുറയുമ്പോള്‍ ആഴക്കടലില്‍ പോയാണ് ചെറുകിട ബോട്ടുകള്‍ മത്സ്യബന്ധനം നടത്തിയിരുന്നത്. എന്നാല്‍ ഇപ്പോള്‍ ഇന്ധന വില അനിയന്ത്രിതമായി വര്‍ധിക്കുന്നതുകാരണം പുറംകടലില്‍ പോകുന്നത് തൊഴിലാളികള്‍ക്ക് നഷ്ടമാണ്. 

വലിയ നഷ്ടക്കച്ചവടമായി മാറിയ മത്സ്യബന്ധനം വന്‍തുക സബ്‌സിഡി നല്‍കിയാണ് വികസിത രാഷ്ട്രങ്ങള്‍ നിലനിര്‍ത്തുന്നത്. വികസിത രാജ്യങ്ങള്‍ 34.5 ബില്യണ്‍ ഡോളറാണ് മത്സ്യമേഖലയ്ക്ക് സബ്‌സിഡിയായി നല്‍കുന്നത്. ഇതില്‍ 7.2 ബില്യണ്‍ ഡോളറും (ഏകദേശം 56,000 കോടി രൂപ) ഇന്ധന സബ്‌സിഡിയാണ്. മത്സ്യബന്ധന കപ്പലുകളുടെ നിര്‍മാണം, തുറമുഖങ്ങളുടെ പശ്ചാത്തല സൗകര്യങ്ങള്‍ എന്നിവയ്ക്കാണ് ബാക്കി തുക. ചൈന, അമേരിക്ക, യൂറോപ്യന്‍ യൂണിയന്‍, ജപ്പാന്‍, കൊറിയ എന്നീ രാജ്യങ്ങളാണ് സബ്‌സിഡി നല്‍കുന്ന പ്രധാന രാജ്യങ്ങള്‍. ലോക ഭക്ഷ്യ കാര്‍ഷിക സംഘനയുടെ കണക്കുപ്രകാരം നശീകരണ മത്സ്യബന്ധനത്തിന് വര്‍ഷംതോറും 22 ബില്യണ്‍ ഡോളറാണ് ധനസഹായം നല്‍കുന്നത്. ഇത്തരം ധനസഹായങ്ങളെ "നെഗറ്റീവ് സബ്‌സിഡി' അഥവാ ഹാംഫുള്‍ സബ്‌സിഡി എന്ന പട്ടികയിലാണ് ലോക വ്യാപാര സംഘടന പെടുത്തിയിരിക്കുന്നത്. 

മരുഭൂമികളാകുന്ന കടലുകള്‍

അമിത മത്സ്യബന്ധനം ഇനിയും തുടരുകയാണെങ്കില്‍ ലോകത്തെ പല പ്രധാന മത്സ്യബന്ധന കേന്ദ്രങ്ങളും മത്സ്യങ്ങളില്ലാത്ത അവസ്ഥയിലേക്കെത്തും. "കടലിലെ മരുഭൂമികള്‍' എന്നു വിളിക്കുന്ന അവസ്ഥയിലേക്കാണ് സുപ്രധാന മത്സ്യബന്ധന കേന്ദ്രങ്ങളായ മെഡിറ്ററേനിയന്‍ കടല്‍, നോര്‍ത്ത് സീ, കിഴക്കന്‍ ചൈന കടല്‍ എന്നിവ നീങ്ങുന്നതെന്നാണ് പഠനങ്ങള്‍ വ്യക്തമാക്കുന്നത്. യൂറോപ്പിലെ കടലുകളിലുള്ള 136 ഇനം (സ്റ്റോക്ക്) മത്സ്യങ്ങളില്‍ എട്ട് ശതമാനം മാത്രമെ 2023-ല്‍ അവശേഷിക്കൂ എന്നാണ് യൂറോപ്യന്‍ യൂണിയനിലെ ഫിഷറീസ് കമ്മീഷണറായിരുന്ന മരിയ ദെമനാക്കി മുന്നറിയിപ്പ് നല്‍കുന്നത്. യൂറോപ്യന്‍ വിപണിയിലെ പ്രധാന മത്സ്യങ്ങളായ പാറ്റഗോണിയന്‍ ടൂത്ത് ഫിഷ്, ഹാലിബട്ട്, ബ്ലൂലിംഗ്, അറ്റ്‌ലാന്റിക് സ്റ്റര്‍ജിയണ്‍, സേബിള്‍ ഫിഷ്, ബ്ലൂവിറ്റിംഗ് തുടങ്ങിയ മത്സ്യ ഇനങ്ങള്‍ ഭീകരമായ തകര്‍ച്ചയാണ് നേരിടുന്നത്. ദക്ഷിണാഫ്രിക്കന്‍ തീരമേഖലയിലെ 50 ശതമാനം മത്സ്യങ്ങളും വ്യാവസായിക മത്സ്യബന്ധനത്തെ തുടര്‍ന്ന് ഇപ്പോള്‍ തന്നെ അമിത ചൂഷണം നേരിടുകയാണ്. 
ഏറ്റവും രൂക്ഷമായി ചൂഷണം നേരിടുന്നത് അഞ്ച് ഇനം ചൂരകളാണ്, ചൈനയിലും ജപ്പാനിലുമുള്ള അബലോണ്‍, അറ്റ്‌ലാന്റിക്കിലെയും പസഫിക്കിലെയും കോഡു മത്സ്യങ്ങള്‍, അറ്റ്‌ലാന്റിക് ഹാട്രിബട്ട്, കരീബിയന്‍ കടലിലെ സ്‌പൈനിലോബ്‌സ്റ്റര്‍, മധ്യ-തെക്കെ അമേരിക്കയില്‍ കാണപ്പെടുന്ന മഹിമഹി, ഓറത്ത് റഫി, അറ്റ്‌ലാന്റിക് മത്തി, 70 ഇനം സ്രാവുകള്‍, റോക് ഫിഷ്, ഏഷ്യയിലെ കണവകള്‍ എന്നിവയെല്ലാം അമിത ചൂഷണത്തിന് വിധേയമാകുന്നവയാണ്. 

ശാസ്ത്ര സാങ്കേതികവിദ്യയുടെ അമിതപ്രയോഗമാണ് വ്യാവസായിക മത്സ്യബന്ധനം വിനാശകരമാകാന്‍ കാരണം. ഇതിന്റെ ഫലമായിട്ടാണ് മത്സ്യ സമ്പത്ത് അതിവേഗം ഇല്ലാതായിക്കൊണ്ടിരിക്കുന്നത്. ടണ്‍ കണക്കിന് മത്സ്യം പിടിച്ച് സൂക്ഷിക്കാനാവുന്ന ഭീമന്‍ കപ്പലുകളാണ് വ്യാവസായികാടിസ്ഥാനത്തില്‍ മത്സ്യബന്ധനം നടത്താന്‍ പല വികസിത രാജ്യങ്ങളും ഉപയോഗിക്കുന്നത്. 14,000 ടണ്‍ കേവുഭാരവും 140 മീറ്റര്‍ നീളവുമുള്ള അറ്റ്‌ലാന്റിക് ഡോണ്‍, ലോകത്തെ ഏറ്റവും വലിയ മത്സ്യബന്ധന കപ്പലായ റഷ്യയുടെ ലഫായത് തുടങ്ങിയ കപ്പലുകളെ തങ്ങളുടെ അതിര്‍ത്തിയില്‍ പ്രവേശിപ്പിക്കാന്‍ ലോകത്ത് ഒരു രാജ്യവും തയ്യാറല്ല. ഇത്തരം കപ്പലുകള്‍ രാജ്യാതിര്‍ത്തിയില്‍ കടന്നുകഴിഞ്ഞാല്‍ മത്സ്യ സമ്പത്ത് മൊത്തമായി ഊറ്റിയെടുക്കുമെന്നതുകൊണ്ടാണ് അവയെ രാജ്യങ്ങള്‍ അകറ്റിനിര്‍ത്തുന്നത്. ബ്രിട്ടന്റെ കൊര്‍ണേലിയസ് ഡ്രോലിക്, വെറോനിക്ക തുടങ്ങിയ കപ്പലുകള്‍ക്ക് പ്രതിദിനം 2000 ടണ്‍ മത്സ്യം പിടിച്ചു സൂക്ഷിക്കാനാവും. യൂറോപ്പിന്റെ സമുദ്രമേഖലയിലാകെ സഞ്ചരിച്ച് മത്സ്യബന്ധനം നടത്തി കപ്പലില്‍ വെച്ചുതന്നെ സംസ്‌കരിക്കുന്ന 39 ഫാക്ടറി വെസലുകളുമുണ്ട്. സ്വന്തം കടലുകള്‍ ശൂന്യമാകുമ്പോള്‍ മറ്റു രാജ്യങ്ങളിലും ഭൂഖണ്ഡങ്ങളിലും കടന്നുകയറി മത്സ്യബന്ധനം നടത്തുന്നത് ഇവയുടെ പതിവാണ്. ഗ്രീന്‍ലാന്‍ഡ് ഹാലിബട്ടിന്റെ തകര്‍ച്ചയെ തുടര്‍ന്ന് കാനഡ അവിടെ മത്സ്യബന്ധനം നിരോധിച്ചിരുന്നു. ഈ സമയത്ത് സ്‌പെയിനിന്റെ എസ്തായി എന്ന കപ്പല്‍ അവിടെ അതിക്രമിച്ച് കയറി മത്സ്യബന്ധനം നടത്തുകയും കാനഡ ഗണ്‍ബോട്ടുകള്‍ ഉപയോഗിച്ച് അത് പിടിച്ചെടുക്കുകയും ചെയ്തിരുന്നു. ആഗോളതലത്തില്‍ തന്നെ വിവാദമാകുകയും വലിയ ചര്‍ച്ചകള്‍ക്ക് വഴിവെക്കുകയും ചെയ്ത സംഭവമാണിത്. 

vessel
യൂറോപ്പിന്റെ സമുദ്രമേഖലയിലാകെ സഞ്ചരിച്ച് മത്സ്യബന്ധനം നടത്തി കപ്പലില്‍ വെച്ചുതന്നെ സംസ്‌കരിക്കുന്ന 39 ഫാക്ടറി വെസലുകളുമുണ്ട്. / Photo: Pixhere

ലാറ്റിനമേരിക്കന്‍ രാജ്യമായ പെറു ലോകത്ത് ഏറ്റവും കൂടുതല്‍ മത്സ്യം ലഭിച്ചിരുന്ന രാജ്യമായിരുന്നു അടുത്ത കാലം വരെ. നെത്തോലി (കൊഴുവ)യാണ് ഇവിടത്തെ പ്രധാന മത്സ്യ ഇനം. 1971-ല്‍ 1.02 കോടി ടണ്‍ നെത്തോലിയാണ് പെറുവില്‍ കിട്ടിയത്. 1976-ല്‍ അത് 40 ലക്ഷം ടണ്‍ ആയി കുറഞ്ഞു. വിവിധ രാജ്യങ്ങളിലെ കൂറ്റന്‍ യാനങ്ങള്‍ മത്സ്യ സമ്പത്ത് വാരിയെടുക്കാന്‍ എത്തിയതിനൊപ്പം എന്‍ നിനോ പ്രതിഭാസവും മത്സ്യ തകര്‍ച്ചയ്ക്ക് കാരണമായതായി ശാസ്ത്രലോകം ചൂണ്ടിക്കാട്ടുന്നു. 

ന്യൂഫൗണ്ട്‌ലാന്‍ഡിന്റെയും കാനഡയുടെയും തീരത്ത് കോഡ് മത്സ്യത്തിന്റെ അളവ് കുറഞ്ഞതിനെ തുടര്‍ന്ന് 1991-92 കാലത്ത് കോഡ് മത്സ്യത്തെ പിടിക്കുന്നത് കാനഡ നിരോധിച്ചിരുന്നു. 30 വര്‍ഷം കഴിഞ്ഞിട്ടും കോഡ് മത്സ്യത്തിന്റെ പുനരുത്പാദനം സാധ്യമായിട്ടില്ല. യൂറോപ്പിലെ ഗ്രേറ്റ് ലേക്കില്‍ ബ്ലൂവാള്‍ ഐ എന്ന മത്സ്യം 1950 വരെ പ്രതിവര്‍ഷം അഞ്ച് ലക്ഷം ടണ്ണോളം ഉത്പാദിപ്പിക്കപ്പെട്ടിരുന്നു. എന്നാല്‍ ഈ ഇനം 1980 ഓടെ അപ്രത്യക്ഷമായി. ഇംഗ്ലീഷ് ചാനലിന്റെ പരിസരത്ത് കാണപ്പെടുന്ന ഒരു ഇനം നങ്ക് (സോള്‍) ഇന്ന് നാശം നേരിടുകയാണ്. 

2014-2015 വര്‍ഷത്തില്‍ മാത്രം മത്തിയുടെ ലഭ്യതക്കുറവ് കാരണം 146 കോടി രൂപയുടെ നഷ്ടമുണ്ടായതായാണ് കണക്ക്. ഒരു വര്‍ഷത്തിനിടയില്‍ തൊഴില്‍ദിനങ്ങളില്‍ 28.2 ശതമാനവും വരുമാനത്തില്‍ 45.8 ശതമാനവും കുറവുണ്ടായിട്ടുണ്ട്. 

ചിലിയുടെ തീരത്തുനിന്ന് ദിനംപ്രതി 400 ടണ്‍ വീതം കിട്ടിയിരുന്ന ഒരിനം വങ്കട (ജാക്മാക്കറല്‍) അമിത മത്സ്യബന്ധത്തിന്റെ ഫലമായി 1990കളില്‍ ഇല്ലാതായി. ചിലിയുടെ തീരത്തു തന്നെയുണ്ടായിരുന്ന കാളാഞ്ചി (സീബാസ്സ്) അമിത ചൂഷണം കാരണം അപ്രത്യക്ഷമായി. 
ജര്‍മനിയുടെ തീരത്ത് കാണപ്പെട്ടിരുന്ന ഹാഡക് മത്സ്യം അമിത ചൂഷണത്തെ തുടര്‍ന്ന് അപ്രത്യക്ഷമായിരുന്നു. ഫലപ്രദമായ നിയന്ത്രണങ്ങളുടെ ഫലമായി അവ തിരിച്ചുവരുന്നതായുള്ള റിപ്പോര്‍ട്ടുകള്‍ വരുന്നുണ്ട്. 
അറ്റ്‌ലാന്റ്‌റിക് സമുദ്രത്തിലെ ബ്ലൂഫിന്‍ ട്യൂണ 2023 ഓടെ പൂര്‍ണമായും നശിക്കുമെന്നാണ് പഠനങ്ങള്‍ സൂചിപ്പിക്കുന്നത്. അറ്റ്‌ലാന്റിക്കിലെ അയല, കാലിഫോര്‍ണിയയിലെ ചാള, അലാസ്‌കയിലെ പൊള്ളോക്ക്, സ്‌കാന്‍ഡിനേവിയന്‍ രാജ്യങ്ങളിലെ ഹെറിംഗ് തുടങ്ങിയ മത്സ്യ ഇനങ്ങള്‍ കഴിഞ്ഞ ദശകങ്ങളില്‍ വലിയ വിനാശം നേരിട്ടവയാണ്. 

മത്തിയില്ലാതെ കേരള തീരം

കേരളത്തിലെ മത്സ്യ ഉത്പാദനം 2012-ല്‍ 8.39 ലക്ഷം ടണ്‍ ആയിരുന്നത് ഇപ്പോള്‍ 3.6 ലക്ഷം ടണ്ണായി കുറഞ്ഞിരിക്കുകയാണെന്നാണ് സെന്‍ട്രല്‍ മറൈന്‍ ഫിഷറീസ് റിസര്‍ച്ച് ഇന്‍സ്റ്റിറ്റ്യൂട്ട് (CMFRI) കണ്ടെത്തിയത്. മത്തിയുടെയും അയലയുടെയും ലഭ്യതയാണ് ഏറ്റവുമധികം കുറഞ്ഞത്. 2012-ല്‍ മത്തിയുടെ ലഭ്യത 3.9 ലക്ഷം ടണ്ണായിരുന്നു. 2013-ല്‍ അത് 2.46 ലക്ഷം ടണ്ണായി കുറഞ്ഞു. 2014-ല്‍ 1.5 ലക്ഷം ടണ്ണായും 2015-ല്‍ 68431 ടണ്ണായും കുറഞ്ഞു. 2016-ല്‍ വീണ്ടും കുറഞ്ഞ് 45958 ടണ്ണായി. ഇതേസമയത്ത് ആകെ മത്സ്യലഭ്യത 5.2 ലക്ഷം ടണ്ണായിരുന്നു. 2017-ല്‍ മത്സ്യലഭ്യതയില്‍ നേരിയ വര്‍ധനയുണ്ടായി. 1.27 ലക്ഷം ടണ്‍ മത്തി ലഭിച്ചപ്പോള്‍ 5.85 ലക്ഷം ടണ്ണായിരുന്നു ആകെ മത്സ്യലഭ്യത. എന്നാല്‍ 2018 മുതല്‍ വീണ്ടും മത്സ്യ സമ്പത്ത് കുറയുകയായിരുന്നു. 2018-ല്‍ 77093 ടണ്‍ മത്തിയാണ് കേരള തീരത്തുനിന്ന് കിട്ടിയത്. ആകെ കിട്ടിയത് 6.43 ലക്ഷം ടണ്‍ മത്സ്യവും. 2019-ല്‍ മത്തിയുടെ അളവ് 44320 ടണ്ണായും ആകെ മത്സ്യത്തിന്റെ അളവ് 5.44 ലക്ഷം ടണ്ണായും കുറഞ്ഞുയ 2020-ല്‍ 13154 ടണ്‍ മത്തി മാത്രമാണ് കേരള തീരത്തുനിന്ന് പിടിച്ചത്. ആകെ മത്സ്യ ലഭ്യത 3.6 ലക്ഷം ടണ്‍. 

mathi
കേരളത്തില്‍ ഒന്നരലക്ഷത്തോളം മത്സ്യത്തൊഴിലാളികളാണ് കടലില്‍ പോകുന്നത്. ഇതില്‍ 1,10,000 പേരും മത്തിയെ കേന്ദ്രീകരിച്ച് ഉപജീവനം നടത്തുന്നവരാണ്. / Photo: Pixabay

കാലാവസ്ഥാ വ്യതിയാനത്തിന്റെ ഫലമായി കേരളതീരം അമിതമായി ചൂടാകുന്നതാണ് മത്സ്യസമ്പത്ത് കുറയാനുള്ള കാരണം. കേരളതീരത്തെ അമിതമായ ചൂട് കാരണം മത്തി ശ്രീലങ്കന്‍, തമിഴ്‌നാട് തീരങ്ങളിലേക്ക് നീങ്ങുകയാണ്. താപനില 29 ഡിഗ്രിയില്‍ കൂടുതലായാല്‍ മത്തിക്ക് പിടിച്ചുനില്‍ക്കാനാകില്ല. കേരളത്തിലെ തീരക്കടലിലെ ശരാശരി താപനില 32 ഡിഗ്രിയാണ്.  

മത്തിയുടെ ഉത്പാദനത്തിലുണ്ടായ കുറവ് കേരളത്തിലെ മത്സ്യമേഖലയില്‍ വലിയ തകര്‍ച്ചയാണുണ്ടാക്കിയത്. കേരളത്തില്‍ ഒന്നരലക്ഷത്തോളം മത്സ്യത്തൊഴിലാളികളാണ് കടലില്‍ പോകുന്നത്. ഇതില്‍ 1,10,000 പേരും മത്തിയെ കേന്ദ്രീകരിച്ച് ഉപജീവനം നടത്തുന്നവരാണ്. 2014-2015 വര്‍ഷത്തില്‍ മാത്രം മത്തിയുടെ ലഭ്യതക്കുറവ് കാരണം 146 കോടി രൂപയുടെ നഷ്ടമുണ്ടായതായാണ് കണക്ക്. ഒരു വര്‍ഷത്തിനിടയില്‍ തൊഴില്‍ദിനങ്ങളില്‍ 28.2 ശതമാനവും വരുമാനത്തില്‍ 45.8 ശതമാനവും കുറവുണ്ടായിട്ടുണ്ട്. 
കേരളത്തില്‍ 1942, 1964, 1994 വര്‍ഷങ്ങലിലും മത്തി തകര്‍ച്ച നേരിട്ടിരുന്നു. 1942-ലെ തകര്‍ച്ചയെ തുടര്‍ന്ന് ബ്രിട്ടീഷ് സര്‍ക്കാര്‍ മത്തി പിടിത്തം നിരോധിച്ചിരുന്നു. പിന്നീട് 1952 ഓടെയാണ് ഉത്പാദനം പൂര്‍വസ്ഥിതിയിലായത്. മത്തിയുടെ പുനരുത്പാദനത്തിന് ആറുമുതല്‍ എട്ടുവര്‍ഷം വരെ വേണ്ടിവരും. 

ജനുവരിയില്‍ മത്സ്യത്തൊഴിലാളികള്‍ക്കുള്ള റേഷന്‍ മണ്ണെണ്ണയുടെ വില ലിറ്ററിന് 62.5 രൂപയായിരുന്നു. ഇപ്പോള്‍ 84 രൂപയായി. തമിഴ്‌നാട്ടില്‍ 16-20 രൂപ നിരക്കിലാണ് സര്‍ക്കാര്‍ മത്സ്യത്തൊഴിലാളികള്‍ക്ക് മണ്ണെണ്ണ നല്‍കുന്നത്.

കേരളത്തെ വലച്ച് ഇന്ധന വിലയും

മത്സ്യ ലഭ്യതക്കുറവിനൊപ്പം ഇന്ധന വില വര്‍ധനയും കേരളത്തിലെ മത്സ്യമേഖലയെ പ്രതിസന്ധിയിലാക്കുന്നു. കേരളതീരത്ത് മത്തിയുടെ അളവ് കുറയുമ്പോള്‍ ആഴക്കടലില്‍ പോയാണ് ചെറുകിട ബോട്ടുകള്‍ മത്സ്യബന്ധനം നടത്തിയിരുന്നത്. എന്നാല്‍ ഇപ്പോള്‍ ഇന്ധന വില അനിയന്ത്രിതമായി വര്‍ധിക്കുന്നതുകാരണം പുറംകടലില്‍ പോകുന്നത് തൊഴിലാളികള്‍ക്ക് നഷ്ടമാണ്. നാഗപട്ടണം, കടലൂര്‍, രാമേശ്വരം ഭാഗങ്ങളില്‍ പോയി മത്തി പിടിച്ചിരുന്ന ഇന്‍ബോര്‍ഡ് വള്ളങ്ങള്‍ ഇപ്പോള്‍ തീരത്ത് പിടിച്ചിട്ടിരിക്കുകയാണ്. ജനുവരിയില്‍ മത്സ്യത്തൊഴിലാളികള്‍ക്കുള്ള റേഷന്‍ മണ്ണെണ്ണയുടെ വില ലിറ്ററിന് 62.5 രൂപയായിരുന്നു. ഇപ്പോള്‍ 84 രൂപയായി. തമിഴ്‌നാട്ടില്‍ 16-20 രൂപ നിരക്കിലാണ് സര്‍ക്കാര്‍ മത്സ്യത്തൊഴിലാളികള്‍ക്ക് മണ്ണെണ്ണ നല്‍കുന്നത്. മത്സ്യത്തൊഴിലാളികള്‍ക്ക് 25 രൂപയ്ക്ക് മണ്ണെണ്ണ നല്‍കുമെന്നായിരുന്നു 2021-ലെ ബജറ്റില്‍ കേരള സര്‍ക്കാര്‍ പ്രഖ്യാപിച്ചിരുന്നത്. 

fishing
. കേരളതീരത്ത് മത്തിയുടെ അളവ് കുറയുമ്പോള്‍ ആഴക്കടലില്‍ പോയാണ് ചെറുകിട ബോട്ടുകള്‍ മത്സ്യബന്ധനം നടത്തിയിരുന്നത്. / Photo: Wikimedia Commons

20 വര്‍ഷം മുമ്പ് കേരളത്തിന് കേന്ദ്രവിഹിതമായി 28,000 കിലോ ലിറ്റര്‍ മണ്ണെണ്ണയാണ് ലഭിച്ചിരുന്നത്. ഇപ്പോള്‍ മൂന്നുമാസത്തേക്കുള്ള വിഹിതമായി 2000 കിലോ ലിറ്റര്‍ മണ്ണെണ്ണയാണ് കഴിഞ്ഞ ഏപ്രിലില്‍ കിട്ടിയത്. കേരളത്തില്‍ 14322 മണ്ണെണ്ണ എന്‍ജിനുകള്‍ പ്രവര്‍ത്തിക്കുന്നുണ്ടെന്നാണ് സര്‍ക്കാരിന്റെ കണക്ക്. ഒരു എന്‍ജിന് ഒരുവര്‍ഷം 2000 ലിറ്റര്‍ മണ്ണെണ്ണ വേണം. എന്നാല്‍ ഇപ്പോള്‍ ലഭിക്കുന്നത് 129 ലിറ്റര്‍ മാത്രമാണെന്ന് കേരള മത്സ്യത്തൊഴിലാളി ഐക്യവേദി പ്രസിഡന്റ് ചാള്‍സ് ജോര്‍ജ് പറഞ്ഞു. വര്‍ഷത്തില്‍ 120 ദിവസം തൊഴിലുണ്ടായിരുന്ന തൊഴിലാളികള്‍ക്ക് ഇപ്പോള്‍ 35-40 ദിവസം മാത്രമാണ് കിട്ടുന്നതെന്നും അദ്ദേഹം പറഞ്ഞു. 

കടലിലെ മരണഭിത്തി

മത്സ്യബന്ധനരീതികളാണ് പലപ്പോഴും മത്സ്യങ്ങളെ അപകടത്തിലാക്കുന്നതെന്ന് പറയാറുണ്ട്. 12 ജംബോ ജെറ്റുകള്‍ക്ക് ഒന്നിച്ച് കയറാവുന്ന അത്രയും വലിപ്പമുള്ള ട്രോള്‍ വലകളാണ് യൂറോപ്പിലെ ചില കൂറ്റന്‍ യാനങ്ങള്‍ മീന്‍പിടിത്തത്തിന് ഉപയോഗിക്കുന്നത്. നമ്മുടെ നാട്ടിലെ ഗില്‍നെറ്റ് വല പോലെയുള്ള ഒരു വല ജപ്പാനില്‍ ഉപയോഗിക്കുന്നുണ്ട്. ഡ്രിഫ്റ്റ് നെറ്റ് എന്നറിയപ്പെടുന്ന ഇത്തരം വലകളെ "മരണത്തിന്റെ ഭിത്തി' എന്നാണ് വിളിക്കുന്നത്. 50 മുതല്‍ 60 കിലോമീറ്റര്‍ വരെ നീളമുള്ള ഈ വലകളില്‍ കുടുങ്ങി ആയിരക്കണക്കിന് കടലാമകള്‍ക്കും സസ്തനികള്‍ക്കും ഡോള്‍ഫിനുകള്‍ക്കും തിമിംഗലങ്ങള്‍ക്കും ജീവന്‍ നഷ്ടപ്പെടാറുണ്ട്. 

മത്സ്യസമ്പത്ത് കുറഞ്ഞുകൊണ്ടിരിക്കുകയാണെങ്കിലും മത്സ്യ ഉപഭോഗം കുതിച്ചുകയറുകയാണ്. 2002-ല്‍ ആഗോള മത്സ്യ ഉപഭോഗം 47 ദശലക്ഷം ടണ്ണായിരുന്നു. 2015-2022-ല്‍ 179 ദശലക്ഷം ടണ്ണായി ഉയര്‍ന്നു.

ട്യൂണയെ പിടിക്കാന്‍ ഉപയോഗിക്കുന്നത് 100 മുതല്‍ 120 കിലോമീറ്റര്‍ വരെ നീളമുള്ള ലോങ് ലൈനര്‍ വലകളാണ്. ലോകത്തെ ഏറ്റവും നീളമുള്ള ചിറകുള്ള പക്ഷികളായ ആല്‍ബട്രോസ് പക്ഷികളടക്കം ഈ വലയില്‍ കുടുങ്ങി മരണമടയുന്നു. ഇതുവരെ 44,000 ആല്‍ബട്രോസ് പക്ഷികള്‍ ഇത്തരം വലകളില്‍ കുടുങ്ങി മരിച്ചിട്ടുണ്ട്. മരണക്കുരുക്കാകുന്ന കൂറ്റന്‍ വലകളുപയോഗിച്ചുള്ള വ്യാവസായിക മത്സ്യബന്ധനം മത്സ്യങ്ങള്‍ക്ക് മാത്രമല്ല ഭീഷണിയാകുന്നത്. സമുദ്രത്തിലെ മറ്റു ജീവികളെയും നശിപ്പിക്കുന്ന വ്യാവസായിക മത്സ്യബന്ധനം പാരിസ്ഥിതിക സന്തുലനം തന്നെ തകരാറിലാക്കുന്നു. 
പ്രതിവര്‍ഷം പിടിക്കുന്ന 80-85 ദശലക്ഷം ടണ്‍ മത്സ്യങ്ങളില്‍ 25-30 ദശലക്ഷം ടണ്‍ മത്സ്യങ്ങളെ വന്‍കിട യാനങ്ങള്‍ പുറത്തെറിഞ്ഞ് കളയുന്നുണ്ട്. ഇവയെ ഡിസ്‌കാര്‍ഡ്‌സ് എന്നാണ് വിളിക്കുന്നത്. വലിയ മത്സ്യങ്ങളെ അമിതമായി പിടിക്കുന്നതിന്റെ ഫലമായി അവയുടെ ഇര മത്സ്യങ്ങളും ജെല്ലി മത്സ്യങ്ങളും രോഗവാഹികളായ ജീവികളും സമുദ്രങ്ങളില്‍ പെരുകുന്ന സ്ഥിതിയുമുണ്ടാകുന്നുണ്ട്. 

fish3
വലിയ മത്സ്യങ്ങളെ അമിതമായി പിടിക്കുന്നതിന്റെ ഫലമായി അവയുടെ ഇര മത്സ്യങ്ങളും ജെല്ലി മത്സ്യങ്ങളും രോഗവാഹികളായ ജീവികളും സമുദ്രങ്ങളില്‍ പെരുകുന്ന സ്ഥിതിയുമുണ്ടാകുന്നുണ്ട്. / Photo: Flickr

മത്സ്യസമ്പത്ത് കുറഞ്ഞുകൊണ്ടിരിക്കുകയാണെങ്കിലും മത്സ്യ ഉപഭോഗം കുതിച്ചുകയറുകയാണ്. 2002-ല്‍ ആഗോള മത്സ്യ ഉപഭോഗം 47 ദശലക്ഷം ടണ്ണായിരുന്നു. 2015-2022-ല്‍ 179 ദശലക്ഷം ടണ്ണായി ഉയര്‍ന്നു. വ്യാവസായിക മത്സ്യബന്ധനം സൃഷ്ടിക്കുന്ന പ്രതിസന്ധികള്‍ ചൂണ്ടിക്കാണിക്കപ്പെടുന്നുണ്ടെങ്കിലും വികസിത രാഷ്ട്രങ്ങള്‍ അത് ഗൗനിക്കുന്നേയില്ലെന്നാണ് അവരുടെ പ്രവൃത്തികള്‍ വ്യക്തമാക്കുന്നത്. അവശേഷിക്കുന്ന മത്സ്യസമ്പത്ത് കൂടി ചൂഷണം ചെയ്യാനുള്ള ശ്രമങ്ങള്‍ തന്നെയാണ് അവര്‍ നടത്തുന്നത്. മത്സ്യബന്ധനത്തിന് പുതിയ രീതികള്‍ അവലംബിക്കുന്നതൊക്കെ ഇതിന്റെ ഭാഗമാണ്. അക്വാകള്‍ച്ചറിലൂടെ മത്സ്യ ഉത്പാദനം കൂട്ടാനുള്ള ശ്രമങ്ങളും വന്‍കിട രാഷ്ട്രങ്ങള്‍ നടത്തുന്നുണ്ട്. എന്നാല്‍ ഇത് പ്രശ്‌നങ്ങള്‍ കൂടുതല്‍ രൂക്ഷമാക്കുകയേയുള്ളൂ എന്നാണ് വിദഗ്ധരുടെ അഭിപ്രായം. ലോകത്ത് ഏറ്റവും കൂടുതല്‍ ഡിമാന്‍ഡുള്ള സാല്‍മണ്‍ എന്ന മത്സ്യം അക്വാകള്‍ച്ചറിലൂടെ ഒരു കിലോഗ്രാം വളരണമെങ്കില്‍ നാല് കിലോഗ്രാം ചെറുമത്സ്യം തീറ്റയായി നല്‍കണം. നമ്മുടെ നാട്ടില്‍ ഒരു കിലോഗ്രാം ചെമ്മീന്‍ അക്വാകള്‍ച്ചറായി വളര്‍ത്താന്‍ നാല് കിലോഗ്രാം മത്തി നല്‍കുന്നതുപോലെ തന്നെ. 

പാര്‍ട്ണര്‍ഷിപ്പ് കൊള്ള

ആഫ്രിക്കന്‍ തീരക്കടലുകളില്‍ നടക്കുന്ന മത്സ്യക്കൊള്ളയുടെ പുതിയ രൂപമാണ് ഫിഷറീസ് പാര്‍ട്ട്ണര്‍ഷിപ്പ് എഗ്രിമെന്റ് (FPA). സമ്പന്ന രാഷ്ട്രങ്ങള്‍ ദരിദ്ര ആഫ്രിക്കന്‍ രാജ്യങ്ങള്‍ക്ക് പണം നല്‍കി അവരുടെ കടലിലെ മത്സ്യങ്ങളെ പിടിക്കുന്നതിനുവേണ്ടി ഉണ്ടാക്കുന്നതാണ് ഫിഷറീസ് പാര്‍ട്ണര്‍ഷിപ്പ് എഗ്രിമെന്റ്. ദരിദ്ര രാജ്യങ്ങള്‍ പലപ്പോഴും ഇത്തരം കെണികളില്‍ പെട്ടുപോകുന്നത് അവരുടെ മത്സ്യ സമ്പത്തിനെയാണ് ഇല്ലാതാക്കുന്നത്. അതോടെ ആ രാജ്യങ്ങളിലെ മത്സ്യബന്ധനം കുറയുകയും മത്സ്യ അനുബന്ധ തൊഴില്‍മേഖലകള്‍ തകരുകയും ചെയ്യും. ഇത് രാജ്യത്തെ സാമ്പത്തികമായി തളര്‍ത്തും. 2006-2012 കാലഘട്ടത്തില്‍ ആഫ്രിക്കന്‍ രാജ്യമായ സെനഗലിന് 14.2 കോടി യൂറോ ലൈസന്‍സ് ഫീയായി നല്‍കി സ്‌പെയിനിലെ കപ്പല്‍ കമ്പനികള്‍ അവിടെ പ്രവര്‍ത്തനം ആരംഭിച്ചു. ഇതില്‍ 12.8 കോടി യൂറോയും സ്പാനിഷ് സര്‍ക്കാര്‍ സബ്‌സിഡിയായി നല്‍കിയതാണ്. 36 സ്പാനിഷ് ട്രോളറുകള്‍ പ്രതിവര്‍ഷം 2.35 ലക്ഷം ടണ്‍ മത്സ്യം പിടിച്ചു. സെനഗലിലെ പിറോഗസ് എന്ന നാടന്‍ ബോട്ടുകളുടെ മത്സ്യ ലഭ്യത നേര്‍പകുതിയായി കുറഞ്ഞു. മത്സ്യ സംസ്‌കരണശാലകളിലെ 60 ശതമാനം തൊഴിലാളികളെയും പിരിച്ചുവിട്ടു. പ്രാദേശിക മത്സ്യത്തൊഴിലാളികള്‍ ബോട്ടുകള്‍ തൂക്കിവിറ്റു. പ്രതിഷേധങ്ങളെ തുടര്‍ന്ന് സെനഗല്‍ സ്പാനിഷ് കമ്പനികളുമായുള്ള കരാര്‍ റദ്ദാക്കി. തൊട്ടടുത്ത രാജ്യങ്ങളായ മൗറിട്ടാനിയ, മൊറോക്കോ, സിയെറ ലിയോണ്‍, കേപ്‌വെര്‍ദ തുടങ്ങിയ രാജ്യങ്ങളിലും ഇതുതന്നെയാണ് സംഭവിക്കുന്നത്. 

ലോകം ഉറ്റുനോക്കുന്ന സമ്മേളനം

കടുത്ത പ്രതിസന്ധിയിലൂടെ മത്സ്യമേഖല കടന്നുപോകുമ്പോള്‍, ആഫ്രിക്കന്‍ രാജ്യമായ നൈജീരിയയില്‍ നിന്നുള്ള പ്രതിനിധി അധ്യക്ഷയായ ശേഷം നടക്കുന്ന ലോക വ്യാപാര സംഘടനയുടെ ആദ്യ സമ്മേളനത്തെ ഏറെ പ്രതീക്ഷയോടെയാണ് ലോകം ഉറ്റുനോക്കുന്നത്. മത്സ്യ മേഖലയെ ദോഷകരമായി ബാധിക്കുന്ന സബ്‌സിഡികള്‍ നിര്‍ത്തലാക്കണമെന്നാവശ്യപ്പെടുന്ന 15 അംഗ രാഷ്ട്രങ്ങളുടെ സംയുക്ത പ്രസ്താവന സമ്മേളനത്തിന് മുന്നോടിയായി പുറത്തുവന്നിട്ടുണ്ട്. യൂറോപ്യന്‍ യൂണിയന്‍, ചിലി, നോര്‍വെ തുടങ്ങിയ വികസിതവും അവികസിതവുമായ രാജ്യങ്ങള്‍ ഈ പ്രസ്താവനയില്‍ ഒപ്പുവെച്ചിട്ടുണ്ട്. മേയ് 16-ന് 16 രാജ്യങ്ങളില്‍ നിന്നുള്ള 200 സംഘടനകള്‍ ലോക വ്യാപാര സംഘടനയുടെ ഡയറക്ടര്‍ ജനറല്‍ ഗോസി ഒകോഞ്ചോ ഇവിയേലയെ കണ്ട് ഈ ആവശ്യം ഉന്നയിച്ച് നിവേദനവും നല്‍കിയിട്ടുണ്ട്. നൈജീരിയക്കാരിയായ കറുത്ത വംശജയുടെ സ്ഥാനാരോഹണം തടയാന്‍ യു.എസിലെ ഡോണള്‍ഡ് ട്രംപ് ഭരണകൂടം ശ്രമം നടത്തിയിരുന്നു. അതെല്ലാം അതിജീവിച്ച് സ്ഥാനമേറ്റെടുത്ത പിന്നാക്ക രാജ്യത്തിന്റെ പ്രതിനിധിയായ ഇവിയേല വികസിത രാജ്യങ്ങളുടെ ഇടപെടലുകളെ അതിജീവിച്ച് പ്രതിസന്ധികളെ എങ്ങനെ നേരിടുമെന്നാണ് സമ്മേളനം പടിവാതില്‍ക്കലെത്തുമ്പോള്‍ സംശയങ്ങളുയരുന്നത്. 

wto iweala
ലോക വ്യാപാര സംഘടന ഡയറക്ടര്‍ ജനറല്‍ ഗോസി ഒകോഞ്ചോ ഇവിയേല / Photo: wto.org

ജൂണ്‍ 12 മുതല്‍ 15 വരെ സ്വിറ്റ്‌സര്‍ലന്‍ഡിലെ ജനീവയിലാണ് സമ്മേളനം നടക്കുന്നത്. 164 രാജ്യങ്ങള്‍ അംഗങ്ങളായിട്ടുള്ള ലോക വ്യാപാര സംഘടനയുടെ 12-ാമത് മന്ത്രിതല സമ്മേളനമാണ് നടക്കാന്‍ പോകുന്നത്. 2017-ല്‍ അര്‍ജന്റീനയിലെ ബ്യൂണസ് അയേഴ്‌സിലായിരുന്നു 11-ാം സമ്മേളനം നടന്നത്. ഗാട്ട് കരാറിനെ തുടര്‍ന്ന് 1995-ലാണ് ലോക വ്യാപാര സംഘടന രൂപംകൊണ്ടത്. രണ്ടുവര്‍ഷം കൂടുമ്പോഴാണ് ലോക വ്യാപാര സംഘടയുടെ സമ്മേളനം നടക്കുന്നത്. കോവിഡ്-19 മഹാമാരിയുടെ വ്യാപനത്തെ തുടര്‍ന്ന് രണ്ടുതവണ സമ്മേളനം മാറ്റിവെക്കപ്പെട്ടിരുന്നു. 2008-ല്‍ അമേരിക്കയില്‍ നിന്നാംരംഭിച്ച സാമ്പത്തിക മാന്ദ്യം, ജപ്പാനിലെ സുനാമിയെ തുടര്‍ന്ന് ഫുകുഷിമ ആണവനിലയത്തിലുണ്ടായ അപകടം സൃഷ്ടിച്ച മേഖലയിലെ ഉത്പാദന സ്തംഭനം, 2019-ല്‍ ചൈനയിലെ വുഹാനില്‍ നിന്ന് തുടങ്ങിയ കോവിഡ് വ്യാപനം തുടങ്ങി ഒട്ടേറെ പ്രശ്‌നങ്ങളുടെ ഫലമായി അംഗരാജ്യങ്ങളെല്ലാം കടുത്ത സാമ്പത്തിക പ്രതിസന്ധിയിലായിരിക്കെയാണ് സമ്മേളനം നടക്കുന്നത്. 

2001-ല്‍ ദോഹയില്‍ നടന്ന മന്ത്രിതല സമ്മേളനത്തിലാണ് ആദ്യമായി മത്സ്യ സബ്‌സിഡി അജണ്ടയില്‍ വന്നത്. സബ്‌സിഡികള്‍ വെട്ടിച്ചുരുക്കാനുള്ള പൊതു പെരുമാറ്റച്ചട്ടം ഈ സമ്മേളനത്തില്‍ വെച്ച് രൂപീകരിച്ചു.

സമ്മേളനത്തിന് മുന്നോടിയായി വിവിധ മേഖലകളില്‍ വിവിധ രാഷ്ട്രങ്ങളുടെ സംയുക്ത പ്രസ്താനവകള്‍ പുറത്തിറക്കപ്പെട്ടിട്ടുണ്ട്. സേവന മേഖലയിലെ 90 ശതമാനം വ്യാപാരവും കൈകാര്യം ചെയ്യുന്ന 65 രാജ്യങ്ങള്‍ പുറത്തിറക്കിയ പ്രസ്താവനയാണ് അതില്‍ ആദ്യത്തേത്. ലിംഗസമത്വത്തിന്റെ പ്രാധാന്യം വിശദീകരിച്ചുകൊണ്ട് 89 രാഷ്ട്രങ്ങളുടെ പ്രസ്താവനയും ചെറുകിട സംരംഭങ്ങളുമായി (എം.എസ്.എം.ഇ.) ബന്ധപ്പെട്ട് 64 രാഷ്ട്രങ്ങളുടെ പ്രസ്താവനയും പുറത്തുവന്നു. 
വാണിജ്യ-വ്യാപാര മേഖലയിലെ പുതിയ പ്രതിസന്ധികള്‍, ഐ.ടി. മേഖലയിലെ പുതിയ സാധ്യതകള്‍, കോവിഡ് പ്രതിരോധ മരുന്നുകളുടെ വിപണനവുമായി ബന്ധപ്പെട്ട പ്രശ്‌നങ്ങള്‍, ഭക്ഷ്യസുരക്ഷയുമായി ബന്ധപ്പെട്ട പ്രശ്‌നങ്ങള്‍, കലാവസ്ഥാ വ്യതിയാനം, മത്സ്യമേഖലയിലെ സബ്‌സിഡിയുമായി ബന്ധപ്പെട്ട പ്രശ്‌നങ്ങള്‍ തുടങ്ങിയവയാണ് സമ്മേളനത്തിലെ പ്രധാന അജണ്ടകള്‍. 

മത്സ്യമേഖല- ലോക വ്യാപാര സമ്മേളനത്തില്‍

മത്സ്യമേഖലയിലെ സബ്‌സിഡിയുമായി ബന്ധപ്പെട്ട പ്രശ്‌നങ്ങള്‍ മുമ്പും ലോക വ്യാപാര സംഘടനയുടെ സമ്മേളനത്തില്‍ ചര്‍ച്ചയായിട്ടുണ്ട്. 2001-ല്‍ ദോഹയില്‍ നടന്ന മന്ത്രിതല സമ്മേളനത്തിലാണ് ആദ്യമായി മത്സ്യ സബ്‌സിഡി അജണ്ടയില്‍ വന്നത്. സബ്‌സിഡികള്‍ വെട്ടിച്ചുരുക്കാനുള്ള പൊതു പെരുമാറ്റച്ചട്ടം ഈ സമ്മേളനത്തില്‍ വെച്ച് രൂപീകരിച്ചു. 2005-ലെ ഹോങ്കോങ് സമ്മേളനത്തില്‍ അമിത ചൂഷണത്തെ സഹായിക്കുന്ന സബ്‌സിഡികള്‍ നിര്‍ത്തലാക്കാനുള്ള തീരുമാനമുണ്ടായി. 2017-ലെ ബ്യൂണസ് അയേഴ്‌സ് സമ്മേളനത്തില്‍ ഐക്യരാഷ്ട്ര സംഘടനയുടെ 2015-ലെ സുസ്ഥിര വികസനലക്ഷ്യം 2020-നകം നടപ്പാക്കാന്‍ തീരുമാനിച്ചു. 2030-നകം ലക്ഷ്യം കൈവരിക്കുമെന്നാണ് 2015-ല്‍ നടന്ന ഐക്യരാഷ്ട്ര സംഘടനയുടെ സുസ്ഥിര വികസന ലക്ഷ്യവുമായി ബന്ധപ്പെട്ട സമ്മേളനത്തില്‍ പ്രഖ്യാപിക്കപ്പെട്ടത്. ഇതിലെ 14-ാം ഭാഗം സമുദ്ര ജീവികളുടെ സുസ്ഥിര വികസനവുമായി ബന്ധപ്പെട്ടതാണ്. മത്സ്യമേഖലയിലെ സബ്‌സിഡിയെ സംബന്ധിച്ചതാണ് 14-ാം ഭാഗത്തിലെ ആറാം സെക്ഷന്‍. അമിത ഉത്പാദനത്തിനും അമിത മത്സ്യബന്ധനത്തിനും ഇടയാക്കുന്ന എല്ലാ സബ്‌സിഡികളും 2020-ലെ ലോക വ്യാപാര സംഘടനയുടെ സമ്മേളനത്തോടെ നിര്‍ത്തലാക്കണമെന്നാണ് ഇതില്‍ പറയുന്നത്. അതേസമയം, വികസ്വരവും അവികസിതവുമായ രാഷ്ട്രങ്ങളുടെ പിന്നാക്കാവസ്ഥ മറികടക്കാന്‍ അവ തുടര്‍ന്നും നടപ്പാക്കാവുന്നതാണന്നും ഇതില്‍ പറയുന്നുണ്ട്. 

unsdg
2015-ല്‍ പ്രഖ്യാപിച്ച ഐക്യരാഷ്ട്ര സംഘടനയുടെ സുസ്ഥിര വികസന ലക്ഷ്യം/ Photo: un.org

ലോക വ്യാപാര സംഘടനയുടെ 12-ാം സമ്മേളനത്തിന് മുന്നോടിയായി 2021 നവംബര്‍ 30 മുതല്‍ ഡിസംബര്‍ വരെ ജനീവയില്‍ നടന്ന മന്ത്രിതല യോഗം മത്സ്യമേഖലയിലെ സബ്‌സിഡിയുമായി ബന്ധപ്പെട്ട് ഒരു കരട് രേഖ തയ്യാറാക്കിയിട്ടുണ്ട്. അനധികൃതമായ മത്സ്യബന്ധനം തടയുക, വ്യാവസായിക മത്സ്യബന്ധനം നിരുത്സാഹപ്പെടുത്തുക, അവയ്ക്കുള്ള സ്ബ്‌സിഡി നിര്‍ത്തലാക്കുക തുടങ്ങിയ കാര്യങ്ങള്‍ രേഖയില്‍ ഉള്‍പ്പെടുത്തിയിട്ടുണ്ട്. വികസ്വര, പിന്നാക്ക രാജ്യങ്ങളിലെ പരമ്പരാഗത സമൂഹത്തിന് പ്രത്യേക പരിഗണന നല്‍കണമെന്ന് രേഖയില്‍ വ്യക്തമാക്കുന്നുണ്ട്. എന്നാല്‍ ചില വികസിത രാജ്യങ്ങള്‍ തന്നെ തങ്ങള്‍ക്ക് വികസ്വര രാഷ്ട്രങ്ങളുടെ പദവി നല്‍കണമെന്ന്  ആവശ്യപ്പെട്ടിരിക്കുകയാണ്. 

കഴിഞ്ഞ വര്‍ഷം പ്രഖ്യാപിക്കപ്പെട്ട ഇന്ത്യയുടെ ബ്ലൂ ഇക്കോണമി നയരഖയും ഇപ്പോള്‍ അവതരിപ്പിക്കാന്‍ പോകുന്ന കേന്ദ്ര ഫിഷറീസ് ബില്ലും മത്സ്യ സബ്‌സിഡി വിഷയത്തില്‍ നിലവിലെ നയത്തിന് വിരുദ്ധമാണ്.

മത്സ്യമേഖലയ്ക്ക് നല്‍കുന്ന സബ്‌സിഡികള്‍ നിര്‍ത്തലാക്കുന്നതിന് ഡബ്ല്യു.ടി.ഒ.യിലെ കൊളംബിയയുടെ അംബാസഡര്‍ സാന്റിയാഗോ വില്‍സ് അധ്യക്ഷനായ സമിതി 2021 നവംബര്‍ 24-നാണ് കരട് കരാര്‍ തയ്യാറാക്കിയത്. 2022 മേയ് 16 മുതല്‍ 20 വരെയുള്ള "മത്സ്യവാര'ത്തില്‍ വിവിധ രാജ്യങ്ങളുമായുള്ള സമിതിയുടെ ചര്‍ച്ച പൂര്‍ത്തിയായി. ജനീവ സമ്മേളനത്തില്‍ ഇതില്‍ ഏതൊക്കെ വിഷയത്തില്‍ സമവായമുണ്ടാക്കാനാകുമെന്നതാണ് പ്രധാനം. 2020-ല്‍ നടപ്പാക്കേണ്ട കരാറാണിത്. കോവിഡിനെ തുടര്‍ന്ന് ഡബ്ല്യു.ടി.ഒ. സമ്മേളനം നീണ്ടുപോയതിനാലാണ് വൈകുന്നത്. നഷ്ടപ്പെടുന്ന ഓരോ ദിവസവും അത്രയും മത്സ്യങ്ങളെ കൂടുതല്‍ പിടിക്കുകയും മത്സ്യസങ്കേതങ്ങള്‍ നശിക്കുകയുമാണെന്ന് സാന്റിയാഗോ വില്‍സ് പറയുന്നു. മത്സ്യമേഖലയിലെ പ്രതിസന്ധി വര്‍ധിക്കുന്നതിനൊപ്പം മാനവരാശിയും പ്രതിസന്ധിയിലാവുകയാണെന്നും അദ്ദേഹം ഓര്‍മിപ്പിക്കുന്നു. 

ഇനിയും നോക്കി നില്‍ക്കാനാകില്ല

ലോകത്തെ എല്ലാ രാജ്യങ്ങളെയും ബാധിക്കുന്ന പ്രശ്‌നമാണ് മത്സ്യമേഖലയിലെ പ്രതിസന്ധി. അത് ഇനിയും കണ്ടില്ലെന്ന് നടിച്ച് മുന്നോട്ടുപോകാന്‍ ലോകരാജ്യങ്ങള്‍ക്കാകില്ല. 2001-ലെ ദോഹ സമ്മേളനത്തില്‍ തന്നെ മത്സ്യമേഖലയിലെ സബ്‌സിഡി വെട്ടിച്ചുരുക്കാനുള്ള പൊതു പെരുമാറ്റച്ചട്ടം ഉണ്ടാക്കിയെങ്കിലും അത് ഒരുതരത്തിലുള്ള മാറ്റവുമുണ്ടാക്കിയിട്ടില്ലെന്നതാണ് യാഥാര്‍ഥ്യം. അമിത ചൂഷണത്തിന് വിധേയമായ മത്സ്യങ്ങള്‍ 21 ശതമാനമായിരുന്നത് 20 വര്‍ഷം പിന്നിടുമ്പോള്‍ 34.5 ശതമാനമായി വര്‍ധിക്കുകയാണ് ചെയ്തത്. കൂടുതല്‍ മത്സ്യം, കൂടുതല്‍ പ്രോട്ടീന്‍, കൂടുതല്‍ ലാഭം എന്ന മുതലാളിത്ത നയങ്ങളാണ് ഈ വിപത്തിനുകാരണം. പരിസ്ഥിതി സംരക്ഷണവുമായി ബന്ധപ്പെട്ട് ഇക്കാലത്തിനിടയില്‍ ടോക്യോ, പാരീസ് ഉച്ചകോടികളും 2021 ഒക്ടോബര്‍ 31 മുതല്‍ നവംബര്‍ 13 വരെ ഗ്ലാസ്‌ഗോയില്‍ നടന്ന ഐക്യരാഷ്ട്ര സംഘടനയുടെ 26-ാമത് കാലാവസ്ഥാ വ്യതിയാന സമ്മേളന (COP 26) ത്തില്‍ വരെ ഈ വിഷയം ചര്‍ച്ച ചെയ്യപ്പെട്ടു. 

fishermen
തീരസമുദ്രങ്ങള്‍ മത്സ്യം കൊണ്ട് സമ്പന്നമാണെങ്കിലും തീരദേശവാസികള്‍ എല്ലായിടത്തും പട്ടിണിപ്പാവങ്ങളാണ്. ജനസംഖ്യയില്‍ ലോകത്ത് രണ്ടാം സ്ഥാനത്തുള്ള ഇന്ത്യയിലും ഇതുതന്നെയാണ് സ്ഥിതി. / Photo: Pixabay

തീരസമുദ്രങ്ങള്‍ മത്സ്യം കൊണ്ട് സമ്പന്നമാണെങ്കിലും തീരദേശവാസികള്‍ എല്ലായിടത്തും പട്ടിണിപ്പാവങ്ങളാണ്. ജനസംഖ്യയില്‍ ലോകത്ത് രണ്ടാം സ്ഥാനത്തുള്ള ഇന്ത്യയിലും ഇതുതന്നെയാണ് സ്ഥിതി. ഇന്ത്യയില്‍ 40 ലക്ഷം പേരാണ് മത്സ്യമേഖലയുമായി ബന്ധപ്പെട്ട് ജീവിക്കുന്നത്. രാജ്യത്ത് 3.25 ലക്ഷം യാനങ്ങളാണ് കടലില്‍ മത്സ്യബന്ധനം നടത്തുന്നത്. ഇവയൊന്നും വ്യാവസായിക മത്സ്യബന്ധനം നടത്തുന്നില്ല. ഇവയെല്ലാം ചെറുകിട, പരമ്പരാഗത മത്സ്യബന്ധന യാനങ്ങളുടെ കൂട്ടത്തില്‍പെടുന്നവയാണ്. അന്താരാഷ്ട്ര സമുദ്രങ്ങളിലും ആഴക്കടലിലും 30 ദിവസം പ്രവര്‍ത്തിക്കുന്ന തുത്തൂര്‍ മത്സ്യത്തൊഴിലാളികളുടെ ഒറ്റ ബോട്ടിനുപോലും 25 മീറ്ററില്‍ കൂടുതല്‍ നീളവുമില്ല. 90 ശതമാനം മത്സ്യത്തൊഴിലാളികളും ദാരിദ്ര്യരേഖയ്ക്ക് താഴെയുമാണ്. ഇവര്‍ക്ക് സബ്‌സിഡികള്‍ അത്യാവശ്യമാണ്. അതുകൊണ്ട് പിന്നാക്ക രാജ്യങ്ങള്‍ക്കുള്ള "സവിശേഷവും വ്യതിരിക്തവുമായ പരിഗണന' (Special and Differential Treatment- SDT) വേണമെന്നാണ് ഇന്ത്യയുടെ നിലപാട്. വികസിത രാജ്യങ്ങള്‍ മത്സ്യ സബ്‌സിഡിയായി 3.4 ബില്യണ്‍ ഡോളര്‍ നല്‍കുമ്പോള്‍ വിശാലമായ കടല്‍ത്തീരവും മത്സ്യത്തൊഴിലാളികളുമുള്ള ഇന്ത്യ പത്ത് കോടി ഡോളര്‍ മാത്രമാണ് നല്‍കുന്നത്. 30,000 രൂപ പ്രതിശീര്‍ഷ വരുമാനമുള്ള പിന്നാക്ക രാജ്യങ്ങളെയും ആറുലക്ഷം രൂപ വരുമാനമുള്ള വികസിത രാജ്യങ്ങളെയും തുല്യരീതിയില്‍ കാണുന്നത് അനീതിയാണെന്ന് ഇന്ത്യന്‍ വാണിജ്യ മന്ത്രി പിയൂഷ് ഗോയല്‍ ചൂണ്ടിക്കാട്ടിയിരുന്നു. കഴിഞ്ഞവര്‍ഷം ഇന്ത്യയിലെത്തിയ വ്യാപാര സംഘടനാ മേധാവിയെയും ഇക്കാര്യം അറിയിച്ചിട്ടുണ്ട്. 

ബ്ലൂ ഇക്കോണമി നയം

കഴിഞ്ഞ വര്‍ഷം പ്രഖ്യാപിക്കപ്പെട്ട ഇന്ത്യയുടെ ബ്ലൂ ഇക്കോണമി നയരേഖയും ഇപ്പോള്‍ അവതരിപ്പിക്കാന്‍ പോകുന്ന കേന്ദ്ര ഫിഷറീസ് ബില്ലും മത്സ്യ സബ്‌സിഡി വിഷയത്തില്‍ നിലവിലെ നയത്തിന് വിരുദ്ധമാണ്. ആഴക്കടലിലെ മത്സ്യ സമ്പത്ത് പിടിച്ചെടുക്കാനും ധാതുസമ്പത്ത് ചൂഷണം ചെയ്യാനും കുത്തകകള്‍ക്ക് പ്രോത്സാഹനം നല്‍കുന്ന നയമാണ് വരാന്‍ പോകുന്നതെന്നത് ആശങ്കാജനകമാണെന്ന് കേരള മത്സ്യത്തൊഴിലാളി ഐക്യവേദി സംസ്ഥാന പ്രസിഡന്റ് ചാള്‍സ് ജോര്‍ജ് പറഞ്ഞു. മത്സ്യമേഖലയില്‍ കര്‍ശനമായ നിയന്ത്രണങ്ങള്‍ നടപ്പാക്കുന്നതിനുപകരം കുത്തകകള്‍ക്ക് തീറെഴുതുന്നതിനെതിരെ മത്സ്യത്തൊഴിലാളികള്‍ പ്രക്ഷോഭം ആരംഭിച്ചുകഴിഞ്ഞു. ""ഇന്ത്യയുടെ പരമാധികാര മേഖലയുടെ അതിര്‍ത്തിയിലും അതിനുപുറത്ത് നമ്മുടെ രാജ്യത്തിന് അവകാശപ്പെട്ട മേഖലയിലും വിദേശരാജ്യങ്ങളിലെ വലിയ കപ്പലുകള്‍ മത്സ്യസമ്പത്ത് കൊള്ളയടിച്ചുകൊണ്ടിരിക്കുകയാണ്. ഈ മേഖലയില്‍ പ്രവര്‍ത്തിക്കുന്ന നമ്മുടെ രാജ്യത്തെ തുത്തൂര്‍ മേഖലയിലെ തൊഴിലാളികളുടെ ചെറുകിട യാനങ്ങള്‍ സുസ്ഥിത മത്സ്യബന്ധമാണ് നടത്തിക്കൊണ്ടിരിക്കുന്നത്. ഇതിനെ സംരക്ഷിക്കുകയും ഈ മേഖലയെ സഹകരണവത്കരിക്കുകയും ആധുനീകരിക്കുകയും ഇവര്‍ക്കാവശ്യമായ സബ്‌സിഡികള്‍ നല്‍കുകയുമാണ് വേണ്ടത്. വ്യാവസായിക മത്സ്യബന്ധത്തിലേര്‍പ്പെടുന്ന വികസിത രാജ്യങ്ങള്‍ തങ്ങള്‍ക്ക് വികസ്വര രാഷ്ട്രത്തിന്റെ പരിഗണന വേണമെന്ന് ആവശ്യപ്പെടുന്നത് ഉത്സവപ്പറമ്പിലെ മോഷ്ടാവ് തന്നെ കള്ളന്‍ കള്ളന്‍ എന്ന് വിളിച്ചുകൂവി മറ്റുള്ളവര്‍ക്കൊപ്പം ഓടുന്ന ചിത്രമാണ് ഓര്‍മിപ്പിക്കുന്നത്.'' - ചാള്‍സ് ജോര്‍ജ് പറഞ്ഞു. 
ഇത്തരമൊരു സാഹചര്യത്തില്‍ 12-ാം ഡബ്ല്യു.ടി.ഒ. മന്ത്രിതല സമ്മേളനം നിരര്‍ഥകമാകാനുള്ള സാധ്യതയേറെയാണ് അദ്ദേഹം ആശങ്കപ്പെടുന്നു. ""മത്സ്യത്തിന് സംസാരിക്കാനാവില്ല, മത്സ്യത്തൊഴിലാളികളുടെ  ശബ്ദം ദുര്‍ബലവുമാണ്. അവര്‍ക്കുവേണ്ടി മാനവരാശി തന്നെ സംസാരിക്കേണ്ടതുണ്ട്.''- ചാള്‍സ് പറയുന്നു.   


വായനക്കാര്‍ക്ക് ട്രൂകോപ്പി വെബ്സീനിലെ ഉള്ളടക്കത്തോടുള്ള പ്രതികരണങ്ങള്‍ letters@truecopy.media എന്ന മെയിലിലോ ട്രൂകോപ്പിയുടെ സോഷ്യല്‍ മീഡിയ പ്ലാറ്റ്‌ഫോമുകളിലൂടെയോ അറിയിക്കാം.

കെ.വി. ദിവ്യശ്രീ

ട്രൂകോപ്പി സീനിയര്‍ ഔട്ട്പുട്ട് എഡിറ്റര്‍
 

Audio