Monday, 18 October 2021

ശരീരത്തിന്റെ രാഷ്ട്രീയം


Text Formatted

കവിത ശരീരം രാഷ്ട്രീയം- 5

ടച്ച്

പരിചയമോ പാരമ്പര്യമോ ഇല്ലാത്തവര്‍ക്ക് മലയാള സാഹിത്യത്തില്‍ ഒരിടവുമില്ലെന്ന് ഞാന്‍ നാട്ടില്‍ ഉണ്ടായിരുന്നപ്പോഴേ തിരിച്ചറിഞ്ഞിരുന്നു

Image Full Width
Image Caption
ആവിഷ്കാരങ്ങള്‍ : ഡോണ മയൂര
Text Formatted

As a woman, I have no country. As a woman, I want no country. As a woman, my country is the whole world
Virginia Woolf

തുവരെയുള്ള ജീവിതത്തിന്റെ പകുതിയില്‍ കൂടുതല്‍ ഞാനൊറ്റയ്ക്കിരുന്നു. ഒറ്റയ്ക്കിരുപ്പിന്റെ പ്രവാസകാലത്ത് പുസ്തകങ്ങള്‍ കൂട്ടിനുണ്ടായി.
ഉറ്റസുഹൃത്തിനെ പോലെ കൈവിടാതെയെന്നെ കയങ്ങളില്‍ നിന്നും കരയേറ്റി. വായനയും യാത്രകളും എന്റെ മനസിനെ മുറിവുകളുണക്കി ബലപ്പെടുത്തി. ഒരുരീതിയില്‍ നോക്കിയാല്‍ പല മൊഴിയില്‍ മലയാളം സംസാരിക്കുന്നതു പോലെയാണ് ആംഗലേയവും. അമേരിക്കന്‍ ഇംഗ്ലീഷില്‍ പ്രത്യേകിച്ചും. ന്യൂയോര്‍ക്കിലും കാലിഫോര്‍ണിയയിലും കെന്റക്കിയിലും ആളുകള്‍ ഒരേ ഭാഷ സംസാരിക്കുമ്പോഴും ഉച്ചാരണം കൊണ്ട്​ വ്യത്യസ്തരായി. ഒരു നഗരത്തില്‍നിന്നും മറ്റൊരു നഗരത്തിലേക്ക് താമസം മാറുമ്പോള്‍ ആദ്യം നോക്കുന്നത് താമസിക്കാന്‍ പോകുന്ന ഇടത്തു നിന്നും ലൈബ്രറിയിലേക്കുള്ള ദൂരമായി മാറി.

മൈ ബോഡി മൈ പൊളിറ്റിക്‌സ് എന്ന തിരിച്ചറിവ് തുറന്നു തന്ന സ്വാതന്ത്ര്യബോധം വലുതായിരുന്നു. ആവിഷ്‌ക്കാരങ്ങളില്‍ പേപ്പറിന്റെയും ക്യാന്‍വാസിന്റെയും പ്രാധ്യാന്യം ശരീരവും അര്‍ഹിക്കുന്നുണ്ടെന്ന് തിരിച്ചറിഞ്ഞു

ഏതു പ്രതിസന്ധികളിലും ഞാന്‍ ആദ്യം പോകുന്നത് ലെെബ്രറിയിലേക്കാണ്. അവിടയുള്ള ഐലുകളില്‍ കൂടി ഒച്ചപ്പാടുണ്ടാക്കാതെ നടക്കും. അങ്ങനെയുള്ള ഒരു ദിവസമാണ്, 1999ല്‍, യോക്കോ ഓനോയുടെ "ഗ്രേപ്പ്ഫ്രൂട്ട്' എന്ന ആര്‍ട്ട്ബുക്ക് ഒരു നിമിത്തം പോലെ ഞാനെടുത്ത് നോക്കുന്നത്. അതിന്റെ തുടര്‍ച്ചകളാണ് എന്നെ കലയില്‍ കൊണ്ടെത്തിച്ചത്. സാഹിത്യവും കലയും തമ്മില്‍ ബന്ധിക്കുന്ന ഇടങ്ങളെപറ്റിയുള്ള നിരീക്ഷണങ്ങളും അന്വേഷണവും അവിടെ നിന്നും തുടങ്ങുകയായിരുന്നു. ഒറ്റയ്ക്കുള്ള യാത്രകളില്‍ പുസ്തകങ്ങളും ദിശാസൂചിയും മാത്രമായിരുന്നു കൂട്ടിന്. വഴികളും തീരുമാനങ്ങളും സ്വയം തിരഞ്ഞെടുക്കണമായിരുന്നു.