Monday, 18 October 2021

ക്വാറി മുതലാളിത്തം


Text Formatted

പ്രകടനപത്രികയില്‍ നിന്ന് അപ്രത്യക്ഷമായ ആ വാഗ്ദാനം :

'ക്വാറികള്‍ പൊതുമേഖലയിലാക്കും'

പാറമടകള്‍ പൊതുമേഖലയിലാക്കുമെന്ന് കഴിഞ്ഞ തവണ ഇടതുപക്ഷത്തിന്റെ പ്രകടന പത്രികയിലുണ്ടായിരുന്നു. ഇക്കുറി ഇടതുപക്ഷം വീണ്ടും ഭരണത്തിലേറുമ്പോള്‍, ഇത്തവണത്തെ പ്രകടനപത്രികയില്‍ അത്തരമൊരു നിലപാട് ഉണ്ടായിരുന്നില്ല. എന്തുകൊണ്ടാണിത്?

Image Full Width
Text Formatted

കേരളത്തിലെ കരിങ്കല്‍ ക്വാറികളുടെ ധര്‍മമെന്താണ്? 
പ്രഥമദൃഷ്ടിയില്‍ തോന്നുക, അവിടെ നിന്നാണ് നിര്‍മാണ മേഖലയ്ക്കാവശ്യമായ പാറ കിട്ടുന്നത് എന്നാണ്. എന്നാല്‍ ക്വാറികള്‍ അതിനുമപ്പുറത്തേക്ക് വളര്‍ന്നുകഴിഞ്ഞു, ചങ്ങാത്ത മുതലാളിത്തത്തിന്റെ കേരളത്തിലെ ഏറ്റവും പ്രധാന നിദര്‍ശനമായി അവ മാറിക്കഴിഞ്ഞു. വീടുകള്‍ക്കും റോഡുകള്‍ക്കും കടല്‍ഭിത്തികള്‍ക്കും പുലിമുട്ടുകള്‍ക്കുമായി ഉപയോഗിക്കേണ്ടിവരുന്ന അത്യാവശ്യ വിഭവം എന്ന നിലയ്ക്കാണ് പാറയെ കരുതിയിരുന്നത്. ആരുടേതാണ് ഈ പ്രകൃതിവിഭവം? 
ഗോവയില്‍ ഖനനത്തിനെതിരെ പ്രവര്‍ത്തിക്കുന്ന ക്ലോഡ് അല്‍വാരിസ് ഒരിക്കല്‍ പറഞ്ഞത്, ഗോവയില്‍ നിന്ന് ഖനനം ചെയ്യപ്പെട്ട വിഭവങ്ങളുടെ വില അവിടുത്തെ ജനങ്ങള്‍ക്ക് വീതിച്ചുനല്‍കിയിരുന്നെങ്കില്‍ ഇന്ന് അവര്‍ ലോകത്തെ ഏറ്റവും സമ്പന്നരായി മാറിയേനെ എന്നാണ്. പാറ എന്ന വിഭവം അത് സ്ഥിതിചെയ്യുന്ന പ്രദേശത്തെ മനുഷ്യരുടേയോ അവരെ ഭരിക്കുന്ന ഭരണകൂടത്തിന്റെയോ സ്വത്തായിട്ടല്ല കരുതപ്പെടുന്നത്. അത് പൂര്‍ണമായും സ്വകാര്യ മുതലാളിമാരുടേതാണ്. പാറമടകള്‍ പൊതുമേഖലയിലാക്കുമെന്ന് കഴിഞ്ഞ തവണ ഇടതുപക്ഷത്തിന്റെ പ്രകടന പത്രികയിലുണ്ടായിരുന്നു. ഇക്കുറി ഇടതുപക്ഷം വീണ്ടും ഭരണത്തിലേറുമ്പോള്‍, ഇത്തവണത്തെ പ്രകടനപത്രികയില്‍ അത്തരമൊരു നിലപാട് ഉണ്ടായിരുന്നില്ല. എന്തുകൊണ്ടാണിത്?

കേരളത്തില്‍  എത്ര കരിങ്കല്‍ ക്വാറികളുണ്ട്? ഈ ചോദ്യത്തിന് ഉത്തരമുണ്ടായിരുന്നില്ല. മൈനിംഗ് ആന്‍ഡ് ജിയോളജി വകുപ്പിന്റെ വെബ്‌സൈറ്റില്‍ ലൈസന്‍സ് കൊടുത്തിട്ടുള്ള ക്വാറികളുടെ വിശദാംശങ്ങളുണ്ടെങ്കിലും അത് പക്ഷേ സര്‍വേ നമ്പരുകളാണ്. നമ്മള്‍ കാണുന്ന ഒരു ക്വാറിയുടെ സ്ഥലം തന്നെ പലപ്പോഴും പല സര്‍വേ നമ്പറുകളിലാകും. അതുകൊണ്ട് എത്ര ക്വാറികള്‍ എന്നതല്ല എത്ര ലൈസന്‍സുകള്‍ എന്നതാണ് മൈനിംഗ് ആന്‍ഡ് ജിയോളജിയില്‍ നിന്ന് ലഭ്യമാകൂ. 

Quarry map
വടക്കന്‍ കേരളം, മധ്യ കേരളം, തെക്കന്‍ കേരളം എന്നിവിടങ്ങളില്‍ പശ്ചിമഘട്ട പരിസ്ഥിതി വിദഗ്ധ പാനലും (WGEEP), കസ്തൂരിരംഗന്‍ സമിതിയും (HLWG) പരിസ്ഥിതി ലോല പ്രദേശങ്ങളായി രേഖപ്പെടുത്തിയ സ്ഥലങ്ങളിലെ ക്വാറി പ്രവര്‍ത്തനത്തെ സൂചിപ്പിക്കുന്ന ഭൂപടം

കേരളത്തില്‍ ഭൂമിയുടെ ഉപരിതലത്തെ മാറ്റിമറിയ്ക്കുന്ന, കുന്നുകളെ കുഴികളാക്കി മാറ്റുന്ന പാറഖനനം  പല തരം ഇടപെടലുകളാണ് കേരളത്തിന്റെ ആവാസ വ്യവസ്ഥയിലുണ്ടാക്കുക. ജലത്തിന്റെ സ്വാഭാവിക ചംക്രമണം തടസ്സപ്പെടുത്തുക എന്നതാണ് അതിലാദ്യത്തേത്. കുന്നുകള്‍ ഇല്ലാതാകുന്നതോടെ മഴക്കാലത്ത് ശേഖരിച്ചു വയ്ക്കുന്നതും വേനലില്‍ ഉറവകളിലൂടെ വിട്ടുകൊടുക്കുന്നതുമായ ജലത്തിന്റെ പാരിസ്ഥിതിക സേവനം ഇല്ലാതാകും. അതുകൊണ്ടുതന്നെ പലയിടത്തും ക്വാറിയോടുചേര്‍ന്ന സ്ഥലങ്ങളില്‍ ജലക്ഷാമം ഉണ്ടാകുകയും ക്വാറി മുതലാളിമാര്‍ തന്നെ കുടിവെള്ള വിതരണം തുടങ്ങുകയും ചെയ്യും. പലയിടങ്ങളിലും തദ്ദേശഭരണ സ്ഥാപനങ്ങള്‍ ജലവിതരണം ഏറ്റെടുത്തിട്ടുണ്ട്. ഒരു സ്ഥലത്ത് സ്വാഭാവികമായി ലഭ്യമായിരുന്ന ജലം എന്ന പ്രധാന പാരിസ്ഥിതിക വിഭവം ഇല്ലാതാക്കി അതിനെ അതിജീവിക്കാന്‍ പണം ചെലവഴിക്കേണ്ടിവരുന്ന അവസ്ഥ നിരവധി പഞ്ചായത്തുകളില്‍ സംഭവിച്ചുകഴിഞ്ഞു. 

ഇപ്പോഴും തുടരുന്ന ക്വാറി വിരുദ്ധ സമരങ്ങളാൾ നിയമപോരാട്ടങ്ങളിലാണ്.
ഭാരിച്ച ചെലവു താങ്ങാതെ അവയും പരാജയപ്പെട്ടേക്കാം.  ഇവയെയൊന്നും കേരളത്തിലെ മുഖ്യധാരാ രാഷ്ട്രീയ പാര്‍ട്ടികള്‍ ഏറ്റെടുത്തിട്ടില്ല

പാറ വിറ്റ പണം മുതലാളിക്കും  അതുകൊണ്ടുണ്ടാകുന്ന പാരിസ്ഥിതിക പ്രശ്‌നം പരിഹരിക്കേണ്ട പണം മുടക്കേണ്ടത് പൊതുസമൂഹവുമായി മാറുന്നു. വലിയ ടോറസ് ലോറികള്‍ നിരന്തരം സഞ്ചരിക്കുമ്പോള്‍ തകരുന്ന റോഡുകള്‍ പുതുക്കിപ്പണിയാനുള്ള പണം മുടക്കേണ്ടത് പൊതുസമൂഹം തന്നെ. ലോറികളില്‍ നിന്ന് വമിക്കുന്ന പുകപടലം മൂലവും ക്വാറിയില്‍ നിന്നുള്ള വെള്ളം ഉപയോഗിക്കുന്നതുമൂലവും ഉണ്ടാകുന്ന അസുഖങ്ങളുടെ ചികിത്സക്കുള്ള ചെലവ് അതാത് വ്യക്തികളും പൊതുസമൂഹവും ചേര്‍ന്ന് വഹിക്കും. പണ്ട് സിനിമകളിലെ സംഘര്‍ഷരംഗങ്ങള്‍ ചിത്രീകരിച്ചിരുന്ന പാറമടകളില്‍ കാണുന്നപോലെ ജോലി ചെയ്യുന്ന ധാരാളം സ്ത്രീകളെയും പുരുഷന്‍മാരെയും ഇന്ന് അവിടെ കാണാനാകില്ല. യന്ത്രങ്ങള്‍ ആ ജോലി ഏറ്റെടുത്തു കഴിഞ്ഞു. കുറച്ചുമാത്രം വേണ്ടി വരുന്ന ജോലിക്കാരാകട്ടെ അന്യഭാഷാ തൊഴിലാളികളും. 

granite-quarry
സംസ്ഥാനത്തെ ഒരു ഗ്രാനെെറ്റ് ക്വാറി / Photo: Department of Mining and Geology, GoK

ഇത്തരത്തിലൊക്കെ ജീവിതം ദുഃസ്സാധ്യമായതിനാലാണ് കേരളത്തില്‍ അങ്ങോളമിങ്ങോളം ക്വാറി വിരുദ്ധ സമരങ്ങള്‍ ഉയര്‍ന്നുവന്നത്. ക്വാറി മുതലാളിമാരുടെ ഭീഷണിക്കുമുന്നില്‍ പിടിച്ചുനില്‍ക്കാനാകാതെ അവയില്‍ ഏറെയും പരാജയപ്പെട്ടു. ഇപ്പോഴും തുടരുന്ന സമരങ്ങളാകട്ടെ നിയമപോരാട്ടങ്ങളിലാണ്. ഭാരിച്ച ചെലവു താങ്ങാതെ അവയും പരാജയപ്പെട്ടേക്കാം.
ഈ സമരങ്ങളുടെ ഒരു പ്രത്യേകത, ഇവയെ കേരളത്തിലെ മുഖ്യധാരാ രാഷ്ട്രീയ പാര്‍ട്ടികള്‍ ഏറ്റെടുത്തിട്ടില്ല എന്നതാണ്. അവരുടെ പിന്തുണയില്ലെന്നുമാത്രമല്ല പലപ്പോഴും അവരോടാണ് സമരം ചെയ്യേണ്ടി വരുന്നതും. ഒരു പ്രദേശത്ത് ഒരു പ്രശ്‌നമുണ്ടാകുക, അത് സാമാന്യ മനുഷ്യരും ക്വാറി മുതലാളിയും തമ്മിലാകുക, അതില്‍ പ്രധാന രാഷ്ട്രീയ പാര്‍ട്ടികള്‍ ജനപക്ഷത്ത് ഉണ്ടാകാതിരിക്കുക - ഇതാണ് ചങ്ങാത്ത മുതലാളിത്തത്തിന്റെ ആദ്യ ലക്ഷണം. നിലനില്‍ക്കുന്ന മുതലാളിത്ത വ്യവസ്ഥയുടെ സമാന്തര വിഭാഗമായ ചങ്ങാത്ത മുതലാളിത്തത്തിന്റെ സവിശേഷ സ്വഭാവം കൊണ്ട് മൂലധനം, ഭരണകൂടത്തിന്റെ ഭാഗങ്ങളായ നിയമം നിര്‍മിക്കല്‍, നിയമം നടപ്പിലാക്കല്‍, നിയമം നടപ്പിലാക്കപ്പെടുന്നുവെന്ന് ഉറപ്പാക്കല്‍ എന്നീ സംവിധാനങ്ങളുമായി അനാശാസ്യ ബന്ധമുണ്ടാക്കി ലാഭമുണ്ടാക്കുന്നു. ലാഭം രാഷ്ട്രീയപാര്‍ട്ടികളുമായും ഉദ്യോഗസ്ഥരുമായും പങ്കുവച്ചാണ് ഈ ചങ്ങാത്തം ഉറപ്പാക്കപ്പെടുന്നത്. അതുകൊണ്ടുതന്നെ എങ്ങനെയാണ് ഈ ചങ്ങാത്ത മുതലാളിത്തം കരിങ്കല്‍ ക്വാറികളുടെ കാര്യത്തില്‍ പ്രവര്‍ത്തിക്കുന്നതെന്നും അതെങ്ങനെയാണ് പരിസ്ഥിതിയെ എന്ന പോലെ തന്നെ നമ്മുടെ ജനാധിപത്യ സംവിധാനത്തെയും മലീമസമാക്കിയതെന്നും അന്വേഷിക്കേണ്ടതായിട്ടുണ്ട്.

മുമ്പുസൂചിപ്പിച്ച പോലെ കേരളത്തിലെത്ര ക്വാറികളുണ്ട് എന്ന ചോദ്യത്തിന് ഉത്തരം കിട്ടേണ്ടതുണ്ട്. എണ്ണം മാത്രമല്ല, അവയെ കേരളത്തിന്റെ ഭൂപടത്തില്‍ അടയാളപ്പെടുത്തുകയും വേണം. എങ്കിലേ, അവ തമ്മിലുള്ള വ്യത്യാസവും ക്വാറികളും പ്രധാനപ്പെട്ട ആവാസ വ്യവസ്ഥകളും മനുഷ്യന് അത്യാവശ്യമായ പാരിസ്ഥിതിക സേവനങ്ങളും തമ്മിലുള്ള ബന്ധവും തിരിച്ചറിയാനാകൂ. ഭൂപ്രതലത്തിന്റെ ഘടനാപരമായ ഉറപ്പ്, ഭൂകമ്പം, ഉരുള്‍പൊട്ടല്‍, മണ്ണിടിച്ചില്‍ എന്നീ പ്രതിഭാസങ്ങളുമായുള്ള ബന്ധവും തിരിച്ചറിയേണ്ടതുണ്ട്.

Quarries-in-Environmentally-Sensitive-Areas-in-WGEEP
WGEEP, HLWG എന്നിവ പരിസ്ഥിതി ലോല പ്രദേശങ്ങളായി കണക്കാക്കിയ ഇടങ്ങളിലെ ക്വാറികളുടെ എണ്ണം, വിസ്തൃതി

2017 ലാണ് അത്തരത്തിലൊരു ശ്രമം നടന്നത്. കേരളത്തിലെ ക്വാറികളത്രയും അന്നാദ്യമായി ഭൂപടത്തില്‍ അടയാളപ്പെടുത്തപ്പെട്ടു. 2014-15 കാലത്തെ ഗൂഗ്ള്‍ എര്‍ത്ത്, ഗൂഗ്ള്‍ മാപ്പ്, ബിംഗ് എന്നീ  ഓപ്പണ്‍ ആക്‌സസ്, ഉപഗ്രഹ ഡാറ്റ എന്നിവയാണ് ഇതിന് ഉപയോഗിച്ചത്. വിഷ്വല്‍ ഇന്റര്‍പ്രട്ടേഷന്‍, വിസ്തീര്‍ണം കണക്കാക്കല്‍, അനാലിസിസ് എന്നിവ QGIS  സോഫ്റ്റ് വെയര്‍ ഉപയോഗിച്ചാണ് ചെയ്തത്. ക്വാറികളുടെ ഭൂപടം തയ്യാറാക്കുക എന്നതിനപ്പുറവും ഒരു വലിയ ഭൂപ്രദേശത്തെ അവ എങ്ങനെയെല്ലാം ബാധിക്കുന്നു എന്നതായിരുന്നു പഠനവിഷയം. 

0.02 മുതല്‍ 64.04 വരെ ഹെക്ടര്‍ വിസ്തീര്‍ണമുള്ള 5924 ക്വാറികളാണ് ഈ പഠനത്തില്‍ കണ്ടെത്തിയത്. കേരളത്തില്‍ 7157.6 ഹെക്ടര്‍ സ്ഥലം ക്വാറിയായിക്കഴിഞ്ഞു എന്നും ഈ പഠനം കണ്ടെത്തി. മധ്യകേരളത്തിലായിരുന്നു  ഏറ്റവും കൂടുതല്‍ ക്വാറികള്‍ - 2438 എണ്ണം. തെക്കന്‍ കേരളത്തില്‍ 1517 എണ്ണവും വടക്കന്‍ കേരളത്തിന്‍ 1969 എണ്ണവും. ഇവയില്‍ 96% ക്വാറികളും കേരളത്തിന്റെ ജലചംക്രമണ വ്യവസ്ഥയായ പുഴകള്‍ക്കും അരുവികള്‍ക്കും 500 മീറ്റര്‍ ചുറ്റളവിനുള്ളിലാണ്. 100 മീറ്റര്‍ ചുറ്റളവില്‍ 2553 ക്വാറികളും 200 മീറ്റര്‍  ചുറ്റളവില്‍ 4072 ക്വാറികളുമുണ്ട്. ഭൗമശാസ്ത്ര പഠന കേന്ദ്രം കണ്ടെത്തിയ കേരളത്തിലെ ഭ്രംശരേഖയില്‍ നിന്ന് ഒരു കിലോമീറ്റര്‍ ചുറ്റളവില്‍ 354 (612 ഹെക്ടര്‍) ക്വാറികളും ഭൂകമ്പ പ്രഭവകേന്ദ്രങ്ങള്‍ക്ക് ഒരു കിലോമീറ്ററിനുള്ളില്‍ 78 (141.68 ഹെക്ടര്‍ ) ക്വാറികളും നിലനില്‍ക്കുന്നു.

granite quarry in kerala
കേരളത്തിലെ ക്വാറികളുടെ എണ്ണവും വിസ്തൃതിയും

വനമേഖലയുമായുള്ള ക്വാറികളുടെ സാമീപ്യമാണ് പഠനത്തില്‍ ഉള്‍പ്പെടുത്തിയ മറ്റൊരു പ്രധാന കാര്യം. 79 (85.83 ഹെക്ടര്‍) ക്വാറികളാണ് സംരക്ഷിത വനപ്രദേശത്തിന് ഒരു കിലോമീറ്ററിനുള്ളില്‍ കണ്ടെത്തിയത്. റിസര്‍വ്വ് വനത്തിന് ഒരു കിലോമീറ്ററിനുള്ളില്‍ 1378 (3000.05 ഹെക്ടര്‍) ക്വാറികളും. പശ്ചിമഘട്ട പരിസ്ഥിതി വിദഗ്ധ പാനല്‍ (Western Ghat Ecology Expert Panel)  പരിസ്ഥിതി ലോല മേഖലകളിലുള്ള ക്വാറികളുടെ സാന്നിദ്ധ്യവും കണക്കാക്കി. ക്വാറികള്‍ പാടില്ല എന്ന് വിദഗ്ധ പാനല്‍ നിര്‍ദ്ദേശിച്ച സോണ്‍ ഒന്നില്‍ 1486 (1699.07 ഹെക്ടര്‍) ക്വാറികളും നിശ്ചിത സമയത്തിനുള്ളില്‍ പ്രവര്‍ത്തനം അവസാനിപ്പിക്കണമെന്ന് നിര്‍ദ്ദേശിക്കപ്പെട്ട സോണ്‍ രണ്ടില്‍ 169 (343.97 ഹെക്ടര്‍) ക്വാറികളും ഉണ്ട്. സോണ്‍ മൂന്നിലാകട്ടെ 1677 (1884.57 ഹെക്ടര്‍) ക്വാറികളും. ഈ പഠനത്തിന്റെ ലക്ഷ്യം കേരളത്തില്‍ ഇതുവരെ പ്രവര്‍ത്തിച്ചിരുന്നതും പ്രവര്‍ത്തിക്കുന്നതും ആയ മുഴുവന്‍ ക്വാറികളും അടയാളപ്പെടുത്തുക എന്നതായിരുന്നു. ഭൂമിയുടെ ഉപരിതലത്തിലെ ഒരിക്കലും തിരിച്ചുകൊണ്ടുവരാനാവാത്ത മാറ്റം (irrevocable change) എന്ന നിലയ്ക്കാണ് ഈ പഠനം നടന്നത്. ഭൂ ഉപരിതലത്തില്‍ സ്ഥായിയായ മാറ്റങ്ങളുണ്ടാക്കുന്നവ എന്ന നിലയ്ക്കാണ്, ഇപ്പോള്‍ പ്രവര്‍ത്തിക്കുന്നവ മാത്രമല്ല മുമ്പ് പ്രവര്‍ത്തിച്ചിരുന്ന ക്വാറികളും വിശകലനം ചെയ്യപ്പെട്ടത്.

ഈ പഠനത്തിന്റെ ഒരു പ്രധാന പരിമിതി, അത് ഉപഗ്രഹ ചിത്രങ്ങളെ മാത്രം അടിസ്ഥാനപ്പെടുത്തിയതിനാല്‍ ചിലപ്പോഴെങ്കിലും ക്വാറികളല്ലാത്ത സ്ഥലങ്ങളും ക്വാറികളായി അടയാളപ്പെടുത്തപ്പെട്ടേക്കും എന്നതായിരുന്നു. ഇത്തരത്തിലുള്ള വ്യത്യാസം മനസിലാക്കാന്‍ വയനാട് ജില്ലയിലെ എല്ലാ ക്വാറികളും സന്ദര്‍ശിച്ച് ഡാറ്റ വെരിഫൈ ചെയ്തു. അതില്‍ നിന്ന് മനസ്സിലായത്, അര ഹെക്ടറില്‍ താഴെയുള്ള ക്വാറികളുടെ എണ്ണത്തില്‍ മാത്രമാണ് വ്യത്യാസമുള്ളത് എന്നാണ്. വയനാട് ജില്ലയിലെ ആകെ ക്വാറികളുടെ വിസ്തീര്‍ണ്ണത്തില്‍ 8.5 ഹെക്ടര്‍ വ്യത്യാസം മാത്രമേ ഉപഗ്രഹചിത്രങ്ങളെ ഉപയോഗിച്ചപ്പോഴുണ്ടായുള്ളൂ. ഈ വെരിഫിക്കേഷന്‍ മറ്റു ജില്ലകളില്‍ കൂടി നടത്തേണ്ടതുണ്ട്. കൃത്യമായ ഡാറ്റ ലഭ്യമാകും വരെ മുമ്പുനടന്ന പഠനം തന്നെ നമുക്ക് ആശ്രയിക്കേണ്ടിവരും.

Quarries-in-Important-Rivar-Basin-in-Kerala
കേരളത്തിലെ പ്രധാനപ്പെട്ട നദീതടങ്ങളിലുള്ള ക്വാറികളുടെ എണ്ണം, വിസ്തൃതി

ഈ പഠനത്തിനു ശേഷമാണ് 2018, 2019 വര്‍ഷങ്ങളിലെ പ്രളയവും ഉരുള്‍പൊട്ടലുകളും മണ്ണിടിച്ചിലും സംഭവിക്കുന്നത്. 2018 ല്‍ 1426 മണ്ണിടിച്ചിലും 2019 ല്‍ 711 മണ്ണിടിച്ചിലുമാണുണ്ടായത്. ഭൂമിയുടെ ഉപരിതലത്തിലെ മനുഷ്യന്റെ ഇടപെടലുകള്‍ ഈ മണ്ണിടിച്ചലുകള്‍ക്കും അതുമൂലമുണ്ടായ ആള്‍നാശത്തിനും വസ്തുവകകളുടെ നാശത്തിനും കാരണമായോ എന്ന പഠനം വന്നുകഴിഞ്ഞു. അതനുസരിച്ച്, 64.76% മണ്ണിടിച്ചിലും ഉണ്ടായത് മനുഷ്യന്റെ ഇടപെടല്‍ നടന്ന ഇടങ്ങളിലാണ്. സ്വാഭാവിക ജൈവ ആവരണം മാറ്റി തോട്ടങ്ങളായി പരിവര്‍ത്തനം ചെയ്ത ഇടങ്ങളിലാണ് ഏറെയും സംഭവിച്ചത്. രണ്ട് ക്ലസ്റ്ററുകളായാണ് മണ്ണിടിച്ചില്‍ സംഭവിച്ചത്. ഇടുക്കി ജില്ലയിലെ മിക്കവാറും പ്രദേശങ്ങളും കോട്ടയം, എറണാകുളം ജില്ലകളുടെ ചില ഭാഗങ്ങളുമാണ് ആദ്യ ക്ലസ്റ്ററില്‍ പെടുക. കോഴിക്കോട്, മലപ്പുറം, വയനാട് ജില്ലകളുടെ അതിര്‍ത്തി പ്രദേശമാണ് രണ്ടാമത്തെ ക്ലസ്റ്റര്‍. മണ്ണിടിച്ചിലിന് കാരണമായി കണ്ടെത്തിയ പ്രധാന കാരണങ്ങള്‍ കരിങ്കല്‍ ക്വാറി, തോട്ടങ്ങള്‍, റോഡുകള്‍ എന്നിവയാണ്.

ക്വാറിയുടെ ജനവാസകേന്ദ്രത്തില്‍ നിന്നുള്ള അകലം 200 മീറ്ററായി തുടരണം എന്ന വാദവുമായി സുപ്രീംകോടതിയില്‍ പാറമടകള്‍ക്കെതിരേ സമരം ചെയ്യുന്നവര്‍ നടത്തുന്ന കേസിൽ എതിര്‍പക്ഷത്ത് ക്വാറി മുതലാളിമാരല്ല, സര്‍ക്കാര്‍ തന്നെയാണ് നിലയുറപ്പിച്ചത്.

തിരുവനന്തപുരം ജില്ലയിലെ മൂക്കുന്നിമലയില്‍ നടന്ന പഠനമാണ് അടുത്തത്. ദീര്‍ഘകാലമായി കരിങ്കല്‍ ക്വാറികള്‍ പ്രവര്‍ത്തിക്കുകയും അത്ര തന്നെ നാള്‍ സമരം നടക്കുകയും ചെയ്ത സ്ഥലമാണ് മൂക്കുന്നിമല. ക്വാറിയ്ക്ക് 500 മീറ്റര്‍ ചുറ്റളവിലുള്ള വീടുകള്‍, തദ്ദേശ സ്വയംഭരണ സ്ഥാപനം, രാഷ്ട്രീയ നേതൃത്വങ്ങള്‍ അടക്കമുള്ളവരോട് സംവദിച്ച് നടത്തിയ സാമൂഹ്യശാസ്ത്ര പഠനമായിരുന്നു അത്. പഠന മേഖലയിലെ 15% വീടുകള്‍ ക്വാറിയില്‍ നിന്ന് 50 മീറ്റര്‍ മാത്രം അകലെയാണ്. 100 മീറ്ററിനുള്ളില്‍ 37.6% വീടുകളും. ക്വാറികള്‍ പ്രവര്‍ത്തിക്കാന്‍ പഞ്ചായത്ത് അനുവാദം കൊടുക്കണം. ഈ വിഷയം അജണ്ടയായി എടുത്ത മീറ്റിംഗില്‍ പുറത്ത് സമരം നടക്കുന്നു എന്ന കാരണം പറഞ്ഞ് തീരുമാനമെടുക്കാതിരുന്നു. പഞ്ചായത്തില്‍ അപേക്ഷിച്ചിട്ട് മറുപടി കിട്ടുന്നില്ലെന്ന പരാതിയില്‍ ക്വാറി ഉടമകള്‍ ഹൈക്കോടതിയില്‍ പോയി അനുവാദം വാങ്ങി. ക്വാറികള്‍ക്ക് അനുകൂലമായി ഉണ്ടാകുന്ന നിയമങ്ങളും ഉത്തരവുകളും വളരെ വേഗം നടപ്പിലാകുന്നു എന്നും അതിനെതിരെയുള്ളവ നടപ്പിലാക്കാന്‍ പൊലീസ് തയ്യാറാകുന്നില്ല എന്നും പഠനം വെളിപ്പെടുത്തുന്നു. 60 ഡെസിമല്‍ മാത്രമാണ് ക്വാറികളില്‍ നിന്നുണ്ടാകാവുന്ന ശബ്ദം എന്നും എന്നാല്‍ അതിലേറെയാണ് ശബ്ദമലിനീകരണമെന്നും പഠനം വ്യക്തമാക്കുന്നു. ഇക്കാര്യത്തില്‍ മലിനീകരണ നിയന്ത്രണ ബോര്‍ഡ് ഇടപെട്ടിട്ടില്ല എന്നും പഠനം കണ്ടെത്തി.

Central-Kerala-Proximity-to-protected-Forest
സംസ്ഥാനത്ത് ഏറ്റവുമധികം ക്വാറികളുള്ള പ്രദേശമായ മധ്യകേരളത്തിലെ സംരക്ഷിത വനമേഖലയും ക്വാറി പ്രവർത്തനങ്ങളും തമ്മിലുള്ള അകലം സൂചിപ്പിക്കുന്ന ഭൂപടം

ആവാസകേന്ദ്രങ്ങളില്‍ നിന്ന് ക്വാറികളിലേക്കുള്ള അകലം സര്‍ക്കാര്‍ ഉത്തരവുകളിലൂടെ 200 മീറ്റര്‍, 100 മീറ്റര്‍, 50 മീറ്റര്‍ എന്നിങ്ങനെ കുറച്ചുകൊണ്ടുവരികയുണ്ടായി. ജനപ്രതിനിധികള്‍ ജനങ്ങളുടെ പ്രതിനിധികളല്ല മറിച്ച് ക്വാറി മുതലാളിമാരുടെ പ്രതിനിധികളായി മാറുന്ന അവസ്ഥ ചങ്ങാത്ത മുതലാളിത്തത്തിന്റെ സംഭാവനയാണ്. പരിസ്ഥിതി സംരക്ഷിക്കുക എന്നത് സാധാരണ മനുഷ്യരുടെയും ഒരു സര്‍ക്കാര്‍ സംവിധാനത്തിന്റെയും സഹായമില്ലാതെ പലപ്പോഴും ഈ സംവിധാനങ്ങളോട് പടപൊരുതി ചെയ്യേണ്ട പ്രവൃത്തിയായി മാറിക്കഴിഞ്ഞു. ഏറ്റവും അടുത്ത ഉദാഹരണം, ക്വാറിയുടെ ജനവാസകേന്ദ്രത്തില്‍ നിന്നുള്ള അകലം 200 മീറ്ററായി തുടരണം എന്ന വാദവുമായി സുപ്രീംകോടതിയില്‍ പാറമടകള്‍ക്കെതിരേ സമരം ചെയ്യുന്നവര്‍ നടത്തുന്ന കേസാണ്. എതിര്‍പക്ഷത്ത് ക്വാറി മുതലാളിമാരല്ല, സര്‍ക്കാര്‍ തന്നെയാണ് നിലയുറപ്പിച്ചത്.

Proximity-of-Quarries-to-Reserved-Forest
കേരളത്തിലെ സംരക്ഷിത വനമേഖലയുമായുള്ള ക്വാറികളുടെ സാമീപ്യം സൂചിപ്പിക്കുന്ന പട്ടിക

എങ്ങനെയാണ് ചങ്ങാത്ത മുതലാളിത്തത്തിന് ഇത്ര തീവ്രമായി കേരളത്തെ പിടിച്ചടക്കാന്‍ സാധിച്ചത്? രണ്ടു കാര്യങ്ങളാണ് ഇതില്‍ പ്രധാന പങ്ക് വഹിച്ചത്. വലിയ ആവേശത്തോടെ നടപ്പിലാക്കപ്പെട്ട ജനകീയാസൂത്രണം പിന്‍വലിഞ്ഞതാണ് അതിലാദ്യത്തേത്. ഒരു പ്രദേശത്ത് ജീവിക്കുന്ന ആളുകളുടെ അറിവോടെയും അനുവാദത്തോടെയുമാണ് അവിടെയുള്ള പദ്ധതികളുടെ ആസൂത്രണം നടക്കുക എന്നും ഇക്കാര്യത്തില്‍ ഗ്രാമസഭകള്‍ക്ക് നിര്‍ണായക അധികാരം ഉണ്ടെന്നുമുള്ളത് പല തരത്തില്‍ വെള്ളം ചേര്‍ക്കപ്പെട്ട് ദുര്‍ബലമായി. കരിങ്കല്‍ ക്വാറികള്‍ പോലെ ജനങ്ങളുടെ ജീവനും സ്വത്തിനും സുസ്ഥിരമായ വിഘാതമുണ്ടാക്കുന്ന പ്രവര്‍ത്തനങ്ങള്‍ക്കുപോലും ഗ്രാമസഭയുടേയോ പഞ്ചായത്തിന്റെയോ അനുവാദം ആവശ്യമില്ലെന്നുവന്നു, അല്ലെങ്കില്‍ എതിര്‍പ്പുകള്‍ മറികടക്കാനുള്ള സംവിധാനങ്ങള്‍ രൂപപ്പെടുത്തുകയും അവ നടപ്പാക്കുകയും ചെയ്ത്, ജനങ്ങളുടെ അധികാരത്തെ പൂര്‍ണമായും റദ്ദാക്കി. പരിസ്ഥിതി സംരക്ഷണത്തിന്റെ പ്രഥമ ഉത്തരവാദിത്വം ജനങ്ങളെ ഏല്‍പ്പിക്കണമെന്ന കാതലായ നിര്‍ദ്ദേശം മുന്നോട്ടുവെച്ച ഗാഡ്ഗില്‍ റിപ്പോര്‍ട്ടിനെതിരെ വലിയ എതിര്‍പ്പ് രൂപപ്പെടുത്തി, അത് ജനകീയമായി ചര്‍ച്ച ചെയ്യാനുള്ള അവസരം പോലുമില്ലാതാക്കിയത് ഈ ചങ്ങാത്ത മുതലാളിത്തത്തിലെ പങ്കുകാരാണ്. 

mukkunni
മുക്കുന്നിമലയില്‍ പ്രവർത്തിക്കുന്ന ക്രഷർ യൂണിറ്റുകളിലൊന്ന്

അതുകൊണ്ടുതന്നെ, കരിങ്കല്‍ ക്വാറികളുടെ പ്രധാന ധര്‍മം എന്നത് നിര്‍മാണമേഖലയ്ക്കാവശ്യമായ വിഭവം പ്രദാനം ചെയ്യുക എന്നതിനപ്പുറത്തേക്ക് നിലനില്‍ക്കുന്ന ജനാധിപത്യ വ്യവസ്ഥയെ തകര്‍ക്കുക എന്നതിലേക്ക് എത്തിനില്‍ക്കുന്നു. അതുകൊണ്ടാണ് പാറമടകള്‍ പൊതുമേഖലയിലാക്കണമെന്ന ആവശ്യം വീണ്ടും ഉന്നയിക്കപ്പെടുന്നത്. പാറ എന്നത് ഒരു സ്വകാര്യ വ്യക്തിയുടേതല്ല, മറിച്ച് ജനങ്ങളുടെ പൊതുസ്വത്താണ് എന്നതാണ് ഈ നിര്‍ദ്ദേശത്തിന്റെ അടിസ്ഥാനം. ഉപയോഗിക്കുന്നതിനനുസരിച്ച് കുറഞ്ഞു വരുന്ന ഒരു വിഭവം എന്ന നിലയ്ക്ക്, സൂക്ഷ്മതയോടെ ഉപയോഗിക്കേണ്ടതാണത്. അനിയന്ത്രിതമായ ലാഭേച്ഛയാല്‍ പ്രവര്‍ത്തിക്കുന്ന നിലനില്‍ക്കുന്ന സംവിധാനത്തിന് ഇതുറപ്പാക്കാന്‍ കഴിയില്ല.

 ആവശ്യത്തിലേറെ പാറ പൊട്ടിക്കപ്പെടും, അതിന് പുതിയ ആവശ്യങ്ങള്‍ തന്നെ നിര്‍മിക്കപ്പെടും. കഴിഞ്ഞ കാലങ്ങളില്‍, ഇടിഞ്ഞ് കടലില്‍ പോയ കടല്‍ ഭിത്തികളെ പോലെ, കഴിഞ്ഞ ദിവസം വിഴിഞ്ഞത്ത് കടലിലേക്ക് വീണുപോയ 176 മീറ്റര്‍ നീളമുള്ള പുലിമുട്ടിന്റെ ഭാഗം പോലെ, നഷ്ടപ്പെടുന്ന പാറകളുടെ കണക്ക് വളരെ വലുതാണ്. ഇവയോടൊപ്പം ഇല്ലാതായിപ്പോയ കുന്നുകളുടേയും മലകളുടേയും കൂടി കണക്കറിയുമ്പോഴാണ് കേരളത്തിന്റെ ഭൂപ്രകൃതിയില്‍ മലയോരത്തും കടലോരത്തും എത്ര വലിയ മാറ്റങ്ങളാണ് മനുഷ്യന്‍ ഉണ്ടാക്കുന്നത് എന്ന് തിരിച്ചറിയുക. മികച്ച രാജ്യങ്ങളൊന്നും ഇത് ചെയ്യാറില്ല. ആഗോള താപനില ഉയരുന്നതുമായി ബന്ധപ്പെട്ട കാലാവസ്ഥാ വ്യതിയാനം സൃഷ്ടിക്കുന്ന സമുദ്രനിരപ്പിന്റെ ഉയര്‍ച്ചയും കൊടുങ്കാറ്റുകളും കാലം തെറ്റിയതും അതിതീവ്രവുമായ മഴയുമൊക്കെ സൂചിപ്പിക്കുന്നത് ഒരോ പ്രദേശത്തിന്റെയും പാരിസ്ഥിതികാരോഗ്യം സംരക്ഷിക്കേണ്ടത് നിര്‍ണായകമാണെന്നാണ്. അതുകൊണ്ട് കേരളം എത്രയും പെട്ടെന്ന് ഈ ചങ്ങാത്ത മുതലാളിത്തത്തെ അഴിച്ചെടുക്കേണ്ടതുണ്ട്, ഒഴിവാക്കേണ്ടതുണ്ട്. അതുകൊണ്ടുതന്നെ, നമ്മുടെ പരിസ്ഥിതിയേയും ജനാധിപത്യത്തേയും സംരക്ഷിക്കാന്‍ ആദ്യം ചെയ്യേണ്ടത് ക്വാറികളെ പൊതുമേഖലയിലേക്ക് മാറ്റുക എന്നതാണ്.

Reference

ഡോ. ടി.വി. സജീവ്​

പരിസ്​ഥിതി ശാസ്​ത്രജ്​ഞൻ.  കെ.എഫ്.ആര്‍.ഐയിൽ സീനിയര്‍ സയൻറിസ്​റ്റ്​. ദേശീയ, അന്താരാഷ്​ട്രീയ ജേണലുകളിൽ ഗവേഷണപ്രബന്ധങ്ങൾ പ്രസിദ്ധീകരിച്ചിട്ടുണ്ട്​.

Audio

PLEASE USE TRUECOPY WEBZINE APP FOR BETTER READING EXPERIENCE.

DOWNLOAD IT FROM