Saturday, 27 November 2021

Re-Reading


Text Formatted

പൂതപ്പാട്ട്, കാവിലെ പാട്ട്: അമ്മവിഗ്രഹത്തിലെ ആൺവാഴ്ച

പുരുഷാധിപത്യം കല്പിച്ചുകൂട്ടി വെച്ചുകെട്ടിയ മാതൃത്വം എന്ന മിത്തുമായി ബന്ധപ്പെട്ട സ്​ത്രീപക്ഷ വിശകലനങ്ങളുടെ അടിസ്​ഥാനത്തിൽ ഇടശ്ശേരിയുടെ പൂതപ്പാട്ട്​, കാവിലെ പാട്ട്​  എന്നീ കവിതകളുടെ ഒരു വിമർശന വായന

Image Full Width
Image Caption
ഇടശ്ശേരി ഗോവിന്ദന്‍ നായർ / ഫോട്ടോ: edasseri.org
Text Formatted

നെട്ടൂർ പെട്ടി, വളവര പെട്ടി എന്നീ ആന്റീക് (Antique)  കരകൗശലങ്ങൾ പുതിയതായി ഉണ്ടാക്കി, വളരെ പണ്ടുണ്ടാക്കിയതാണെന്ന പഴക്കം വരുത്തുന്നതിനായി പുകയും കരിയും കൊള്ളിച്ച്  "സൂത്രപ്പണി'കളുമൊക്കെ ചെയ്ത് വില്ക്കുന്നതു പോലത്തെ കവന വിരുതുള്ള കവിതകളാണ് പൂതപ്പാട്ടും കാവിലെ പാട്ടും.

നാട്ടിൽ പ്രചാരമുള്ള പഴങ്കഥകൾ കവിതകളാക്കിയതാണ് പൂതപ്പാട്ടും കാവിലെ പാട്ടും എന്നു തോന്നിപ്പിക്കുമെങ്കിലും അതല്ല സത്യം. തെക്കേ മലബാറിൽ മകരക്കൊയ്ത്തു കഴിഞ്ഞ് വീടുതോറും വരുന്ന  "പൂതൻ' എന്ന നാടൻ വേഷവും, കാവിൽ പൂരത്തിന് വാളുകൊണ്ട് ശിരസ്സിൽ വെട്ടി ചോരയൊലിക്കുന്ന കോമരവും തന്റേതു മാത്രമായ പുരാവൃത്തം മെനയാൻ കവിക്കു കാരണമായി എന്ന്​ഇടശ്ശേരിയോടും അദ്ദേഹത്തിന്റെ നാടിനോടും അടുപ്പമുള്ളവർ സാക്ഷ്യപ്പെടുത്തുന്നുണ്ട്. മുമ്പ് കേട്ടുകേൾവിയില്ലാത്ത രണ്ടു "പുരാവൃത്ത'ങ്ങൾ സ്വയം കെട്ടിയുണ്ടാക്കാൻ ഇടശ്ശേരിയെ പ്രേരിപ്പിച്ചതെന്ത്?  "മാതൃത്വ'ത്തെപ്പറ്റി അത്ര പരിചയമില്ലാത്ത ചില പുതിയ ബോധ്യങ്ങൾ നമ്മിൽ സംക്രമിപ്പിക്കുക എന്നതാകണം ഈ കാവ്യരചനകളുടെ രഹസ്യലക്ഷ്യം. അവ പഴങ്കഥയുടെ രൂപത്തിൽ പറഞ്ഞതാകട്ടെ മാതൃത്വത്തെപ്പറ്റിയുള്ള മിത്ത് വളരെ പുരാതനമായ സത്യമാണ് എന്നു വരുത്തുന്നതിനാണ്. ഒരേ ഇതിവൃത്തം തന്നെ ചില്ലറ വ്യത്യാസങ്ങളോടെ രണ്ടു തവണ പാടുന്നത് പഴയതെന്നു തെറ്റിദ്ധരിപ്പിക്കുന്ന ഈ പുതുബോധ്യത്തെ നമ്മുടെ ഉള്ളിൽ അടിച്ചുറപ്പിക്കുന്നതിനുമാകുന്നു. 

പൂതപ്പാട്ട്, കാവിലെ പാട്ട് എന്നീ കവിതകൾ തമ്മിൽ ഉള്ളടക്കത്തിലുള്ള ചേർച്ചയെപ്പറ്റി ഡോ. എം. ലീലാവതി, പ്രൊഫ. കെ.പി. ശങ്കരൻ, ഡോ. എം.ആർ. രാഘവവാര്യർ, ഡോ. പി. സോമൻ എന്നിങ്ങനെ പല നിരൂപകരും എഴുതിയിട്ടുണ്ട്. ആശയത്തിലെന്നപോലെ അവതരണത്തിലും കഥാപാത്രങ്ങൾ, വർണനകൾ ഇവയിലെല്ലാം ഏറി നിൽക്കുന്നതാണ് ഈ സാമ്യം. 1955 ൽ പുറത്തിറങ്ങിയ പൂതപ്പാട്ടിന്റെ തുടർച്ചയോ ആവർത്തനമോ ആണ് പത്തു വർഷത്തിനു ശേഷം പുറത്തുവന്ന (1966) കാവിലെ പാട്ട് എന്നു തോന്നിപ്പ