Saturday, 23 October 2021

ശാസ്ത്രവും ഭരണകൂടവും


Text Formatted

അണുബോംബ് പരീക്ഷിക്കുന്ന ഭരണകൂടത്തിന് ശത്രു സയന്‍സല്ല

എപ്രകാരമാണോ  ഭരണകൂടാധികാരത്തോടും മൂലധനത്തോടും മതം താദാത്മ്യപ്പെട്ടിരിക്കുന്നത്  അതേ വിധത്തില്‍ സയന്‍സും അധികാരത്തിന്റെയും മൂലധനത്തിന്റെയും പതാകയേന്തുന്നു

Image Full Width
Image Caption
1998 ലെ ആണവപരീക്ഷണത്തിനിടെ പൊഖ്രാന്‍ സന്ദർശിക്കുന്ന പ്രധാനമന്ത്രി അടല്‍ ബിഹാരി വാജ്പേയ് / Photo: Hindustan Times
Text Formatted

ധുനികലോകത്ത് മതം, മതതീവ്രവാദം, മതാധിഷ്ഠിത രാഷ്ട്രീയം എന്നിവയ്ക്ക് സയന്‍സ് ശത്രുവാണോ? ഗോമൂത്രത്തെയും ചാണകത്തെയും സമാനതരത്തിലുള്ള വിശ്വാസതന്ത്രങ്ങളെയും പരസ്യമായി എഴുന്നള്ളിക്കുന്ന സംഘപരിവാര ബ്രാഹ്‌മണ മതം സയന്‍സിനെ ശത്രവായി കരുതുന്നുണ്ടോ?
ഇന്നത്തെ ലോകത്ത് ഒട്ടുമിക്ക പേരും മതത്തിലും അതിന്റെ അന്ധവിശ്വാസങ്ങളിലും ആത്മാര്‍ത്ഥമായി അഭിരമിക്കുമ്പോള്‍ തന്നെ ആധുനിക സൗകര്യങ്ങള്‍ നേരിട്ടനുഭവിക്കുന്നതുവഴിയും അടിസ്ഥാന ശാസ്ത്ര വിദ്യാഭ്യാസം കിട്ടുന്നതിലൂടെയും, മറുവശത്ത് സയന്‍സ് വിശ്വാസികളായികൂടി "ഉഭയജീവിതം' നയിക്കുന്നവരല്ലേ? അതായത് വിശ്വാസിയും അവിശ്വാസിയും ഒന്നിച്ചുറങ്ങുന്ന ഒരു കട്ടിലാണ് ആധുനിക ശാസ്ത്രം. എപ്രകാരമാണോ  ഭരണകൂടാധികാരത്തോടും മൂലധനത്തോടും മതം താദാത്മ്യപ്പെട്ടിരിക്കുന്നത് അതേ വിധത്തില്‍ സയന്‍സും അധികാരത്തിന്റെയും മൂലധനത്തിന്റെയും പതാകയേന്തുന്നുണ്ടിന്ന്. ശാസ്ത്രത്തിന്റെ സ്വതന്ത്രാന്വേഷണങ്ങള്‍ അധികാരത്തിനും മൂലധനാസക്തിക്കും രുചിക്കുന്നതല്ലെങ്കില്‍ അവ അടിച്ചമര്‍ത്തപ്പെടുകയോ തഴയപ്പെടുകയോ സാധാരണമാണ്. ഗവേഷണങ്ങള്‍ക്ക് ഏറെക്കുറേ ഫണ്ടു നല്‍കുന്നതും അവയുടെ മുന്‍ഗണന നിശ്ചയിക്കുന്നതും കോര്‍പ്പറേറ്റുകള്‍ തന്നെ. 

കാർഷികാധിനിവേശം

കോളനിവാഴ്ചക്കാലത്തുപോലും ശാസ്ത്രപുരോഗതിയെന്നത് ഇംഗ്ലണ്ടിന്റെ ആവശ്യങ്ങളെ അനുസരിക്കുക എന്നതായിരുന്നു. അതിനു വിരുദ്ധമായി കൊടുത്ത സയന്‍സ് റിപ്പോര്‍ട്ടുകള്‍ അവര്‍ അംഗീകരിച്ചിരുന്നില്ലെന്നതിന് തെളിവാണ് സര്‍ ആല്‍ബര്‍ട്ട് ഹോവാര്‍ഡ് എന്ന കാര്‍ഷിക ശാസ്ത്രജ്ഞന്റെ അനുഭവം. മണ്ണിലെ ഫലഭൂയിഷ്ഠതക്കു നിദാനമായ സൂക്ഷ്മജീവികളെയും പരിസ്ഥിതിയെയും മനുഷ്യാരോഗ്യത്തെയും  നശിപ്പിക്കാത്തതാകണം കാര്‍ഷികമുറകള്‍ എന്ന ഹോവാര്‍ഡിന്റെ ശാസ്ത്രാവബോധത്തെ അന്നത്തെ ഭരണകൂടവും അതിനോട് വിധേയത്വം പുലര്‍ത്തുന്ന യാഥാസ്ഥിതിക സയന്‍സും മുഖവിലയ്‌ക്കെടുക്കുകയുണ്ടായില്ല.