Monday, 29 November 2021

രണ്ട് ചോദ്യങ്ങള്‍


Text Formatted

വധശിക്ഷയുടെ രാഷ്ട്രീയം ചര്‍ച്ച ചെയ്യപ്പെടണം,
സ്വതന്ത്ര മാധ്യമങ്ങളിലൂടെ

വധശിക്ഷയ്‌ക്കെതിരായ നിലപാടുകള്‍ എന്തുകൊണ്ട് ലോകത്തിലെ ഭൂരിപക്ഷം രാഷ്ട്രങ്ങളും സ്വീകരിച്ചു എന്നതും മനുഷ്യാവകാശത്തിന് വിലകല്‍പ്പിക്കാത്ത വിരലിലെണ്ണാവുന്ന ഏതാനും രാജ്യങ്ങള്‍ മാത്രമേ ഇപ്പോഴും അത് തുടരുന്നുള്ളൂ എന്നതും സ്വതന്ത്ര മാധ്യമങ്ങള്‍ പൊതുജനശ്രദ്ധയില്‍ കൊണ്ടുവരണം

Image Full Width
Image Caption
കെ. രാമചന്ദ്രന്‍
Text Formatted

മനില സി. മോഹന്‍: ഇന്ത്യന്‍ നീതിന്യായ വ്യവസ്ഥയിലെ ഏറ്റവും കൂടിയ ശിക്ഷയായി കണക്കാക്കുന്നത് വധശിക്ഷയാണ്. സ്റ്റേറ്റിന്റെ പ്രതികാരമാണ് വധശിക്ഷ എന്ന ആശയത്തെ മുന്‍നിര്‍ത്തി ഒരു പാട് ചര്‍ച്ചകളും സംവാദങ്ങളും കുറേ കാലമായി നടക്കുന്നുണ്ട്. പക്ഷേ അതൊന്നും തന്നെ പൊതുബോധ ധാരണകളെ തിരുത്താനും മാത്രം കരുത്തിലേക്ക് വന്നിട്ടില്ല. അക്കാദമിക്, ഇന്റലക്ച്വല്‍ തലത്തിലെ ചര്‍ച്ചകളില്‍ നിന്ന് സമൂഹത്തിന്റെ എല്ലാത്തട്ടിലെയും ജനങ്ങളില്‍ അവബോധമുണ്ടാക്കാനായി എന്തൊക്കെയാണ് ചെയ്യാന്‍ കഴിയുക? സോഷ്യല്‍ മീഡിയാക്കാലത്ത് എല്ലാ മനുഷ്യര്‍ക്കും അഭിപ്രായം രേഖപ്പെടുത്താനുള്ള വേദി ഉള്ളപ്പോള്‍ പ്രത്യേകിച്ചും.

കെ. രാമചന്ദ്രന്‍: ഏതാനും വര്‍ഷം മുമ്പുണ്ടായിരുന്ന അവസ്ഥയുമായി താരതമ്യപ്പെടുത്തുമ്പോള്‍, വധശിക്ഷയെക്കുറിച്ചുള്ള തുറന്ന ചര്‍ച്ചകള്‍ സാമാന്യജനത്തിന്റെ അവബോധത്തിന്‍മേലും കുറച്ചൊക്കെ മാറ്റം ഉണ്ടാക്കിയിട്ടുണ്ട് എന്നുതന്നെയാണ് എനിക്ക് തോന്നുന്നത്. 
‘അവനെ തൂക്കിലേറ്റൂ! അവനെ വധിക്കൂ!' എന്നിങ്ങനെയുള്ള വൈകാരിക ആക്രോശങ്ങള്‍ ആള്‍ക്കൂട്ടത്തില്‍ നിന്ന് ഉയര്‍ന്നുവരുന്ന ഏര്‍പ്പാട് ഇപ്പോഴും തുടരുന്നുണ്ടെങ്കിലും ഉദ്ബുദ്ധ വിഭാഗങ്ങളില്‍ ഈ പ്രവണതയില്‍ കുറവ് വന്നിട്ടുണ്ട് എന്നുതോന്നുന്നു. 

‘‘ആള്‍ക്കൂട്ടത്തിന്റെ പ്രതികാരദാഹവും സ്വന്തം കുറ്റവാസനകളെ മറ്റൊരാളില്‍ ആരോപിച്ച് പരോക്ഷമായി സംതൃപ്തിയും അഭിലാഷ പൂര്‍ത്തീകരണവും നേടാനുള്ള മനഃശ്ശാസ്ത്രപരമായ തന്ത്രവും എല്ലാം വധശിക്ഷകള്‍ക്കും കൊലപാതകങ്ങള്‍ക്കും ജനസമ്മതി സൃഷ്ടിക്കുവാന്‍ സഹായകമാവാറുണ്ട്. ഇത് കോടതികളെ സ്വാധീനിക്കാറുമുണ്ട്. ആള്‍ക്കൂട്ടത്തിന്റെ അനിയന്ത്രിതമായ വികാരപ്രകടനം  പലപ്പോഴും കൊലകള്‍ക്കും കൂട്ടക്കൊലകള്‍ക്കും ഇട നല്‍കിയിട്ടുണ്ട്. അവരുടെ പ്രാകൃതവും ക്ഷുദ്രവുമായ ആഗ്രഹങ്ങള്‍, അടിച്ചമര്‍ത്തപ്പെട്ട പ്രതികാരദാഹം തുടങ്ങിയവക്ക് പ്രകടിതരൂപം കൈവര