Monday, 18 October 2021

സാഹിത്യം


Text Formatted

മലയാളാധുനികതയിലെ ജാതിരൂപ (ക )ങ്ങള്‍

സാഹിത്യത്തിലൂടെ ഒരു ജനതയുടെ സാംസ്‌കാരികമായ സ്വത്വ സവിശേഷതകളെ അന്വേഷിക്കുകയെന്നത് സങ്കീര്‍ണ്ണമായ ഒരു വിമര്‍ശനപ്രക്രിയയാണ്. അത്തരത്തിലുള്ള അന്വേഷണങ്ങളുടെ കാതലുള്ള തുടര്‍ച്ചയാണ് സജീവ് പി.വിയുടെ "ജാതി രൂപകങ്ങള്‍ - മലയാളാധുനികതയെ വായിക്കുമ്പോള്‍'

Image Full Width
Text Formatted

""ശാകുന്തളത്തിന്റെ തര്‍ജ്ജമ പ്രസിദ്ധീകരിക്കാനായി അഭിപ്രായം തേടി കയ്യെഴുത്തുപ്രതിയുമായി കേരള വര്‍മ്മയെ കണ്ട വെളുത്തേരി കേശവന്‍വൈദ്യരോട് കേശവന് ഇത് പ്രസിദ്ധീകരിക്കണമെന്നുണ്ടോ എന്നായിരുന്നു കേരളവര്‍മ്മ ചോദിച്ചത്. ഉദ്ദേശ്യം മനസ്സിലാക്കിയ വെളുത്തേരിക്ക് അദ്ദേഹത്തിന്റെ തര്‍ജ്ജമ മറച്ചുവയ്‌ക്കേണ്ടി വന്നു. തുടര്‍ന്ന് കേരള വര്‍മ്മ വലിയകോയിത്തമ്പുരാന്‍ തന്റെ ശാകുന്തള തര്‍ജ്ജമ നിര്‍വഹിക്കുന്നു. അതാടെ വെളുത്തേരിയുടെ പരിഭാഷ ചരിത്രത്തില്‍ എന്നേക്കുമായി അദൃശ്യമായിത്തീര്‍ന്നു.''
(ജാതി രൂപകങ്ങള്‍ മലയാളാധുനികതയെ വായിക്കുമ്പോള്‍  - സജീവ് പി.വി, പ്രോഗ്രസ് ബുക്‌സ് കോഴിക്കോട്, 2019.)

സാഹിത്യവിമര്‍ശനം വിവിധ സാംസ്‌കാരിക മേഖലകളെ സ്പര്‍ശിക്കുന്നതാവണം എന്ന താരതമ്യേന ആധുനികമായ അഭിപ്രായം കേസരി ബാലകൃഷ്ണപിള്ളയ്ക്ക് ഉണ്ടായിരുന്നു, പക്ഷേ പിന്നീട് മലയാള വിമര്‍ശനത്തിന്റെ മുഖ്യധാര ചലിച്ചത് സാഹിത്യത്തെ കൂടുതല്‍ വിഭാഗീയവും വരേണ്യവുമാക്കാന്‍ സഹായിക്കുന്ന പാതയിലൂടെയായിരുന്നു എന്നൊരു നിരീക്ഷണം പി.പി. രവീന്ദ്രന്‍ നടത്തുന്നത് 1999ലാണ്. സാഹിത്യ വ്യവഹാരത്തെ സംസ്‌കാരത്തിന്റെ ഇതര വ്യവഹാരങ്ങളില്‍ നിന്നു മാറ്റി സംരക്ഷിച്ചു നിര്‍ത്തുന്ന ലാവണ്യവാദ സമീപനത്തെക്കുറിച്ച് സാംസ്‌കാരിക വിമര്‍ശം എന്ന കുറിപ്പില്‍ അദ്ദേഹം സൂചിപ്പിക്കുന്നുണ്ട്. അതൊരു വരേണ്യ മിഥ്യയാണ് എന്ന നിരീക്ഷണവും കൂട്ടത്തിലുണ്ട്. മലയാളത്തിലെ ആധുനികതാവാദത്തിന്റെ അപചയത്തിനു ശേഷം സാഹിത്യ വിമര്‍ശനത്തെ സ്വാധീനിച്ച ചിന്താപദ്ധതികളെക്കുറിച്ച് വിവരിക്കുമ്പോള്‍ ഇന്ത്യന്‍ ആധുനികതാ വാദവും പാശ്ചാത്യ മോഡേണിസവും തമ്മിലുള്ള വ്യത്യാസം പരിശോധിക്കപ്പെടുന്നുണ്ട്. യു.ആര്‍. അനന്തമൂര്‍ത്തി, ഡി.ആര്‍. നാഗരാജ്, കെ. പി. അപ്പന്‍ തുടങ്ങിയ ചിന്തകര്‍ കരുതുന്നതു പോലെ പാരമ്പര്യത്തിനും ആധുനികതയ്ക്കുമിടയ്ക്ക് നിലവിലിരിക്കുന്ന ബന്ധത്തിന്റെ സവിശേഷതകളിലല്ല ആ വ്യത്യാസമുള്ളത്, മറിച്ച് കൊളോണിയല്‍ ആധുനികതയാണ് ഇന്ത്യന്‍ ഭാഷകളിലെ ആധുനികതാവാദത്തിന് കളമൊരുക്കിയത് എന്നതാണ് ആ വ്യത്യാസത്തിനു കാരണമായി പി.പി. രവീന്ദ്രന്‍ കാണുന്നത്.